TI'INAANGW 27 - Biblía Axweesantá Hhohho' ar Mungú 2004

Kitángw Ilahhoa

¹ «Kitángw ilahhooa kuwa hanmiisi peehhoó masqaryaandi tir tlehh. Tlenaangós a miíta tsár nee gár niina, nee uroó bihheero a miíta tsár nee gár niina. Tlenaangós nee uroó bihheero masók i alqoná'. Tlenángw gawto a miíta wak nee gár niina.

² Umuúqo tsaafír kitangwduú ilahhooaro baduwós tsiyahhaawo xareemi ki tléhh, xareemiiká' masók nee kitangwdá' ti alkoná', ki ninkiríts ar muqslír sirdaa/aat.

³ Xosluuwós sleémeero ki tléhh: Hutl'aá da/ara ki qamin, nee kureemi nee impuuwo, nee muqslár sihhnaá koom, nee xoslaá asla loohiso, xosluuká' sleémeero ki tléhh ar muqslár sirdaa/aten.

⁴ Daqaní muqslár tsiiriihh ka tléhh ar muqslír sirdaa/aat, qutúruú tsiyáhh oo muqslír sirdaa/aat ku tléhh ku qás gawaá tsaafoó muqslidá' tsiiriihh badu tsiyahhaawo.

⁵ Muqslidá' tsiiriihh ka qás bihhaá baraay awa kitangwduú ilahhooa, as kahhó' iwa hardat tla/auhuú kitangwdá'.

⁶ Xaa'aá kitangwduú ilahhooa kur loohisi ki tléhh ar masqaryaandi, daqaní ki ninkiríts ar muqslír sirdaa/aat.

⁷ Xaaiiká' ki dahás baraá duungáydá' umuúqo barto qoomár burku loohiis.

⁸ Kitanguú ilahhooa ku tléhh ar peehháy, masók i guruú kón ar adoodá' kara aán gawaá tloomaro.»

Afeenír heémár Mungú

⁹ «Afeenír heémár Mungú ka tléhh. Bihhaá basko inqwaarír tsiiriihh an qás ar taa tleéhh ar neewór kitaánír hhohho' ar taa hhuútl. Tlenaangós a miíta mibeeri tsiyáhh nee tsiyáhh bihhaá wake.

¹⁰ Inqwaaridá' tsiiriihh dír kay qaasi a gawaá uheemaá mibeeraá tsár awa muqslár sirdaa/aten. Yukumoó uheemidá' ki iwiitimisi sleeme a muqslár sirdaa/aten, ala muqslár afe mogól ar uheemidá' nee tlin'ii'ine a kin tleehh ar muqslár peésa.

¹¹ Bihhaá /iya sleeme aqo adoorí, inqwaarír tsiiriihh kan tleehh, tlenaangós a miíta mibeeri tsiyáhh nee tsiyáhh, nee uheemiwós a mibeeri tsár awa muqslár sirdaa/aten, ala muqslár afe mogól uheemi nee tlini'iwo gár kir tleehhi a muqslár peésa.

¹² Bihhaá /uwawo inqwaaridá' tsiiriihh tlenaango a miíta mibeeri tsár nee tsár, uheemiwós a mibaangw, nee yukumoó uheemidá' ki iwiitisi a mibaangw sleeme.

¹³ Bihhaa da/aáw amór afkú heémaro uroó heéma a miíta mibeeri tsár nee tsár.

¹⁴ Inqwaaridá' tsiiriihh ar bartá wák ar afkú do', uraywo a miíta lahhoó' nee tlaqi, uheemiwós a tám, nee yukumoó uheemi ki iwiitisi a tám sleeme.

¹⁵ Tlenángw bihhaá tsár ay afkú do', inqwaarirós tidá' tsiiriihh a miíta lahhoó' nee tlaqi, nee uheemiwós a tám nee yukumoó uheemidá' ki iwitisi a tám sleeme.

¹⁶ Afkuduú dahamaá baraá afeeni gár kway qaasi a ka'amír inqwaari ar iiloo'. Tlenaangós a miíta lahhoó' ar taa tleéhh ar neewór se'éngw bee/aangw ar sirbo/, nee ar sirdaa/aten, nee ar da/aten, nee ar kitaánír hhohho', ar taa hhuútl nee ar taa qaalín nee heé qaaliro ga baál. Inqwaaridá' kan siihh gawaá uheemaá tsiyáhh, nee yukumoó uheemidá' ki iwiitisi a tsiyáhh sleeme.

¹⁷ Uheemi sleémeero awa taa afeenirár harweeri kin paa/alár muqslár peésár i nigihhitis. Muqslár afe mogól ar uheemidá' a muqslár peésa sleeme nee yukumoó uheemidá' ki iwiitisi a muqslár sirdaa/aten.

¹⁸ Afeenidá' tlenaangós a miíta mibeeri tsiyáhh nee tsiyáhh, uroó bihheero a miíta mibeeri tsár nee tsár, tlenángw gawa a miíta tsár nee gár niina. Inqwaaridá' tsiiriihh gár kar tleehhi a kitaánír hhohho', nee yukumoó uheemidá' gár kur tleehhi a muqslár sirdaa/aten.

¹⁹ Xoslu sleémeero awa heémár hhoohhoo' ar gadiyér umuúqo daa'awto, dinkwa nee kik'aaro, tam tidá' taa afeenírár tleehhi, gár kir tleehhi a muqslár sirdaa/aten.»

Tsaa'asi

²⁰ «Múk Israeli ádbaweek di/tá hhohho' ngi huwiye' as tsaa'asi. Tsaa'astadá' masók i ót umuúqo daqto.

²¹ Tsaa'astada' dír kay qas a baraá guruú heémár Mungú, daanduú tsee/a oo kutuwidá' sandakmoó alqadór koom. Aroni nee daaqaywós tsaa'astí ngin dír geeraaeé' wá amohhe'eemisiya', iimír tsiindoó wa tleemu ay matlaatle. Hara'ayaarí ka eehari nee xoorór Israeli qari sleémeero.»