TI'INAANGW 26 - Biblía Axweesantá Hhohho' ar Mungú 2004

Heémár Mungú

¹ «Heémár Mungú tleehheek ar inqwaruú mibaangw oo taa tleéhh ar kitaánír hhohho', nee neewór se'éngw bee/aangw ar kaloó sirboó/ nee oo sirda/atén nee oo da/atén. Inqwaruuwí kuri parootús ar slaqsa'aá keruúbi nee heé tleehhamooro gi baál.

² Umuú inqwaariro tlenaangós a miíta mibaá nee tsár, nee uroó bihheero a har miíta tsár. Inqwaruuwí sleémeero masók i alqón.

³ Inqwaruú kooán hiriiteek kuwa afa qamiin as kuwa inqwaarír wák tlehh. Kuduú hatlá' kooán ku malé adoorír tléhh.

⁴ Inqwaruudá' kooán taa dinkwaárí hirít, alhhe'eesoó inqwaaridár kooán tlina'aá sirbó/ tay hirit, tam alhhe'eesoó tidár tsár sleeme ku adoorí láq.

⁵ Tlina'aá mibeeraá kooán hiriiteek gawaá bihhaá ka'amír wake, tam ka'amidár tsár sleeme bihhiiwós tlina'aá mibeeraá kooán ti hirit, masók tlini'iiká' ti afe qoná'.

⁶ Daqaní muqslár afe mogól ar mibeeri kooán ka tléhh ar sahaábu as inqwaruudá' tsaraawo kuwa haraagas, nee heéma tari wák.

⁷ «Kuúng tuuntukmár heéma tleehheek ar inqwaruú mibaá nee wak oo taa tleéhh ar se'éngw aara.

⁸ Tlenángw umuúqo inqwaariro a miíta mibaá nee tám, nee uroó bihheero a miíta tsár. Inqwaruuduú mibaá nee wak masók i alqón.

⁹ Inqwaruú kooán hiriiteek kuwa afa qamiin as kuwa inqwaarír wák tlehh, nee kuduú hatlá' lahhoó' ku adoorí láq sleeme. Inqwaaridár lahhoó' amór geeraá heémaro an sagaáwa tsár wa waageqeér.

¹⁰ Aluuwo tlina'aá mibeeraá kooán ki hirít gawaá alhhe'eesoó ka'amír wák ar inqwaaridár kooán, nee tlina'aá mibeeraá kooán ki malé hirít gawaá tidár tsár.

¹¹ Kuúng muqslár mibeeri kooán ar afe mogól tleehheek ar muqslir sirdaa/aat, ka tsék ar tlini'idá' as inqwaruudá' kuwa dinkwaárií haragas.

¹² Tlaqtidá' inqwaari aa met ka tareeré' amór alaá heémár wa ale.

¹³ Tlaqtá miíta ar aa harwaarahh ar tlenángw inqwaaridá' ta heémar ar tuuntuk, bihhér heéma ngi altarereeit, as heéma ngiwa tuuntuk.

¹⁴ «Daqaní tuuntukumár hatlá' ar heéma ka tléhh sleeme ar kadaá natsaatsa'á' awa gwaandaawe, ka slík ar kaloó daa/aát, nee tuuntukumár hatlá' tleehheek ar kadá natsaatsa'á' aara.

¹⁵ «Kuúng sihhteeraá heéma awa masqaryaandi tsateek.

¹⁶ Umuúqo sihhtamoowo tlenaango a miíta tsiyáhh nee yaangaremaawo a sentimiíta mibeeri lahhoó' nee lahhoó'.

¹⁷ Umuúqo sihhtaamoowo gwe'eedaá baraywo tlaqáf ti tlehh. Peehháy sleémeero ku tlaqafií tléhh.

¹⁸ Naagáy sihhteeraá heéma adór kir tlehh a adoorí: Bihhaá basko sihhteeri a mibeeri tsár.

¹⁹ Muqslár peésa ar mibeeri tsiyáhh ka yukumáy waá tléhh ar ta gwe'eedér sihhteeridá' wa qaasi, umuúqo sihhtamoowo a muqsla tsár as tlaqafuudá' tsár oo sihhtamo nguwa ot.

²⁰ Bihhaá /iiko awa heéma sihhteeri mibeeri tsár ki tléhh sleeme.

²¹ Muqslár peésa ar mibeeri tsiyáhh ka tléhh, ka yukumoó gwe'eedér sihhteeridá' wa qás, umuúqo sihhtamoowo muqsla tsár.

²² Amór alaá heéma awa bihhaá /uwawo sihhteeri lahhoó' ki tléhh.

²³ Sihhteeraá tsár tleehheek as qul/ayduú alaá heéma.

²⁴ Sihhteeriká' baraywo masók kaa haragasiiká, ala gawto ti doogiye' dír tseegamór geera. Sihhteeri tsaraawo aqo kin adoorír tleehh.

²⁵ Sihhteeri sleémeero a dakaát, muqslár ta yukumoó sihhteerí wa qaasi a mibaá nee lahhoó'. Umuúqo sihhtamoowo yukumáy ku baráy wa qaasi a tsár.

²⁶ «Waqasuú kooán oo masqaryaán tleehheek, as kuwa qas gawaá sagér sihhteeri awa bartá wák ar heéma.

²⁷ Waqasuú kooán tleehheek as kuwa qas gawaá sagér sihhteeri awa bartá tsár ar heémaadá', nee waqasuú kooán oo hatlá' as sihhteeraá alaá /uwa awa heémaadá'.

²⁸ Waaqasidá' aa hardat ay tla/auhuú heéma, in bartí wa tleér ay bartaqá'.

²⁹ Sihhteeri sleémeero in ninkiríts ar sahaábu, ki qutúruú sahaábuú i tléhh, as waqasuudá' nguwa gawaá sihhteerí oohi, waqas sleeme un sahaábúr ninkiríts.

³⁰ Daqaní kuúng heémadá' tleehhamooro a aleesleér ar slaqsoó tidá' naa kuúng i laqaám gawaá tloomaro.

³¹ «Daqaní ka'amír inqwaari ka tléhh ar neewór sirbo/ nee ar sirdaa/aten nee ar da/atene nee ar kitaánír hhohho' ar taa hhuútl, ka'amisír inqwaari ka qaalin nee heé qaalír baál as slaqsoó keruúbi kuwa gawaadií tleehhi.

³² Ka'amisír inqwaari ka kikiiár eér gawaá uheemaá tsiyáhh awa masqaryaandi awa taa sahaábúr ninkiriíts. Uheemiidá' masók muqslár afe mogól ngi koná' ar sahaábu, nee masók kaa siíhh gawaá yukmoó taa tleéhh ar muqslár peésa.

³³ Kuúng inqwaaridá' do' gu tla/a qasiis ka tareeré' gawaá muqslaadá' afe mogól, daqaní sandakmooduú alqado ku alaá inqwaaridá' i báts. Inqwaaridá' kana qaás as didá' ak Hhoohhoo' ngiwa qasis nee didá' Hhoohhoo'.

³⁴ Nee kuúng kitángw gurtleemu un qás gawaá sandakmoó alqado kudá' didá' ak hhoohhoó' i dirií'.

³⁵ Nee meésadá' taa tléhh ar peehhoó masqaryaandi ka qás guruú tsee/a oo inqwaaridá', kitangwdá' ta tsaa'asoórí qamin bihhaá basa tiwa qas, baraá guruú heémaro ti afiqone' nee meésadár bihhaá /iya.

³⁶ «Daqaní inqwaarír ta afkú heémár wa qaasi ka tleehhi ar neewór se'éngw bee/aangw ar sirbo/ nee sirdaa/aten nee ar da/atene nee ar kitaánír hhohho' ar taa hhuútl, ka qaalin ló'wa ale.

³⁷ Uheemaá kooán awa masqaryaán ki tléhh as tuuntukumár afkú do' nee ki ninkiríts ar sahaábu sleeme, daqaní muqslár sirdaa/aten ka kwahhút as yukumáy kuwa tlehh oo ta gwe'eedér uheemidá' wa qas.»