TI'INAANGW 25 - Biblía Axweesantá Hhohho' ar Mungú 2004

Ohme as tlehhmuú heémár hhoohhoo'

¹ AAKOÓ MUNGÚ Mose guri báy,

² «Múk Israeli ku beer, ‹Ohme oohare' as aníng.› Kuúng kitangw'eé' wa ooheek dír umuúqo heewo ar adoodá' baraá muunaáwose ngira slaá' haniisaro.

³ Ohmér ta dir'ín wa ilaaot a tí: Sahaábu nee muqslár peésa nee muqslár sirda/aten,

⁴ nee neewór taa tleéhh ar se'éngw bee/aangw ar kaloó sirboó/, nee ar sirda/aten, nee ar da/aten, nee kitaánír hhohho', nee neewór se'éngw aara,

⁵ nee kadaá gwaandaawe awa taa da/teemiís, nee kadaá aara, nee peehhoó masqaryaán,

⁶ nee di/tá tsaa'asi, nee muruudá' ta di/tá iimbalaxángwár aleedogiiti, nee mooyangwdá' tsuú' ta da/aa/an,

⁷ nee tlaa/aá tlaxo gawden awa ta bay sardoniki, nee tlaa/aá hatlá' awa tlaxo gawden awa ta qaasi gawaá naifeéra, nee gawaá tlakoó da/eewo.

⁸ Inooín dír hotaaeé' ngi tleehhiye', as kahhó' niwa baraá tla/angw'ín wa hoot.

⁹ Kuúng heémár Mungú an tléhh ar xosluuká' sleémeero ar slaqsaywí ni kuúng i laqaqaam.»

Sandakmoó alqado

¹⁰ «Múk Israeli sandakmo ngu tleehhiye' ar peehhoó masqaryaán. Tlenaangós a miíta wak nee sentimiíta mibaangw, bihheero uraywós a sentimiíta mibeeri lahhoó' nee lahhoó', baráy wa tleemu ay gawa a sentimiíta mibeeri lahhoó' nee lahhoó'.

¹¹ Kuúng guruuwós nee daanduú tsee/aawo ki ninkiríts ar sahaábuú hhohhó', ku gangeefoó sahaábúy tléhh badu sleémeero.

¹² Kuúng duungoó tsiyáhh ti tlehh ar sahaábu, ku qás afi qoomár ya'aawós tsiyahhawo, duungoó tsár bartá wák, nee oo tsár bartá hatlá'.

¹³ Kuúng xaa'aá tsár awa masqaryaán tleehheek ar as loohisór Sandakmo, daqaní ki ninkiríts ar sahaábu.

¹⁴ Daqaní xaaiisíng ki dahás baraá dungáydá' bihhe tsaraawo ar Sandakmo, as loohisór Sandakmo.

¹⁵ Nee xaaiisíng ki duuxiiká baraá dungáydae.

¹⁶ Daqaní parhheemoodá' tsár awa tlaa/e awa hara'ayar'eé' koomá' ni kuúng i haniis ki qás baraá sandakmoodá'.

¹⁷ «Kuúng kitángw gurtleemu ku tléhh ar sahaábuú hhohhó', tlenaangós a miíta wak nee sentimiíta mibaangw, uroó bihheero a sentimiíta mibeeri lahhoó' nee lahhoó'.

¹⁸ Slaqsa'aá tsár awa keruúbi ki tléhh ar sahaábuú taa kwahhuút, ki qás gawaá alhhe'eesoó badu tsaraawo awa kitangwduú gurtleemu.

¹⁹ Keruúbír wák ka qás alhhe'eesayqá' nee tiqá' alhhe'eesayqá' oo kitángw gurtleemu. Inooín masók a gár wák nee kitaangw.

²⁰ Slaqsi'iidaá keruúbi hhampe'eeri'ín ngi gáwtí tleesiye' as kitangwduú gurtleemu nguwa mahhtírií tleehhiya' ar hhampe'eeri'ín, inooín ti gur'ér xu'usiye', nee gitsee/er'ín kitangwduú gurtleemu ngu ga/eer.

²¹ Kitangwduú gurtleemu qaaseek gawaá daanduú sandakmo, daqaní tlaa/eedá' tsár awa parereehhayen, kudá' ni haniis awa hara'ayar'eé' koomá', ki baraadií qás.

²² Aníng nee kuúng ti doogaán didár kitángw gurtleemu, tla/ángw slaqsa'aá tsár awa keruúbi, kudaá gawaá sandakmoó hara'aya, aníng nee kuúng a axweesaán nee hara'ayar'eé' sleémeero ngi dirók i haniís as múk Israeli.»

Meésár mikaátér ta hanmiisi dír Mungú

²³ «Kuúng meésa an tléhh ar peehhoó masqaryaán, tlenaangós a sentimiíta mibeeri dakaát nee dakaát, uroó bihheero a sentimiíta mibeeri tsiyáhh nee tsiyáhh, baráy wa tleemu ay gawa a sentimiíta mibeeri lahhoó' nee lahhoó'.

²⁴ Meésaarí ka ninkiríts ar sahaábuú hhohhó', nee ka gangeefoó sahaábií tléhh.

²⁵ Kuúng meésaari kari harwét bihhe sleémeero ar peehhír sentimiíta faanqw nee tlaqi ka ninkiríts ar sahaábu, nee ka gangefoó sahaábií tléhh.

²⁶ Duungoó tsiyáhh ku tléhh ar sahaábu nee ku qás afiqoomár ya'aá meésa, baduuwós tsiyahhaawo.

²⁷ Duungáydá' ku qás bihhaá peehhidá' ta harweér ar meésa, as kahhó' xaaiidá' meésa kar loohisi kiwa baraadií dahaasi.

²⁸ Xaa'aá masqaryaán ki tléhh as kiwa meésárár loohisi, daqaní ki sahaábúr ninkiríts.

²⁹ Sahaánaywós ku tléhh, nee tsukma'aá mooyángw tsuú', nee qoloqoloó ilahhooa tsipipi'iimis. Xosluuká' sleémeero ki tléhh ar sahaábuú hhohhó'.

³⁰ Kuúng mikaátér Mungú ka qás umuú daqto gawaá meésaadá' dír geeraaeé' dirii'.»

Kitángw tsaa'aso ki qamin

³¹ «Kuúng kitángw tsaa'aso ki qamin tleehheek ar sahaábuú hhohhó'. Yukumoó tsaa'astadá' nee hhartós tidá' aa gáwtí ganai a gár wák, nee slooqi'iiwose nee qoloqoláywose nee /ayoorose sleémeero tleehheek ar sahaábu.

³² Haleemaá lahhoó' ki tléhh gawaá hhartadá', awa tám bartá wák, awa hatlá' tám bartá tsár.

³³ Gawaá umuú ságw halmiro qoloqoloó tám tleehheek oo slaqamís nee /ayór ta bay loósi, umuú qoloqolto diqi ti tlehh nee /ayoorose.

³⁴ Nee hhartós tidá' aa gáwtí gana', qoloqoloó tsiyáhh gawaawós ti tlehh oo slaqamís nee /ayór ta bay loósi, diqi ti tlehh nee /ayooro.

³⁵ Umuúqo dír haleemaá tsár niwa bihhér xu'uyé' bihhaá baraay diqito'oórí tleehheek.

³⁶ Diqiyaaká' nee haleemidae nee hhartadae a gár wák sleémeero kin tleehh ar sahaábuú hhohhó'.

³⁷ Kuúng tsaa'aso faanqw an tléhh as kitangwduú tsaa'aso, kari gawaadií qás as iwa geeraawós wa gwa/at.

³⁸ Nee muqslaarós tidár ohiingw nee sahaánaywose ki tléhh ar sahaábuú hhohhó'.

³⁹ Kitaangwuú tsaa'aso nee xosluuwós sleémeero gár kir tlehh a kílo mibeeri tám nee kooán ar sahaábuú hhohhó'.

⁴⁰ Magaáhh umuú gaaro tleehheek ar slaqsoó tidá' taa gawaá tloomár wa aán.»