TI'INAANGW 24 - Biblía Axweesantá Hhohho' ar Mungú 2004

Alqado kawa gawdeés

¹ Aluuwo AAKOÓ MUNGÚ Mose guri báy, «Kuúng nee Aroni nee Nadabu, nee Abihuwo, nee bariiseedá' mibeeri faanqw ar Israeliro, qwalaasaré', tsa/amare' amor'eé' anuú AAKOÓ MUNGÚ, aníng sluufmisuú awaaré', ala mi i tseewuwara'.

² Mose kuúng kilók ni tseewuúr dír AAKOÓ MUNGÚ, ala múk hatlá' mindiwa tseewúy, nee xoorór Israeli miti alkoomara' gawaá tlooma.»

³ Mose iri tláy axweesanaydá' Mungú ngwa báy sleémeero guri oó' dír muu, muu sleémeero tari wakleelu'uumár ilawaáts, tari oó', «Axweesanaysíng sleémeero AAKOÓ MUNGÚ naa atén báy u tleehhaán.»

⁴ Mose axweesanaydá' sleémeero oo AAKOÓ MUNGÚ guri gooín. Matlaatlér boo/e iri ti'iít, kitángw ilahhooa ngiwa haniisi guri tleéhh dír afaá tlooma, uheemaá mibaá nee tsár giri siíhh ar harqoomoó tlahh'aá mibaá nee tsár awa xoorór Israeli.

⁵ Naagáy masoombár Israeli gari ya/aáw as AAKOÓ MUNGÚ kuwa ilahhooár da/a/ángw i haniisi, nee awér ta ilahhooár wayduú wa haniisi ngiwa tsu/iya'.

⁶ Mose tlaqtá tseerér hikwaadá' gari qaás baraá isangaai, tlaqtá hatlá' gari hikimiís gawaá kitángw ilahhooa kawa hanimiisi.

⁷ Aluuwo kitaábuudá' taa alqadór Mungú i gooín, guri taataáhh, guri soomuús dír múkí ale, muu iri oó', «Muruusíng sleémeero AAKOÓ MUNGÚ naa aténí oó', u tleehhaán nee a iialooesaán sleeme.»

⁸ Mose tseereedá' gari taataáhh, gari hikiís amór múkí ale, iri oó', «Ga/aawaak, gaarí an tseerér alqadoodá' AAKOÓ MUNGÚ aa tleéhh nee kuungá' ar loohír axweesanaywí.»

⁹ Kár Mose nee Aroni nee Nadabu, nee Abihuwo nee bariiseedá' mibeeraá faanqw ar Israeli tari tsa/án gawaá tlooma.

¹⁰ Inooín Munguú Israeli nguri ariyé'. Didá' aa ya'aawós i qaás a matla/ángw kwaá'o taa tleéhh ar yakutír sirboo/, hhoohhooariro a adór dooraá huunki wasl.

¹¹ Ala geeraharuuseedár Israeli Mungú gár nga /iís i káhh, inooín Mungú nguri ariyé', niri /ayiné', nee niri wahané'.

Mose iwa malé tsa/án gawaá tlooma

¹² AAKOÓ MUNGÚ Mose guri báy, «Qwaláng amor'eé' gawaakaá tlooma, daqaní aníng parhheemaá tlaa/e, kudá' naa hara'aya nee dabeérí gooiím ngi haniís as múk Israeli intsaahhasa ngiwa slay.»

¹³ Mose nee alee/isusmoowós Yoshua tari tláy. Mose iri tsa/án gawaá tlooma amór Mungú.

¹⁴ Mose bariiseedá' gari báy, «Atén ti diirí wá daande' ay dír ni malé ki/aan. Aroni nee Huri a dinkwa nee kuungá', as kahhó' hee bir /aymuú kón iwa dir'ín kay.»

¹⁵ Naagáy Mose iri tsa/án gawaá tlooma, huunki tlooma gari tuuntúk.

¹⁶ Xirfuú AAKOÓ MUNGÚ iri aweér gawaá tloomár Sinai, tlooma kari qiptís nee huunkáy ay deelo lahhoó'. Bál faanqwe Mungú Mose guri ateét baraá huunkáydá' wa alé.

¹⁷ Xirfuuduú AAKOÓ MUNGÚ a adór asltá gawaá ságw tloomár wa oh, slám ku geehhoó' dír múk Israeliwo.

¹⁸ Mose iri dáh baraá huunkidá', iri tsa/án gawaá tlooma, iri gawaá tloomár wa hoót deelo mibeeri tsiyáhh tlaatla/aangw nee xweeraawo.