TI'INAANGW 23 - Biblía Axweesantá Hhohho' ar Mungú 2004

Kwasleemár ganaa' nee qomti

¹ «Axweesanoó lama mu alki/itaar. Ma aldinku'uumisaara' nee heé tlaákw, as tawa lamabu'usmoó lama tleehhit.

² Boo/oó muu oo tlakweemaá tlehhtuú áw mu eeharaharaar, sleeme miti alkoomara' nee boo/aydá' lamabu'úngw lama gu duuxár áw baraá kwasleema as gan'amuú hee nguwa qwaareesiya'.

³ Narkutmo mu gurií ba/aar baraá kwasleemarose as adoodá' tawa narkutmo.

⁴ «Bar slér wakusmoowók aga aán, laqaá daqwaywós aa qwaár, aqo un ki/ís dirósí ale.

⁵ Bar daqoó wakusmoowók ugwa aán aa huú' nee huwaaro, kuúng ma tawó tlawaar, aqo un alee/ís huwaarós kawa gwet, as daqwaay iwa sihhiiti.

⁶ «Gan'amuú narkutmo mu qwaareesaar baraá kwasleemarose.

⁷ Kuúng axweesanoó lama geewakaweek, múk dakuús wásl nee oo gan'amuú kooma mi tsu/aar, asma aníng tlakusmo u gan'amií harafaraaká.

⁸ Kuúng slukuma ma /ayaar, asma slukuma heé muruú tsatsahhaám gun iimi giwís, nee kwasleemár ganaa' ar hee gan hhitiín.

⁹ «Hoomoó baraá tla/angwhúng hoót mu baramaanuusara', asma kuungá' adór hotaá dah'iima i dirii'iya' a xuá'. Asma kuungá' aáng sleeme dah'iima ana /agé' baraá yaamaá Misriro.»

Dabér kurkú faanqw nee bál faanqwe

¹⁰ «Kuúng baraá kureeraá lahhooe qamuuwók doosleek, dahaseek nee balaangók ku fíq.

¹¹ Ala kurkú faanqwe qamuuwók in meér dooslaro, i dahaská sleeme. As kahhó' mukók kuduú narkuute nee makaá sla/a sleeme muruudá' baraadií dirií' nguwa /ayiya'. Adoorí an tléhh sleeme baraá qamuuwók kudaá sabiíbu nee awa seituúniro.

¹² «Deelo lahhooe gadiyuús, ala bál faanqwe ta hungu/ús, sleerók nee daqwaywoge sleeme i hungu/usiye', nee na/aá lawaalo'oorók nee dahaaymoó do'oge i hungu/usiye'.

¹³ «Muruuwí sleémeero naa kuungá' báw iialooeesaak. Munguaá hatlá' mi firiirimaara', tam umer'ín makawa axaás gawaá aferhunge.»

Deelór uren tám

¹⁴ «Kuungá' deelór uren tám tleehhaak umuúqo kurko as ilaiwa/amer'eé'.

¹⁵ Deelór ur ar mikaátér taa sluuftisiiká an tlehhá' ar adoodá' ngira hara'ayiím. Mikaátér taa sluuftisiiká an /agá' deelo faanqw qoomár slahhangwdá' niwa ti'ité' baraá Misriro oo ta bay Abibu. Nee umuúqo heé deeloorí nga boo/eesár ayi mindiwa geeraaeé' daqáy ar dákw kaahaár.

¹⁶ «Slám deelór ur ar bu'úngw geera oo gadiyérhúng tleehhaak, nee ar bu'úngw baraá qamuuhúng daáhh. «Deelór ur ar balangwhúng kuwa burumburiinda' an tlehhá' umuú kurko, qoomár bar bu'úngw gadiyérhúng burumburiindá'.

¹⁷ Ki/ima tám baraá kurko hhawaate ni dír geeraá Aakoó Munguúwók i hardarahiye'.

¹⁸ «Tseerér makiito'ór tinda ilahhooar'eé' wa gaás mingi mukatmoó taa sluuftís alhanisara', nee slám di/tadá' tinda haniís as deelor'ee' ar ur miwa mét ay matlaatle.

¹⁹ «Mamaá geera awa baraá qamuuhúng dahhá' huwaare' baraá doó AAKOÓ MUNGÚ Munguúhúng. «Tam deelmoó niiná oo du'uúm mu humiimara' baraá ilwaá aayorós. »

Al'axweesani nee intsaahhasa

²⁰ «Qaytsiít aníng malaykamo u geeraahúng wa ya/aáw as kuungá' nuwa xun, nee nuwa huwi ay baraá yaamuudá' naa amohhe'eés.

²¹ Ti harmagahhe', nee afoorós iiárií qaasaak, ma dee/anutaara' dirose, asma tlakweemaahúng gi gurtlayká, asma umuueé' in baraawós i dirii'.

²² Ala kuungá' bar afoorós aga ló'wa harmagahhé' iiárií qamiingo, nee tidá' sleémeero án naa kuungá' báw kari tlehhé', daqaní aníng tari wakusmoó wakuuserhúng, nee mukdá' kuungá' nu siasií' án u sií'.

²³ Qoomár bar malaykamooeé' kuungá' naa geerahaár nuri hardahaás baraá yaamaaá xoorór Amori nee ar Hiti, nee ar Perisi, nee ar Kana'ani, nee ar Hifi, nee ar Yebusi, xoorduuká' ngiri hhaamiís.

²⁴ Mungui'ín mi i tumbarara'amitara', sleeme mi sluufmisuú awaara', laqaá tlehhmi'ii'ín mi eeharara'. Ala inooín na hhaamiisaak, nee uheemii'ín sleémeero na geqaawaak.

²⁵ Kuungá' aqo AAKOÓ MUNGÚ Munguúhúng un sluufmisá', nee aníng muruú /aymarhúng nee ma'aá wahangwhunge in tsuúq, slám aníng tiqti an hingeés baraá tla/angwhunge.

²⁶ Baraá ayaahuge /ameenír guruuwós kitaangw gwaa' i káhh, tam kampeeri sleeme i káhh, umuú heewo aqo diimaay gun daahh.

²⁷ «Aníng múk ayeemoodá' un geerahúng wa dae tsaát, nee mukdá' amorhúng i slaqwarár áw un tlaahhír i kwaáhh, wakuuserhúng an way'aás iri geerahúng wa /akumít.

²⁸ Aníng inooín in geerahúng wa diwilií tleés, as kahhó' mukduú Hifi nee oo Kana'ani nee Hitiro kiwa geerahúng wa tlatlahhasi.

²⁹ Múk xoordu u guusaaká gawaá qoomár kurkú wákí ale, as yaamu mindiwa deewaiyé', aluuwo makaay munduwa altlahhiyé'.

³⁰ Aníng inooín in tseegamiís gusisiingo dír geerahúng wa ale, ay dír kuungá' tay doogiindá' nee yaamuudá' kiwa ala'.

³¹ Digmuú yaamuuhúng a iimír tlawtá Shamúr wa tleemu ay tlawtá Mediteranea, iimír xaanxáy wa tleemu ay yaaér Eufrate. Asma yaamuloouusér yaamuuká' ngi gawaá dabaahúng i qaás nee kuungá' kiri tlatlahhasá'.

³² Kuungá' alqado ma tleehhara' nee inooín, laqaá tam nee munguii'ín.

³³ Inooín mindiwa baraá yaamuuhúng wa hootiyé' as munduwa baraá tlakweemií dahaasiyé', aníng kuungá' iri sa dakusá'. Asma bar kuungá' munguii'ín iga sluufmisuú eeré', daqaní looeemaawo aga daté' baraá tsaaxweeli.»