TI'INAANGW 22 - Biblía Axweesantá Hhohho' ar Mungú 2004

Dabér muruú taa fisiisín

¹ «Hee bar awu gwa fiís, laqaá bee/i, nee gari gaás, laqaá gari weeriís, awuudá' wák gun aldaaf ar hikwaá kooán nee bee/iidá' wák gan aldaaf ar bee/ángw kooán.

² Barnaxes fisusmo xweeraawo kwaa dír do' fi/ití áy kway gaás, heedaádá' gwa gaas i dakuúsár konká,

³ ala barnaxes kuwa gaás iimi a tlaatla/aangw, heedaádá' tsu/uut i dakuúsár kón. Fisusmo gár kuwa hariím aqo muruudá' aa fiís gun buu'. Ala bar kun dawa kaahaár inósuuduú kilá' kun weeriis as bu'utuú muruudá' aa fiís.

⁴ Barnaxes sleedá' aa fiís, laqaá daqwaay, laqaá bee/i kaa sláy baraá do'ós wa ale i sláf, sleedá' gan aldaaf ar hikwaá tsár.

⁵ «Hee bar qaymór hee ar sabiíbu gaa de'én, laqaá sleerós gaa geemáy qaymór heé hatlá' gari /ák, inós balangwdá' taa /aáy gun buu' ar balángw hhohhó' oo baraá qaymoorós, laqaá baraá sabiíbuuwós.

⁶ «Hee bar asla gana qaás baraá xwaansláy, aluuwo asltadá' iri /akút baraá balángw hee oo taa buiiká, laqaá qaymo sleémeero gari fák, heedaádá' asla gaa qaas gár kuwa hariím aqo balangwdá' sleémeero gun buu'.

⁷ «Hee bar kuqá' ngwa peésár i haniís as kawa amohhe'eesi, laqaá muruú hatlá', nee muruudá' kuri fiís dír do'ós wa ale, bar fisusmoodá' kwaa óh, aqo peésaadá' gan sagaá wa tsár wa buu'.

⁸ Ala barnaxes fisusmo kwaa slayká, seebuú do' i hardihi dír geeraá Mungú as kawa tsaahhi axáy inós i deéro baraá fiisór inslaawmoowose.

⁹ «Umuú gár muu tiwa watlaanki bar an slee laqaá daqwaay, laqaá bee/i, laqaá tlaba', laqaá umuú gaa gaala ar aa qwat, gár hee iwa kuqá' babay, ‹Gaasíng a te'eé',› axweesantír mukwí tsár ka huwi geeraá Mungú, nee kudá' taa sakwasleemuút nee Mungú, as iwa dakuúsár kon, gadaádá' aqo gan sagaá wa tsár wa buu'.

¹⁰ «Bar hee qaasarár daqwaay laqaá ar slee, laqaá ar bee/i, laqaá ar makiito'ór hatlá' gaa dír heéwí qaás as ngiwa amohhe'eesi, nee makiito'oodá' iri gwá', laqaá iri dii hhitirút, laqaá kaa qawti ar tláy heé gaa ar i kaahh,

¹¹ mukwí tsár lo'o ngi /ayi dír geeraá Mungú wa ale as kawa tsaahhi heedaádá' taa sleérí qaás adór ngira kwatitiiká, nee seebuú slee lo'oodá' ngi ya/an, bu'utuú sleedá' i kaahh.

¹² Ala bar makiito'oodá' kana fiís, heedaáduú gaa loó' garós aqo kan buu'.

¹³ Barnaxes sleedaádá' kana óh nee makiito'ór sla/a, heedaádá' qaasarár de'eém gu/umuú makiito'o aa meetís ngu huwi as looeema kiwa slay, seebuú sleedá' bu'utuuwós i kaahh daanduú sleedá' taa oohi.

¹⁴ «Hee bar slér hee gaa kiriík nee kari qanqín, laqaá iri gwá', seebuúduú slee loó' didae bir kaahh, aqo sleedá' kan buu'.

¹⁵ Bar seebuúduú slee i didií dirii', daqaní ka buiiká, aqo har bu'utuduú iina ooha.»

Dabér ganaa' baraá alhotaariro

¹⁶ «Hee bar /amaatliito'ór taa sa'axweesiiká gaa al/aáy, tari fuquús nee inós, aqo gwada gun haniis, /amaatliito'oodá' gari duux.

¹⁷ Ala bar baabuú dasiidá' aa sií' dasiirós haniisaro, heedaádá' bu'utuú hariím dasír /amaatliito'ór wa ale ngu bui.

¹⁸ «Da/aluso'o ma slafiíngwí mawaara'.

¹⁹ «Heé nee makiito'o naa fuquusiye' a gaasa.

²⁰ «Heé ilahhooár muruú ta tsu/i ga hanmiís dír munguaá hatlá' ala a dír AAKOÓ MUNGÚ kiloseeká aqo gaasa.

²¹ «Dahaaymo mu baramaanusaar laqaá mu slahh'eemisaar asma kuungá' aáng sleeme dah'iima ana /agé' baraá yaamaá Misriro.

²² Kwaalo'o ma slahh'eemisaar, laqaá na/oó panmo.

²³ Barnaxes mukwí ugwa slahh'eemís, inooín niri amor'eé' /aa/iyé', looeemaawo án /aa/eeín i axaás.

²⁴ Aníng niri daa/atúw buhhtaawo, nuri tsuú/ ar paánga, nee tlaawayhúng tari kwaeeli, na/iihúng kiri panáy geexeerá'.

²⁵ «Narkutmo bura kirkitís mu iinuusaar, laqaá aldaafír peésaadá' ma iinuusaar.

²⁶ Bar inslaawmoowók inqwaarirós ngaa dirógí arhaánír wa qaás, aqo an ki/ís dír tsiindi ira datká.

²⁷ Asma wane inqwaarirós ar i untsuusi an tisíng kilós, xáy, gár ir qaati a milá? Inós barnaxes naa amor'eé' /aá/, u iiárií qaás, asma guruueé' i tlatláy.

²⁸ «Mungú mu /ooslimaar, tam geeraharusmoowók mu lu'usaar.

²⁹ «Ma tligaar bu'úngw hargeera kuduú baraá qaymoorók daáhh kuwa hup, nee difaáiro. «Barismoowók ngun aníngí hanís.

³⁰ Adoorí an tlehhá' sleeme dír na/aá baris awa hikwaahúng nee awa bee/angwhunge. Na/oó slee in dír aayírós wa du'ún deelo faanqw, bál dakaate ngu aníngí haniisá'.

³¹ «Kuungá' daqaní a múk taa paraátl as aníng, gawaá adoorihe fu'unaá makiito'ór taa gaás nee makiito'ór sla/a mi /ayaara'. Fu'unaysíng seeaawe ti hanise'.»