TI'INAANGW 21 - Biblía Axweesantá Hhohho' ar Mungú 2004

Hara'aydaá mibaangw awa Mungú

¹ «Gimsé', gár muu ku beera' a tí:

² Lawaalmoó Ebrania bar ugwa tláxw, u sagadiyuusi kureeri lahhooe. Ala kurkú faanqwe geemaweek sleeme bu'utu mu iinuusaar.

³ Barnaxes niwa lawaali'iít aa duuxunká, aqo un kilós geemeér, ala barnaxes nee hareerose nina al'lawaali'iitiyé', aqo nee hareerose in algeemeer.

⁴ Barnaxes heedaádá' aa i lawaali'iít guna hareérí sláy, nee hareedá' na/aá daaqaay nee awa dasuuwo giri laqwál, hareedaádá' nee na/iidae awa heedaádá' aa i lawaali'iít, ala lawaalmoodá' in kilós tláy.

⁵ Ala lawaalmoodaádá' bar ngaa gwa/aateés ooaro, iwa kaahi, ‹Aníng aakooeé' u slaá', nee harer'eene nee na/iieene', a sla'aaká tiwa gweeri,›

⁶ daqaní heedaádá' i lawaali'iít lawaalmoodá' ngu huwi dír geeraá Mungú, dír afkú do', laqaá dír nahhtá afkú do', nee kuri iia fooxiis nee aakoowós ar muqsli. Inós tari lawaalmoó heedaádá' slafiingós sleémeero.

⁷ «Barnaxes hee dasiirós gaa weeriís as tawa lawaalo'o, ka geemayká adór lawaalmoó hhawaata.

⁸ Barnaxes heewí gaa tlaáxw hareerós wa ale, aluuwo heedaádá' gway sla'atiská, lawaalo'oodá' ngi geemay as baabuúwós ngiwa tu/i. I hariindaaká ngiwa weerisi dír múk dahaaye, bar adoorí gaa tleéhh daqaní aa inkihhimu wasleés.

⁹ Barnaxes gaa slaá' garmaawós ngiwa duuxi, ngi adór dasiirós tleehhi.

¹⁰ Hee bar harér hatlá' gan duxuut, muruú /ayma nee tlaba' nee qatuú dír hareedá' ur munguwa /aareés.

¹¹ Bar muruuwí tám gu hardahamisiiká i tleer, bu'utu munguwa iinuús daanduuwose.»

Dabér tsu/uutuusér wa hariim

¹² «Heé kuqá' gwa muux iri gwaá', inós sleeme aqo kun gaas.

¹³ Ala barnaxes gwa haramamahhatiiká aqo har Mungú guna gawaá dabaawós i qaás, daqaní aníng wa/aamér múk aa tsu/uut ngi dirók i laqaám.

¹⁴ Ala hee barnaxes ina tsabín kuqá' nguwa geewaqaati, guri gaas, heewí tam bira goów dír kitángw ilahhooa, ku didá' wa hingeesá', ku gasá'.

¹⁵ «Heé baabuúwós gwa muux, laqaá aayoorós aqo kun gaas.

¹⁶ «Heé hee gwaa fiis as nguwa weerisi, laqaá nguwa lawaalmoowós wa oohi aqo kun gaas.

¹⁷ «Heé baabuúwós gwa lu'us, laqaá aayoorós, aqo kun gaas.

¹⁸ «Bar múk tsár taa áy nee kooko kuqá' guri tsaxaár ar tlaa/ano laqaá guri tuú' ar kundaay guri slahh'eés, guri qaatiís, ala a gwaaiiká,

¹⁹ barnaxes heedaádá' taa slahh'eés tsiní gaa sláy, nee ti'inángw tsee/a gwa aleesláy ar qadisaay, heedaádá' aa muxuut ku geemay. Ala deelór heedaádá' iwa qatií dirii'i ngi bui, nee ngu amohhe'eemamisi ay dír i hungu/uma hhe'eesi.

²⁰ «Hee bar lawaalmoowós laqaá lawaalo'oorós, gaa muux ar hhara, heedaádá' aa muúx bira gwaá' gawaá dabaawós, aqo kun doohhiis.

²¹ Ala bira gwaaiiká baldae, laqaá bál tsare, ku doohhisiiká, asma a kós.

²² «Barnaxes hhawaataá tsár taa ayé', oo wák dir'ine /ameenír tsiiháy gay slahh'eés, tam gura' guri kwáhh, ala slahh'amuú hatlá' i geerií koon i kaahh, heewí gaa slahh'ees aqo ku doohhiis adoodá' hhawaatuú /ameenidá' ngir ooi, nee adoodá' har'ohuuse i o'.

²³ Ala bar slahh'amuú hatlá' aa sleér i deer, daqaní heé hee gwa gaas aqo inós kun gaas.

²⁴ Heé iltá hee gaa gaas, aqo tós kan gaas sleeme, heé sihhnoó hee gwa tuu/, aqo kós kun tuu/ sleeme, heé dákw hee gwa geeqay, aqo kós kun geeqáy sleeme, heé yaaér hee gaa geeqay, aqo tós kan geeqáy sleeme.

²⁵ Heé kuqá' gwa daa/, aqo kun daa/ sleeme, heé hee gwa nor'oos, aqo inós kun nor'oos sleeme, heé hee gwa slaahh, aqo inós kun slaahh sleeme.

²⁶ «Hee bar lawaalmoowós oo hhawaata laqaá /ameeni gwa ilaa slaáhh, nee gari gaás, lawaalmoowós ngu geemay baraá lawaali'iimaro tawa hariímár bu'utuú iltós.

²⁷ Laqaá bar hee lawaalmoó hhawaata laqaá /ameeni gwa sihhno slaáhh, guri kwaáhh, lawaalmoodá' ngu geemay baraá lawaali'iimaro tawa hariímár bu'utuú sihhnoowós.»

Dabér amohhe'eemisuú muruú hatlá'

²⁸ «Bar awu heé hhawaata laqaá /ameeni gwa xarmár áy, nee tari qaátl, awuusíng ku gaasi ar kuwa tlaquuti ar tlaa/e, fu'unaywós mikiwa /aáy. Ala seebuú awu ku geemay.

²⁹ Ala bar awuusíng iqo difimaamiit, nee seebuuwós ku qo gurbuaaín, ala awu gwa ilaa/iiká, nee awu hee guri gaás, hhawaata laqaá /ameeni, awuusíng ku gaasi ar kuwa tlaquuti ar tlaa/e. Seebuú awu sleeme ku gaasi.

³⁰ Barnaxes heewí kuna doohhiís as slafiingós nguwa tu/i, doohhoodá' sleémeero ngi bui.

³¹ Bar awu garma gwaa diíf laqaá dasi, dakós aqo kuduú kilá'.

³² Bar awu lawaalmo gwaa diíf laqaá lawaalo'o, seebuú awu shekeéli mibeeri tám ar peésa ngi haniisi dír aakoó lawaaleedá', nee awuudá' ku tlaquuti ar tlaa/e.

³³ «Bar hee bohoongw gwaa foól, nee gwa tuuntukiiká, awu iri baraadií /eét laqaá daqwaay,

³⁴ seebuú boohoongw i bu'un, seebuú awu laqaá daqwaay ngu bui nee awuudá' aa gwaa' ngur watli.

³⁵ Awu bar awuú heé hatlá' gwa slahh'eés, iri gwaá', daqaní awuusíng slaáf ku weerisi, slaasláwarós kari qasiis, nee awuú aa gwaa' sleeme kuri qasiis.

³⁶ Ala bar awuudá' aa intsahhán hikwaá hatlá' diftaaro, nee seebuú awu gwa tseegiiká, seebuú awu awuudá' ngu awuú hatlár bui nee kudá' aa gwaa' a kós.»