TI'INAANGW 20 - Biblía Axweesantá Hhohho' ar Mungú 2004

Hara'aydaá mibaangw awa Mungú

¹ Mungú /aymi'iiká' sleémeero gina axweés, iri oó',

² «Aníng a AAKOÓ MUNGÚ Munguúwók, kudá' kuúng ugwa duux baraá yaamaá Misrír wa ale, yaamuudá' lawaali'iima kawa /ák.

³ «Munguaá hatlá' mi koomaar, aqo har aníng kilooeé'.

⁴ «Miti kilók slaqsa'aá munguaá hatlá' i tleehhaar, awa slaqás nee gár gawaá doorí dirii', tam slaqsoó gár baraá yaamu, laqaá tam slaqsoó gár baraá ma'aay.

⁵ Kuúng slaqsi'iidá' mi i tumbarara'amitaar, laqaá mi sluufmisuú awaar, asma anuú AAKOÓ MUNGÚ, Munguúwók, a Mungú da/tá koóm, kudá' li/oó tlakweemaá xwayliité tidá' aníng i ahhiit gu dír na/ii'ín buú' tam ay nángw sagaáwa tám laqaá ay tsiyáhh.

⁶ Ala kudá' aníng i sla'á' nee hara'ayar'eé' ngaa oohiye', in slaá' ar sla'aarír warqawaaká ay nángw sagaáwa kumér kúm.

⁷ «Umuú AAKOÓ MUNGÚ, Munguúwók, mu tawo axweesaar, asma AAKOÓ MUNGÚ heé umuuwós gu tawo axweés gu gan'amií harafaariiká.

⁸ «Deelór Sabaáto inslaweek kawa hhoohhooes.

⁹ Deelo lahhooe gadiyuús, gadiyeérók sleémeero tleehheek.

¹⁰ Ala bál faanqw a deelór Sabaáto ar AAKOÓ MUNGÚ Munguúwók. Baalaadae kuúng ma gadiyusaar, laqaá tam garmaawók laqaá dasiirók, laqaá lawaalmoowók, laqaá lawaalo'oorók, laqaá makiito'ór ta de'een, laqaá tam hoomoó dír do'ók.

¹¹ Asma AAKOÓ MUNGÚ ina gadiyuús deelo lahhoó', yaamu nee doori gina tleéhh nee tlabeemo nee umuúqo gár dawa, ala bál faanqwe iri hungu/uús. Gawaá adoorihe AAKOÓ MUNGÚ baalár Sabaáto gari tsuúq, gari hhoohhooeés.

¹² «Baabuúwók nee aayoorók ilaiwawa/eek as slafíngw kureeraá yaariir kuwa sleer baraá yaamuudá' AAKOÓ MUNGÚ Munguúwók ni kuúngí haniisi.

¹³ «Hee mu gaasaar.

¹⁴ «Fuqi ma awaar.

¹⁵ «Ma fisiisimaar.

¹⁶ «Inslaawmoowók mu /aysántí tsataar.

¹⁷ «Doó inslaawmoowók mu ilatleerusaar. Harér inslaawmoowók ma ilatleerusaar, laqaá lawaalmoowós, laqaá lawaalo'oorós, laqaá sleerós, laqaá daqwaywós, laqaá umuúqo gár i kona.»

Muu iwa da'ayuút

¹⁸ Qoomár muu sleémeero kwarara/aadá' kawa axaás, nee mankaro kawa ár, nee afór tarumbeéta kawa axaás, nee quuidá' gawaá tloomár wa ti'imiit kawa ár, tari ló'wa da'ayuút sleémeero tari daraáx, tay amór saáw i sihhiít.

¹⁹ Mose nguri bayé', «Kuúng amoorén nay axweesang, atén kuúng u iiárií qaasaán, ala Mungú mindiwa amoorén i axweés, as atén mawa qatlaán.»

²⁰ Mose muu sleémeero guri báy, «Ma da'ayumiitaara', asma Mungú nina hardáh as kuungá' nuwa iiari as kahhó' kuungá' inós kuwa ilaiwawa/a' umuú daqto nee tlakweema kiwa tlehha'aaká.»

²¹ Naagáy mukdaádá' iri sihhiít amór saaw, Mose iri tseewúy dír giwtidá' Mungú i dirii'i.

Dabér kitángw ilahhooa

²² AAKOÓ MUNGÚ Mose guri báy, «Xoorór Israeli ka beer, ‹Kuungaá kilá' aga axasé' aníng niwa dirhúng i axweés iimír gawaá doorí wa alé.

²³ Slaqsi'iidaá munguaá hatlá' awa taa tleéhh ar peésa nee sahaábuwo mi koomara' dinkwa nee aníng.

²⁴ Kuungá' kitángw aníng iwa ilahhooárí hanmisa' tleehhaak ar hhape, as hikwaahúng nee bee/angwhúng kiwa gawaadií tsu/a' tawa ilahhooár da/a/aangw nee ilahhooár wayda. Umuúqo dír án muu nguwa inslawtisár wa sla'a umueene, aníng nun i hardáh kuungá', nuri tsuúq.

²⁵ Ala barnaxés kitángw ilahhooa u tléhh ar tlaa/e, mu tleehhaar ar tlaa/aá taa tsiíhh, asma xooslmoodá' ta tlaa/ár tsihhi kitangwduú ilahhooa gu meetagaas.

²⁶ Slám kitángw ilahhooar'eé' mu tsa/a/amtoórí tleehhara', as heé amoodá' i tsa/a/ám /aankwetsuuwós mukuwa ár.› »