TI'INAANGW 2 - Biblía Axweesantá Hhohho' ar Mungú 2004

Mose kuwa laqwaál

¹ Heé wák oo doó Laáwi dasír tlahhoó Laáwi gana duúx.

² /Ameenidá' iwa tsít na/oó garma guri xwayluúr. Na/aydá' nguwa aán tawa na/oó ló'wa hhoohhoó', guri lú/ ay slahheeri tám.

³ Nee qoomár ngiwa tsáhh lu/u/uungo gu malé aleesleeraaká, lakwaanti gari tléhh ar duudáy, gari ninkiríts ar boohhayaangw. Na/aay guri baraá guruudií qás, aluuwo lakwaantidá' gari qás baraá gitsór afaá yaaér Nili.

⁴ Hho'ór na/aywí iri amorqá' saáwí sihhít as gár na/aay gu aw ngiwa aan.

⁵ Naagáy dasír Farao niri amorqá' wa /ét, iwa hamtlór eer baraá yaae, nee sagadiyuuseerós i bihhaá yaaér wa harweeririná'. Dasidá' lakwaanti gari aán, sagadiyuso'oorós gari ya/áp ngiwa hup amoorós i alé.

⁶ Lakwaantidá' gari kís, na/aay guri aán, naxés i /aa/amín. Guruuwós iri tláy, iri ó', «Kwí naxooro a na/oó heé wák oo Ebrania.»

⁷ Naagáy hho'ór na/aay dasír Farao gari beér, «Xáy, umtuso'ór na/aay ngi ateéta baraá /ameenár Ebraniár wa alé, as na/aay nguwa umiin as kiíng?»

⁸ Dasír Farao gari beér, «Kahhoo', gím tláw.» Hho'oodár na/aay iri tleér, aayoodár kilá' ar na/aay ngwa laqwal gay atét.

⁹ Dasír Farao iri ó', «Areek, na/aywí du'umiseek daanduueé' wa ale, aníng kiíng i buú'.» /Ameenidá' na/aay guri taatáhh, ngway du'umís.

¹⁰ Qoomár na/aydá' iwa uráy guri húp amór dasír Farao, tari na/aywós. Guri umií tsát guri beér Mose, inós iri ó', «Asma a na/oó naa afaá ma'áy wa sláw.»

Mose iwa goów Midiani

¹¹ Alaá Mose iwa uráy, looarka wake ina amór mukós káy, naxes gina ár adór kira /uurutimís baraá gadiyér gawít i ale. Heé wák oo Misri guri ár i heé muux, oo xooroorór ar Ebrania.

¹² Mose yaamu giri xuuxuú', heé i araa'ari iwa kahhi, heedaáduú Misri guri gaás, guri luú/ baraá hhasaangw.

¹³ Looitleérose Mose iri malé amór hhaeewós káy, múk tsár oo Ebrania guna ár i slaaqw. Kudaádá' hhiyaawós gwaa sadakuus guri báy, «Ahaá, hhiyaawók oo Ebrania mus múx?»

¹⁴ Heedaádá' iri oó', «Heé kuúng ugwa qaas tawa heé úr daanduurene, nee tawa har'ohusmoorén a heemá? Aníng i gaasár wa slá'a adór heedaáduú Misri kura gás?» Mose iri da'ayuút, iri baraá guruuwós i oó', «Looeemaawo gadaádá' aa xu'utít.»

¹⁵ Qoomár Farao kaangwí nguwa axaás, Mose guri leelehhiít as nguwa gaasi. Mose Farao guri ilagoów, iri hotaá áy baraá yaamaá Midiani. Looarka wake qoomár Mose iwa afaá hhalángw ma'aáy wa iwiiwiti,

¹⁶ dasuú faanqw oo kaahamusmooko baraá yaamaá Midiani nina hardáh as ma'aá bee/ángw baabuú'ín nee aaraawo ngiwa iihheekiya'.

¹⁷ De'eemuuse bahh'ale niri hardát, dasuudá' guri gús, ala Mose dasuudá' guri ale/iís, hikwaá baabuúín giri wahaás.

¹⁸ Qoomár inooín niwa watliyé' baabuuín Reueli giri báy, «Ahaá laarí baré naa muutlité'?»

¹⁹ Inooín niri ooiyé', «Heeko Misri tina tuú/ dabaá de'eemuuseedae, slám ma'aá hikwaarén giri iihheék, hikwa nay wahiyé'.»

²⁰ Baabuúín giri yaahaás, «Heésíng i amá? Baré heesíng ugwa amoosíng i geexeeré'? Ateetare' i /ayin.»

²¹ Mose iri ya/án iwa hooti doó heedaádá' wa ale. Heedaádá' guri dasiirós tidá' ta bay Sipora i haniís, ngiwa duuxi.

²² Sipora na/oó garma guri xwayluúr. Mose iri oó', «Aníng an dahaaymoó baraá yaamaá ni xuaaká.» Naagáy umuú na/aydá' guri báy Gershomu.

²³ Alaá qoomár deelór yaariir iwa waaráhh, waawutmoó Misri iri gwaá'. Xoorór Israeli slahh'amuú úr guri sleér baraá lawaali'iimaro, tari /aa/amín. /Aa/eeín niri hardihiyé' amór Mungú.

²⁴ Mungú /aa/eeín giri axaás, nee alqadoorós tidá' aa oó' dír Abrahamu, nee Isaka nee Yakobo gari insláy.

²⁵ Mungú xoorór Israeli gana ár, nee adór i diri'iya' gari tsaáhh.