TI'INAANGW 19 - Biblía Axweesantá Hhohho' ar Mungú 2004

Xoorór Israeli iwa dír tloomár Sinaírí hardát

¹ Slahhángw tám iwa iimu/ún iimír xoorór Israeli iwa ti'ít baraá yaamaá Misriír wa ale, tana hardáh baraá xaanxoó Sinai.

² Inooín nina Refidimúr wa tlayé', xafay'ín nguri tleehhiyé' baraá xaanxaay dír geeraá tloomár Sinai.

³ Mose iri tsa/án gawaá tlooma amór Mungú. Gawaá tloomaro AAKOÓ MUNGÚ Mose guri ateét, guri báy, «Xwaylár Yakobo, inooínadaá múk Israeli ki beer,

⁴ ‹Kuungá' adoodá' aníng naa tleéhh dír múk Misri aga aandé', nee kuungá' nuri ar tláw amor'eéní ale adór gwareesi na/iiwós ngir loohamaamis ar hhampe'eeriwós.

⁵ Hám daxta kuungá' bar axweesanay'eé' ugwa iialooesé' nee alqador'eé' aga oté', daqaní kuungá' a muk'eé' oo aalir'eé' baraá tla/ángw xoordaá hatlae, asma tam xoordaá hatlá' sleémeero sleeme a kwe'eé'.

⁶ Kuungá' dir'eene tari waawuti'iimár kaahamuusér Mungú nee xoorór hhoohhoo' ar Mungú.› Axweesanaywí an kudá' ta o' dír múk Israeli.»

⁷ Mose iri aweér, bariisér Israeli gari dinkwár i burumbuúr, axweesantadá' kwa báy nee AAKOÓ MUNGÚ gari dir'íní oó'.

⁸ Mukdá' sleémeero axweesanaydá' kuri ya/án ar wakleelu'uuma, tari oo', «Axweesanaysíng sleémeero Mungú naa kuúngí oó', u adoosír boo/eesaán.» Mose kaangwí guri ki/ís amór AAKOÓ MUNGÚ.

⁹ AAKOÓ MUNGÚ Mose guri báy, «Ga/aaweegáy aníng ni hardáh amoorók i ale ar baraá huunkír iiloo', as kahhó' xoorór Israeli iwa axas qoomár án nee kuúng bar axweesaán, as umuú daqto uwa haratlintii'iya'.» Aluuwo Mose tidá' muu aa káh gari oó' dír AAKOÓ MUNGÚ.

¹⁰ AAKOÓ MUNGÚ Mose guri báy, «Tláw amór muu, ku hhoohhooés laarí nee matloowo, daqaní ki ádbeér tlabaaín ngi hhuuntsiye'.

¹¹ Ti amohhe'eesiye' ay bál tám, asma bál tame anuú AAKOÓ MUNGÚ ni aweér gawaá tloomár Sinaírí ale, dír ilaá mukwí sleémeero.

¹² Kuúng digma ku tloomár harwét, nee ki beer, ti harmagahhe', miwa hee tsa/án gawaá tlooma, laqaá tam digmuudá' mukuwa kwatiít. Heé tlooma gaa kwatiit aqo kun gaas.

¹³ Heedaádá' tlooma gaa kwatiit mukuwa kwatiit nee hee, asma inós a gaasa ar tlaa/e, laqaá ar maheeri. Umuúqo gár tloomadá' gaa kwatit ta hee, laqaá ta makiito'o aqo gaasa. Ala qoomár tarumbeéta barka ufaáhh, muu sleémeero i tseewuy dír afaá tlooma.»

¹⁴ Naagáy Mose iri gawaá tloomár wa aweér, muu guri hhoohhooeés, tlabaaín ngiri hhuuntsiyé'.

¹⁵ Mose muu guri báy, «Ti amohhe'eese' as balooqa, hhaawata miwa amór /ameenír káy.»

¹⁶ Bál tám matlaatleero naxés gaa a kwarara/a nee mankaro, slám huunkír qo iloo' i gawaá tlooma, afór tarumbeéta i ló'wa tseeamiín. Muu sleémeero baraá xafaywo iri ló'wa da'ayuút.

¹⁷ Mose muu guri ateét baraá xafáy wa ale, guri geerahaár amór tlooma as nee Mungú tiwa doogiyá', sleémeero nari sihhiitiyé' afaá tlooma.

¹⁸ AAKOÓ MUNGÚ ina aweér gawaá tloomár Sinai ar baraá asla, tloomadá' iri qaba'át quuiro adór quuír asltá gufteeri ar taa slaáx ló'wa ale, tloomadá' sleémeero iri ló'wa diingít.

¹⁹ Afoodár tarumbeéta iwa ak ló'wa tláhh, Mose iri axweés amór Mungú, Mungú Mose guri mu/aywaáts ar baraá kwarara/a.

²⁰ Qoomár AAKOÓ MUNGÚ iwa aweér gawaá tloomár Sinai, inós Mose guna gawaá ságw tloomár wa ateét, Mose iri amoodií tsa/án.

²¹ AAKOÓ MUNGÚ Mose guri báy, «Tláw aweér, mukqá' gurbueek, aníng miwa artá ayé', aluuwo niri qatliyá'.

²² Tam kaahamuusér Mungú, tidá' AAKOÓ MUNGÚ gu i tseewuwuw, gár kawa hariím tin ala hhoohhooés, bar adooriheeká án i i buúhh.»

²³ Mose AAKOÓ MUNGÚ guri báy, «Mukqá' kungu geemayká niwa tsa/ana' gawaá tloomár Sinai, adoodá' kuúng naa hara'ayiín digma kuwa tloomárár harweeraan, aga tleehhaán as tlooma kawa paraatlaán.»

²⁴ AAKOÓ MUNGÚ Mose guri báy, «Tláw aweér, daqaní Aroni ngur kí/ amor'eéní ale, ala kaahamuusér hatlá' dinkwa nee muko mindiwa daqayé' amor'eene, asma bar adooriheeká aníng i i buúhh.»

²⁵ Naagáy Mose iri aweér amór múkwí ale, kangwdá' sleémeero guri dir'íní alki/iít.