TI'INAANGW 18 - Biblía Axweesantá Hhohho' ar Mungú 2004

Yetro iwa amór Mose káy

¹ Kaahamusmoó yaamaá Midiani oo ta bay Yetro, inós a taatoó harér Mose, kángw muruudá' Mungú aa tlehhaahhiít dír Mose nee xoorór Israeli, nee adór kingira duúx baraá Misrír wa ale, ngiwa axaás,

² inós nee dasiirós tidá' ta bay Sipora, harér Mose, tiri alkoné' ay amór Mose, asma Mose hareerós gana ki/ís amór dooín.

³ Tina alkoné' nee daaqaydá' tsár oo Mose, oo wák umuuwós a Gershomu (Gershomu gídaabárós a aníng ana hoót adór dahaaymo baraá yaamá dahi'iimár wa ale).

⁴ Garmoó tsár umuuwós a Elieseri, (Elieseri gídaabárós a Munguú baabuúeé' aníng ina alee/iís, ina tuú/ dír Farao wa ale).

⁵ Yetro, taatawuú harér Mose, nee dasiirose nee haywaá hatose, Mose nguri baraá xaanxáy ayé', inós xaftós gaa tleéhh dír tloomár Mungú.

⁶ Mose kuna kángw báy adór taatoó hareerós nee hareerose nee daaqaywós tsaraawo nir amoorós kayá'.

⁷ Mose iri tláy as ngiwa al'ay. Tiwa doogiyé', iri tumbarara'aát dír geeraá taatoó hareerós, guri ma'aás. Saayú nguwa hhe'eesiyé' hayooharo, tari dáh baraá heéma.

⁸ Aluuwo Mose kangwdá' AAKOÓ MUNGÚ aa tlehhahhiít dír Farao nee múk Misri as xoorór Israeli ngiwa ba/amiimisi, guri alki/a/iít dír taatoó harerós. Slahh'ámuú taa slasláy baraá loohiro, nee adór AAKOÓ MUNGÚ ngira wangexwadiít, gari káh sleeme.

⁹ Yetro kuri qwal/atís nee tlehhmi'iiká hho' AAKOÓ MUNGÚ aa tlehhahhiít dír múk Israeli, awa ngiwa ba/amís gawaá dabaá múk Misriro.

¹⁰ Yetro iri oó', «AAKOÓ MUNGÚ i xirfuuti as kuungá' nuwa wangexwaár baraá lawaali'iimár Farao wa ale, nee dír múk Misriro.

¹¹ Daxta aga tsaáhh adór AAKOÓ MUNGÚ kur úr dír munguaá hatlá' sleémeerowo, asma kuungá' nuna wangeexwaár baraá dabaá múk Misrír wa ale, kudá' naa baramaanumamiis.»

¹² Yetro, taatoó harér Mose, ilahhooár da/a nee ilahhooár muruú ta tsu/i garí haniís dír Mungú. Aroni iri hardáh dinkwa nee bariisér Israeli as tawa al/ayin nee Yetro dír geeraá Mungú wa ale.

Har'ohuuse kawa qaás

¹³ Looaytleérós Mose iri dír tlahháy iwiít as kwasleemadaá muu i kon ngiwa tleehhi, naxés Mose kuna harweér nee muu iimír matlaatlér wa ale ay tsiindo.

¹⁴ Taatoó harér Mose kaangwí Mose i tlehhiiti dír múk Israeli i ale nguwa ga/aa/áy, Mose guri yaahaás, guri báy, «Ahaá, muu mus muruuwí tlehhít? Slám baré ana kilók iwít, nee muu una harweér bihhe sleémeero matlaatlér wa oohang ay tsiindo.»

¹⁵ Mose taatoó hareerós guri báy, «Mukwí nina dir'eéní hardáh as sla'aarír Mungú ngiwa yaahamiisi.

¹⁶ Múk taa afo dakumiis birna hardáh un haraaki/ís, aníng an har'ohiím tla/ángw hee nee inslaawmoowose, nee in intsaahhatimís kaahír Munguhe nee adoodá' i slai.»

¹⁷ Taatoó harér Mose iri oó', «Adoosíng ta tlehhit i qoondaaká.

¹⁸ Looeemaawo kuúng gadiyeésíng u slaaqatís dinkwa nee mukdá' ni amoorók kakáw sleeme. Asma gadiyeésíng ka iiloo' diroge, kuúng kilók a tu/ká.

¹⁹ Gím daxtá, hara'ayar'eé' iiárií qaaseek, Mungú masók a dinkwa nee kuúng. Kuúng gadiyeérók a an sihhít dír geeraá Mungú as daanduú mukwí, nee axweesanoó gawdén un amoorós i huwaahúp.

²⁰ Nee inooín in intsaahhatimís kaahír Munguhe, nee adoodá' i slai, nee in xu'utís adoodá' kiwa hariím hotaawo nee tlehhtuuwo.

²¹ Ala muruú hatlá' dír kwihe, muu na leelehheek baraá tla/angw'ín wa ale, masók a múk aleesleemuú koóm, múk Mungú ilaiwawaá/, múk inkihhimuú koóm, múk slukmár /ayaaká. Waawiti'iimárí haniseek, bahh'ale múk kumuú wák ngu geeraharahariye', bahh'ale múk tsiiru, kooko múk mibeeri kooán, kuqá' múk mibaangw.

²² Inooín qaa/oó muksíng kun tlaaq umuú daqto, axweesanaydá' gawdén ngun amoorók i waarahhamisiye', ala axweesanaydá' ninákw ngu kilooín tlaaqiye'. Adoorí bar aga tléhh, kuúng hiinsla u gú/, asma inooín kuúng u alee/iisiyá' baraá gadiyeésinge.

²³ Adoorí bar aga tléhh, nee bar Mungú gaa slaá' sleeme, daqaní kuúng nee mukwí a alhotá', nee inooín nin watliyá' amór maray'ín qaa/ay'ín aa faák.»

²⁴ Naagáy Mose axweesantá taatoó harerós gaa waa/akutiiká, ala adoodá' ngwa báy sleémeero gari tleéhh.

²⁵ Mose múk aleesleemú koóm baraá tla/ángw xoorór Israeliro guri tsawaár giri geeraharuusér wa qaás, barakarka a geeraharuusér múk kumuú wák gu geeraharahaar, tooka geeraharuusér múk tsiiru gu geeraharahaar, tooka geeraharuusér múk mibeeraá kooán gu geeraharahaar, tiqá' a geeraharuusér múk mibaangw.

²⁶ Inooín kwasleemadaá muu ngina tlaaqiyé' umuú daqto. Qaa/oó ninákw sleémeero nguna tlaaqiyé', ala qaa/oó aa gawduy inooín nguna huwiyé' amór Mose.

²⁷ Alaá tihe Mose nee taatoó hareerós tiri deelór bayé', naagáy aakoodá' iri waátl ayaawósí alé.