TI'INAANGW 17 - Biblía Axweesantá Hhohho' ar Mungú 2004( Faaro 20:1-13 ) 1 Xoorór Israeli sleémeero iri baraá xaanxoó Sínír wa lót, inooín nina hara loohi qaqatiné' ar adoodá' AAKOÓ MUNGÚ ngira hara'ayín. Xafaay nguri tleehhiye' dirka ta bay Refidimu. Ala ayaadae ma'aá wahaangw i kahhiyá'. 2 Gawaá adoorihe Mose nguri i qununu/iyé' ta kaahi, «Ma'aá wahaangw haniisang.» Mose giri báy, «Ahaá mas aníngí qununu/á'? Mas AAKOÓ MUNGÚ iiara'adá'?» 3 Ala muu sleémeero ina waximiít, tari kumiít qununu/aywo dír Mose, ta kaahi, «Ahaá, gár tisa baraá Misrír wa dúx? A as tiwa tsu/utár wa slá'a ar waxe, atén nee na/iirene nee makayrene?» 4 Mose iri /aá/ amór AAKOÓ MUNGÚ, iri oó', «Mungú, aníng mukwí adór ngu laaq a adoomá? Asma inooín i aníng tlaqutuú wa slaiyá' ar tlaa/e.» 5 AAKOÓ MUNGÚ Mose guri báy, «Kuúng nee bariisér Israeliro geeraá muksíng i waarahhaak, hhartók tidá' yaaér Nili kara sláhh, masók a koón dakoge. 6 Ga/aaweek, aníng a sihhiít geerawógí ale gawaá daanduú tlaa/adár Horebu, kuúng daqaní tlaa/adá' ka sláhh, nee ma'aay niqo ti'iitiyá' as muu iwa wahi.» Mose adoodá' gari tleéhh dír geeraá bariisér Israeli wa alé. 7 Didaádá' Mose gari umií tsát gari bay «Masa» nee «Meriba» asma xoorór Israeli AAKOÓ MUNGÚ guna i qununú/ nee guna iiara'át i kaahiya', «Aqo tsuwa lóe, AAKOÓ MUNGÚ iqo tsuwa dinkwa nee aténe?» Slaqwarár nee múk Amaleki 8 Aluudae xoorór Amaleki iri slaqwarár eér amór múk Israeli baraá yaamaá Refidimu. 9 Mose Yoshua guri báy, «Tláw, hhawaate tsawaareek, ta slaqwarár eerá' amór xoorór Amaleki. Aníng matlo a tsa/ám gawaá ságw tlooma, nee hhartadár Mungú dakw'eene a koóm.» 10 Naagáy Yoshua adoodá' Mose ngwaa báy gari tleéhh, tari slaqwarár áy amór múk Amaleki. Mose nee Aroni nee Huri tari altsa/án gawaá ságw tlooma. 11 Naxés bar Mose dakós ngwa gáwtí tleés, xoorór Israeli in baaliín, bar ngwa aweeriís, xooroodár Amaleki in baaliín. 12 Ala dabaá Mose niri slaaqamiitiyé'. Aroni nee Huri tlaa/e ngiri leehhiyé', Mose giri al'iwiít, Aroni nee Huriwo dabaá Mose ngiri alee/iisiyé' gáwtí koomakoongo, umuú heewo bartós, dabaá Mose nari kwa/iyé' ay looa gar wa dát. 13 Yoshua xooroodár Amaleki gari hhaamiís. 14 AAKOÓ MUNGÚ Mose guri báy, «Kaangwí gooimeek baraá kitaábu, as kahhó' kuwa inslay. Slám dír Yoshuawo gawdeeseek ooaro adór xoorór Amaleki ngir fiíts baraá daanduú yaamuwo.» 15 Mose kitángw Mungú nguwa ilahhooárí haniisi guri tleéhh. Kitangwdá' guri umií tsaát, guri báy, «AAKOÓ MUNGÚ an Bendeérar'eé'.» 16 Iri oó', «Bendeérár AAKOÓ MUNGÚ gáwtí tleesaak. AAKOÓ MUNGÚ nee xoorór Amaleki i slaqwaaquná' qari sleémeero.» |
The Bible in Iraqw © Bible Society of Tanzania, 2004.
Bible Society of Tanzania