TI'INAANGW 16 - Biblía Axweesantá Hhohho' ar Mungú 2004

Muruú /aymár ta bay Maána nee xooyángw yaariír

¹ Xoorór Israeli sleémeero iri kumít aaii'ine, niri Elimúr wa tlayé' tay hardáh xaanxoó ta bay Sini. Diirí a tla/ángw tloomár Sinai nee Elimu, ay diirí slahhángw wák ngwaa faakiyé' iimír inooín niwa baraá yaamaá Misrír wa ti'iitiyé'.

² Xoorór Israeli sleémeero iri qununu/oó eér dír Mose nee Aroni baraá xaanxaydá' wa ale.

³ Ta kaahi, «A tsiní geeraawo bar ana qatlaán baraá Misri ar dákw AAKOÓ MUNGÚ bihhaá hutla'aá fu'unaay, nee muruú /aymaadá' kuri /ayaán gur'e kari dala/aamaán, ala kuungá' atén tina baraá xaanxaywí hubé' as mukwí sleémeero kuwa tsu/a' ar qwari.»

⁴ Aluuwo AAKOÓ MUNGÚ Mose guri báy, «Aníng mikaáte ngi gawaá doorí wa /aytiís, umuú baalaaro muu mikaátér /aymár looár wake bu'uut ngi burumburi, ar loohirihe aníng i iartá wa slaá', áx daber'eé' ngi oohiía laqaá aasla'áy.

⁵ Ala bál lahhooe bir muruú /aymár burumburiná' oo /aymár deelo tsare bu'uút ngu burumburiye'.»

⁶ Aluuwo Mose nee Aroni muu kuri báy, «Tsiindoowo a tsahhá' adór AAKOÓ MUNGÚ tar kudá' kuungá' naa duúx baraá yaamaá Misrír wa ale.

⁷ Matlo matlaatleero kuungá' xirfuú AAKOÓ MUNGÚ u aandá', asma inós una i qununu/é'. Atén a ín heemá tam tiwa i qununu/a'?»

⁸ Mose iri oó', «AAKOÓ MUNGÚ kuungá' nu fu'unáy haniis tsiindoowo, nee matlaatleero nun mikaáteérí haniis, gur'erhúng kari dal/aandá', asma inós qununu/ayhúng gwa axaás. Kawa xua' atén tiwa i qununu/a a múk adoomá? Ma qununu/aara' amooréní ale, amór AAKOÓ MUNGÚ nay qununu/aak.»

⁹ Mose Aroni guri báy, «Xooroosír Israeli ka beer, Burumburiité' dír geeraá AAKOÓ MUNGÚ, asma inós qununu/ayhúng gwaa axaás.»

¹⁰ Qoomár Aroni iwa axweesi dír dinku'uumadár múk Israeli, inooín tana qaytsiít amór xaanxáy ale, naxés xirfuú AAKOÓ MUNGÚ nina geehhooúy ar gawaá huunki.

¹¹ AAKOÓ MUNGÚ Mose guri báy,

¹² «Aníng qununu/oó múk Israeli ugwa axaás. Inooín ki beer, ‹Qoomár tsiindoowo fu'unaay in /agá', nee matlaatleero gur'e an dala/aandá' mikaáteero. Daqaní kuungá' kari tsahhá' adór aníng tar AAKOÓ MUNGÚ Munguúhúng.› »

¹³ Qoomár tsiindoowo naxés xooyángw qoo yaariír nina hardáh, didár xafay'ín i dirii'i gari dalaá/, matlaatleero naxés hara' xafay'ín guna harweér.

¹⁴ Qoomár hara' iwa huú', naxés baraá xaanxaydae gár adór mikaátér ninakw nee inslahh ina mét gawaá daanduú hhape.

¹⁵ Múk Israeli gaarí kawa ár, tina kilooín yaahamisiyé', i kaahiya', «Gaarí a milá?» Asma ngaa tsaahhi'iiká. Mose giri báy, «Gaarí an mikaáteedá' AAKOÓ MUNGÚ naa haniís as kawa /aga'.

¹⁶ AAKOÓ MUNGÚ gár naa hara'ayín a tí, ‹Umuú heewo muruú /aymaadá' i aleeslay /aymaro ngu sleesi, umuú heewo har qoomaydá' ta bay piíshi ngu dalaa/i as faarór múk do'ós.› »

¹⁷ Xoorór Israeli adoodá' gari tléhh, barakarka sleesaro guna urés, tooka guna niinawés.

¹⁸ Ala qoomár kawa qoomeemeés ar qoomaydá' ta bay piíshi heedaádá' gwa tlahhas gár gwaa i met i káhh, nee heedaádá' gwa niinawees gár gu wa /aaruur i káhh sleeme. Umuú heewo gár aa sleés a harqoomoó /aymaaro i aleeslay.

¹⁹ Mose giri báy, «Hee ló' muruú /aymasíng munguwa meetiís ay matlaatle.»

²⁰ Ala muu Mose gu iiárií qaasiiká. Bahh'ale muruú /aymaadá' nguna meetisiyé' ay matlaatle. Naxés matlaatleero muruú /aymaadá' aa diíx, nee nanaaga gwa eér. Mose iri buúhh amór múkí ale.

²¹ Nee umuúqo matlaatlér xawa muu muruú /aymaadá' guna sleemiís ar harqoomoó /aymaaro ta aleeslay. Ala iimi bira axwaanuúr muruú /aymaadá' in weeq.

²² Bál lahhooe muu hariímaadá' ta burumburarin kana sleés sagáwa tsár tsár, gár taa burumburín a piíshi tsiyáhh umuú heewo. Bariise sleémeero ar dinku'uumár Israeli iri hardát dír Mose, kuri kaangwí báy,

²³ Mose giri báy, «Adoosíng taa tlehhé' an hara'ayár AAKOÓ MUNGÚ. Asma matlo a baalár hhoohhoo' ar huungu/uusa, a deelór Sabaátór hhoohhoo' ar AAKOÓ MUNGÚ. Gimsé' tlawsé', muruú /aymár ta kwasasahhaasár wa sla'a' kwasasahhasaak, nee oo ta humrór wa sla'a' humimaak, nee oo aa meet amohhe'esaak ay matlo.»

²⁴ Adoodá' Mose aa oó' ngiri tleehhiyé', muruú /aymár aa meet kuri amohhe'eés ay looaytleerós. Matlaatleero kuwa artá áy, naxés gár gwa eer i káhh, aa dixiiká, tam naanaga gwa eeriiká.

²⁵ Aluuwo Mose giri báy, «Gimsé', muruú /aymasíng taa meetisé' /isá' /ayaak, asma laarí a Sabaátór AAKOÓ MUNGÚ. Laarí kuungá' u sleera'aaká amoosír tsee/aawo.

²⁶ Deelo lahhooe muruú /aymaasíng un sleemisá', ala bál faanqwe u sleera'aaká, asma bál faanqw a deelór Sabaáto.»

²⁷ Bál faanqwe muu bahh'ale muruú /aymaadá' kuna leelehhtuú áy, ala kwa ariiká.

²⁸ AAKOÓ MUNGÚ Mose guri báy, «Hara'ayduueé' nee daber'eene ki siaiinda' ay xaylá?

²⁹ Ga/aawaak, AAKOÓ MUNGÚ deelór Sabaátó ngina haniís. An gár bál lahhooe muruú /ayma kungusa tlahhás ay deelo tsár. Gimsé', umuú heewo i hungu/uusi dír do'ós i alé, hee miwa hi'iitanór áy bál faanqwe.»

³⁰ Naagáy bál faanqwe muu iri hungu/uús.

³¹ Xoorór Israeli umuú muruú /aymaadá' guri beér, «Maána». Bur ga/eér a adór /awaaka, nee bura tsáq a adór mukaatmoó niiná oo taa danúr sliík.

³² Mose muu guri báy, «Gár AAKOÓ MUNGÚ naa hara'ayín a tí: Maánár har qoomoó piíshír wák batsaak as xwaylarhúng ar aluúwaá hardáh muruú /aymaasíng nguwa aan, kwí naa kuungár /aymiís qoomár niwa ti'ité' baraá yaamaá Misrír wa ale.»

³³ Mose Aroni guri báy, «Sirwír wák taataahheek, maánár harqoomoó piíshír wák ka baraadií báts, daqaní ka dír geeraá AAKOÓ MUNGÚ i qás as iwa inslaslaangw tleehhit dír qartá hi'iita.»

³⁴ Aluuwo Aroni adoodá' Mose kwaa báy nee AAKOÓ MUNGÚ gari tleéhh, maánadá' gari qaás dír geeraá sandakmooduú alqado as kawa amohhe'eemisi.

³⁵ Xoorór Israeli muruú /aymaadár maána nguna /aa/ayiyé' ay kureeri mibeeri tsiyáhh, ay ngar wa hardihiyé' yaamuudá' hariimá' hotaawo digmuú yaamaá Kana'ani.

³⁶ Muruú /aymár maána oo qoomoó piíshi wak i qoná' nee wa'aá mibaangw awa xooslomoó ta bay eéfa.