TI'INAANGW 15 - Biblía Axweesantá Hhohho' ar Mungú 2004

Daa'ángw Mose

¹ Naagáy Mose nee xoorór Israeli AAKOÓ MUNGÚ kuri daa'angwí daá', «AAKOÓ MUNGÚ un sa daá', asma aa ló'wa xirfuút, faras nee mukdá' gi madiita gaa kwaáhh baraá tlawi.

² AAKOÓ MUNGÚ an /uuruueé' nee an daa'angw'eé'. Inós ina ba/amar'eé' tleehhiít. Inós an Munguúeé', aníng un diidi'iís. Inós an Munguú baabuúeé', aníng un xirfayeés.

³ AAKOÓ MUNGÚ an migusmoó slaqwara, umuuwós an AAKOÓ MUNGÚ.

⁴ Gaardaá Farao nee slaqwaruuseero gaa kwaáhh baraá tlawi. Geeraharuuseerós tidá' i ló'wa slai gaa /aytiís baraá tlawtá Shamu.

⁵ Inooín kaa guú/ nee ma'aydaá baraá ilo, Nina /eetiyé' baraá ilo adór tlaa/a.

⁶ Aá AAKOÓ MUNGÚ, dakók oo doó /iyáy xirif gwaa sláy ar /uuru. Aá AAKOÓ MUNGÚ, dakók oo doó /iyayhe wakuuseerén aga naasuúr.

⁷ Ar aleesleemuuwók kudá' yaariire waakuuseerók aga hhaamís. Inooín kiwa i búhh kiri daá/ adór hhaanslaá kaaharen.

⁸ Ar hiinsluú dungaawoge ma'aay nay burumburitiyé'. Gwaanduú ma'aay iri sihhiít adór koo/i, iloodaá baraá tlawi tiri haragwaaiyé'.

⁹ Wakusmo iri oó', ‹In aluú wa alkoóm ngiri ohiím, haasaánguueé' un qasmiís, ay dír haayir'eé' i waya'. Paángar'eé' an óh, inooín ngiri hhaamiís.›

¹⁰ Ala kuúng fur'aarók ana kwáhh, tlawi giri harakí/. Inooín niri /eetiyé' baraá ma'aá ur adór harsaási.

¹¹ Aá AAKOÓ MUNGÚ, Mungú adór kuúng baraá munguiiwo a gaalá? Baraá hhohhoarto oo xirfuú koóm adór kuúng a gaalá? Kudá' xirfuuwós ta ilaiwawa/i tlehhma'aá waa/oo/amo gi tlehhiít.

¹² Dakók oo doó /iyáy kuwa tlés, wakuuseerén kari guú/ nee yaamu.

¹³ Kuúng mukók oo taa ba/amís una geerahát ar sla'aarirók tidá' warqawaaká. Ina geerahát ar /uuruuwók ay didá' hhoohhoo' ar hotaawók.

¹⁴ Xoordu ngiwa axaasiyé' inooín niri daaraxiyé'. Kudá' baraá yaamaá Filistír wa hootá' naa daandeemo feehhamiitiyé'.

¹⁵ Múk urén oo Edomu aa amoqwaár, geeraharuusér Moabu ina daaráx. Muu sleémeero oo baraá Kana'anír hoót, gur'er'ín ma'aay ngaa dalaa/iyé'.

¹⁶ Dae nee hor/iro gaa eér, ar aleesleemuú dakoge inooín niri xaslmiitiyé' adór tlaa/ano. Aá AAKOÓ MUNGÚ, ay dír mukók i waaraahhi, ay dír mukók kudá' taa ba/amís i waaraahhi.

¹⁷ Aá AAKOÓ MUNGÚ, kuúng inooín in húp, kiri qás gawaá tloomadár aalirók, didá' taa tléhh tawa dír hotaawók. Aá AAKOÓ MUNGÚ, in húp ay didá' hhoohhoo' taa tléhh ar dabaawók.

¹⁸ AAKOÓ MUNGÚ in waawuti'ín ay alhhe'eesay wasle.»

Daa'ángw Miriamu

¹⁹ Qoomár farsuú Farao nee gaarduuwose nee mukdá' gaardaá madiita niwa baraá tláwtí dahiyé', AAKOÓ MUNGÚ ma'aá tlawi giri gawaaín i ki/ís. Ala xoorór Israeli baraá tla/ángw tlawto tana yaamaá kaahaár ar hi'iimiít.

²⁰ Naagáy aaruso'o Miriamu, hho'ór Aroni, oowi gari taatáhh. /Ameena sleémeero iri aluuwós wa eehariín, i ooway'ín koná', ta hara ni/ín.

²¹ Miriamu daa'aangw guri ót, «AAKOÓ MUNGÚ sa daa'aak, asma ina baalín ar xirif. Faras nee mukdá' gwaa i tsa/ani gaa kwaáhh baraá tlawi.»

Ma'aá qarqará'

²² Mose xooroodár Israeli gari geerahaár tawa geerií kumiiti dír tlawtá Shamúr wa ale. Inooín tari tláy ay xaanxoó Shuri, tari hi'iimiít deelo tám baraá xaanxáy wa ale, ma'aay ngaa slay'iiká.

²³ Qoomár tawa hardáh dír ta bay Mara, ma'aá didá' wahto kaa aleeslayká, asma i qarqariyá'. As adoorí didá' kay báy «Mara».

²⁴ Naagáy muu Mose guri i qununuú/, ta kaahi, «Gár ta wahaan a milá?»

²⁵ Inós iri /aá/ amór AAKOÓ MUNGÚ, AAKOÓ MUNGÚ guri xa'anoó i laqán, inós guri /aytiís baraá ma'aydá', ma'aay niri tsuuiyé'. Didae AAKOÓ MUNGÚ xoorór Israeli gana kaahirós i haniís nee hara'ayaro. Diirihe inós gina iiár.

²⁶ Giri báy, «Barnaxés afór AAKOÓ MUNGÚ Munguúhúng aga iiárií qasé' ar ilakaaharu, nee adór ganaa' kari tlehhé' dír geeraawose, nee hara'ayaarós kari iialooesé', nee kaahirós kari oté', daqaní anuú AAKOÓ MUNGÚ kuungá' nu tiqtírí huwaaká, tidá' naa huúw dír múk Misri. Asma aníng an AAKOÓ MUNGÚ kudá' kuungá' nu hungu/uumiís.»

²⁷ Inooín tari hardáh dír ta bay Elimu, didae kutloó mibaá nee tsár i deer, nee slaanslár mibeeri faanqw. Xafay'ín nguri tleehhiyé' dír afaá ma'aydá'.