TI'INAANGW 14 - Biblía Axweesantá Hhohho' ar Mungú 2004

Múk Israeli i tlawtá Shamúr waraahh

¹ Aluuwo AAKOÓ MUNGÚ Mose guri báy,

² «Múk Israeli ádbaweek, ta alií wayaai xafaay ku tleehhi geeraá Pi-hahiroti, tla/ángw gixsár Migdoli nee tlawi, geeraá Ba'al-sefoni, xafayhúng tleehhaak dír isaapoó tlawi.

³ Farao daanduú múk Israeliwo iri ooi, ‹In tawo hi'iimitiyá' baraá yaamuwo, inooín xaanxaay gaa ilaá/.›

⁴ Aníng muunuú Farao u gawdeés, inós niri eeharín aluuhúng wa ale. Farao nee slaqwaruuseerós aníng i xirfúr ayá', nee múk Misri gari xuu' adór aníng tar AAKOÓ MUNGÚ.» Naagáy múk Israeli adoodá' kari tleéhh.

⁵ Qoomár Farao, waawutmoó Misri, kuwa ádbáy adór múk Israeli ira tláy, Farao nee geeraharuuseero inslaway'ín iri warqáy, tari oó', «Ahaá, gaarí taa tleehhaán a mila ar múk Israeli kuwa geemawaán atén tiwa sagadiyuusiaaká malé alé?»

⁶ Gaárirós gari amohhe'eés, inós nee slaqwaruuseerose tari tláy.

⁷ Slamí gaardaá tsiire lahhoó' awa taa amohhe'eés girir tláy, nee gaardaá Misri sleémeero, nee geeraharuusér gaarduudá' gi sagesihhmiit.

⁸ AAKOÓ MUNGÚ muunuú Farao, waawutmoó Misri, guri gawdeés, inós múk Israeli guri aluú wa eehár, asma múk Israeli ina ti'iít ar pihh'uuma.

⁹ Múk Misri iri alaá múk Israelír wa eeharín, nee faras sleémeero nee gaarduuwo nee mukdá' gaardaá madiita nee slaqwaruuseerose. Inooín múk Israeli nguri aleeslayé' dír afaá tlawi, xafay'ín ngwa tleehhiyé' isaapoó Pi-hahiroti geeraá Ba'al-sefoni.

¹⁰ Qoomár Farao iwa tseewúy didií alé nee múk Misriro, múk Israeli gari ár, múk Israeli iri amór AAKOÓ MUNGÚ i /aa/amín ar daér yaariir.

¹¹ Mose nguri bayé', «Gár atén tisa dúx baraá yaamaá Misriro, tari qatlór awaán baraá xaanxaay, a as /aantu iwa kahhiía baraadaá yaamaá Misriro? Gaarí a milá naa atén i tléhh tiwa baraá yaamaá Misrír wa dúx?

¹² /Aymuuwí a kudá' naa kuúng bawániíke qoomár tawa baraá Misrír i diriaan, tawa kaahaan, ‹Atén ti meer múk Misri ku sagadiyusaán. Asma a tsiní múk Misri kuwa sagadiyusaan ta tawa qatlaana baraá xaanxaay.› »

¹³ Ala Mose muu guri báy, «Ma da'ayumiitaara'! Ló'wa sihhiité', nee ba/amár AAKOÓ MUNGÚ tidá' ni kuungií tleehhi laarí ka aandá'. Asma mukuú Misri ta ga/eera' laarí, u baloó aanda'aaká malé ale.

¹⁴ AAKOÓ MUNGÚ kuungá' nu aleslaaqw, kuungá' garhúng a tawo xasliita kilós.»

¹⁵ AAKOÓ MUNGÚ Mose guri báy, «Waáy, án mis i /aa/aamiín? Múk Israeli ádbaweek tawa geerií kumiiti.

¹⁶ Kuúng hhartók gáwtí tleeseek, ka looloqós gawaá tlawi, ka qasís, múk Israeli tlawi ngi tla/a waaraahhi ar baraá yaamaá kaahaar.

¹⁷ Qaytsiít, aníng munér múk Misri an gawdeés, inooín tindi aluuhúng wa dah, tundu wa eehari. Farao nee slaqwaruuseerós nee gaarduuwós nee mukdá' gaardaá madiita aníng i xirfúr ayá'.

¹⁸ Nee múk Misri aníng iri tsaahhiyá' adór aníng tar AAKOÓ MUNGÚ, qoomár Farao nee gaarduuwo nee mukdá' farsuú madiita aníng bira xirfúr ayé'.»

¹⁹ Naagáy malaykamoó Mungú kudá' aa giirin geeraá xoorór Israeli wa ale, iri tláy iri aluuín i kií/. Nee uhmooduú huunki iri quútl dír geeraaine, iri sihhiít aluuín i ale.

²⁰ Uhmoodá' iri sihhiít tla/ángw slaqwaruusér Misri nee xoorór Israeli. Uhmooduú huunki múk Misri guna giwís, ala múk Israeli xweeraawo guna i gwa/aát, gawaá adoorihe slaqwaruusér Misri múk Israeli gwa i tseewuuriiká xweera sleémeero.

²¹ Mose dakós guri looloqoós gawaá daanduú tlawi. AAKOÓ MUNGÚ tlawi gari tla/a tsaát ar fur'ár da/aá daahh xweera sleémeero, tlawi iri yaamaá kaahaar tleehhít, ma'aay niri tla/a tsatiitiyé'.

²² Xoorór Israeli iri dát baraá tla/ángw tlawi ar yaamaá kaahará', ma'aay niri koo/i tleehhitiyé' dir'ine dákw doó /iyáy nee oo doó basayhe.

²³ Múk Misri giri aluú wa alkón, tari dáh baraá tla/ángw tlawi, farsuú Farao sleémeero nee gaarduuwose, nee mukdá' gaardaá madiita.

²⁴ Nee qoomár ságw looaaro AAKOÓ MUNGÚ slaqwaruusér Misri gari i qaytsiít ar gawaá uhumooduú asla, nee oo huunki, slaqwaruusér Misri gari amoqwaareés.

²⁵ Ya'aá gaarduuín giri hhitín, gaardu nari hi'iimitiyé' ar tseegamis, múk Misri iri oó', «Gusé', a guwaán geeraá múk Israeli wa ale, asma AAKOÓ MUNGÚ i barti'ín wa slaaqw amoorén i ale.»

²⁶ AAKOÓ MUNGÚ Mose guri báy, «Dakók looloqooseek gawaá daanduú tlawi, as ma'aay niwa ki/iya' gawaá múk Misri, nee gawaá gaarduuín, nee gawaá mukdá' gaardaá madiít!»

²⁷ Mose dakós guri looloqoós gawaá daanduú tláwtí ale. Nee looa niwa tleér, ma'aá tlawi niri dinkwár i ki/iyé' ar /uuru. Múk Misri iri ta'aaín geeraá tlawtá wa ale, ala AAKOÓ MUNGÚ slaqwaruusér Misri gari hhaamiís baraá tla/ángw tlawi.

²⁸ Ma'aydá' niri ki/iyé', gaardu ngiri tuuntuukiyé', nee mukdá' gaardaá madiita, nee slaqwaruuse sleémeero ar Farao, tidá' múk Israeli gwaa aluú wa eehat, tlawi giri gú/, tam heé wák oo aa kotsqoot i kaahh.

²⁹ Ala múk Israeli ina hi'iimiít ar baraá yaamaá kaahaar baraá tla/ángw tlawto. Nee ma'aydá' niri koo/i tleehhitiyé' bihhaaín awa doó /iyáy nee awa doó basayhe.

³⁰ Adoorí an adór AAKOÓ MUNGÚ múk Israeli ngura ba/amís baalaadae dír múk Misriro. Múk Israeli tuaá slaqwaruusér Misri ngiri ariyé' afaá tláwtí ale.

³¹ Múk Israeli gadiyeédá' ur ar AAKOÓ MUNGÚ aa dír múk Misrírí tleéhh kari ár. Naagáy inooín AAKOÓ MUNGÚ nguri ilaiwawa/iyé' nguri haratlintii'iyé', nee sagadiyusmoowós Mosewo.