TI'INAANGW 13 - Biblía Axweesantá Hhohho' ar Mungú 2004

Na/aá baris kiwa paraatl as Mungú

¹ AAKOÓ MUNGÚ Mose guri báy,

² «Na/aá baris sleémeero paraatleek, asma na/aá baris sleémeero awa múk Israeli nee awa makaywo a kwe'eé'.»

Deelór ur ar mikaátér taa sluuftisiiká

³ Mose muu guri báy, «Baalaarí niwa ti'ité' baraá lawaali'iimár yaamaá Misrír wa ale, inslawaak, asma baalaarihe AAKOÓ MUNGÚ kuungá' nuna duúx ar dakós oo /uuruú koóm. Gimsé' baalár adór tihe, mikaátér taa sluuftís ma /ayaara'.

⁴ Laarí slahhaangwí ta bay Abibu niwa ti'iít kuungá' an tleera' baraá yaamaá Misrír wa ale.

⁵ Bál barnaxés AAKOÓ MUNGÚ kuungá' naa hardahaás baraá yaamaá múk Kana'ani, nee awa Hiti, nee awa Amori, nee awa Hifi, nee awa Yebusi, ar adoodá' ngira al'axweés dír baabi'iihúng, yaamaá diihhooár ilwa nee dane ngiwa kuungá' i haniisi. Baalaarí niwa ti'ité' baraá lawaali'iimaro ka insleerá' umuúqo kurko.

⁶ Baalaadá' binda xeér mikaátér taa sluuftisiiká an /agá' deelo faanqw, bál faanqw an baalaadá' deelór ur kawa tlehha' as AAKOÓ MUNGÚ.

⁷ Mikaátér ta sluuftisiiká an /agá' deelo faanqw, ala mikaátér taa sluuftís nee gadaádá' kar sluuftimamisi miwa baloó deeruút baraá ayahunge.

⁸ Na/iihúng ki beera', ‹Adoorí an tlehhitaán tawa inslaslángw muruuwí AAKOÓ MUNGÚ naa atén i tleéhh qoomár niwa ti'imiitaan baraá yaamaá Misriro.›

⁹ Baalaasíng kuungá' tunduwa duúx baraá yaamaá Misriro ar /uuruú dakós an inslasleerá' adór mulkír gawaá dákwí dirii', laqaá ar gawaá gitsee/ií dirii', as kahhó' a sagaqwada'aaká hara'ayaarír AAKOÓ MUNGUHE.

¹⁰ Baalaarí harmagahhaak qoomár bira xeér umuúqo kurko.»

Adór na/aá baris kiwa hariím

¹¹ «Bál bar AAKOÓ MUNGÚ na hardahaás baraá yaamaá Kana'ani adór ngira al'axweés dír baabi'iihúng i ale, ngiwa kuungá' i haniisi,

¹² Na/aá daaqaay sleémeero awa baris paraatlaak as AAKOÓ MUNGÚ, nee yaqaambe sleémeero ar baris ar makaá ta de'en.

¹³ Ala yaqaambuú baris oo daqwaay un waa'alát ar gwaanda. Bur waa'alatká, un gás ar kuwa isa geeqeer. Umuú na/oó baris oo garma un waa'alát sleeme.

¹⁴ Barnaxes balookaaro na/iihúng naa yaahasiyé', ‹Gaarí gídaabárós a milá?› ki beera', ‹AAKOÓ MUNGÚ atén tina baraá yaamaá Misrír wa tuú/, yaamaá lawaali'iima, ar dákw /uuruú koóm.

¹⁵ Asma qoomaadae Farao ina sagagawdeés, iri sií' atén tiwa geemay, as adoorí AAKOÓ MUNGÚ na/aá baris awa muu nee awa makaywo baraá yaamaá Misriro gina tsuú/. Gawaá adoorihe atén ilahhooár muruú ta tsu/i an hanmisaán dír AAKOÓ MUNGÚ, umuúqo gár baris ar yaqaamba, ala daaqayrén oo baris un waa'alhaamaán.›

¹⁶ Tlehhmuusíng iri adór mulkír gawaá dakók tleehhiit, laqaá ar gawaá gitsee/a, ar ti inslawtamis adór atén AAKOÓ MUNGÚ tira baraá yaamaá Misrír wa tuú/ ar dákw /uuruú koóm.»

Uhmoó huunki nee oo asla

¹⁷ Qoomár Farao múk Israeli nguwa geemáy, Mungú gaa slaiiká ngiwa waarahhaasi ar baraá yaamaá Filisti, loohidá' tam ka tseewe, asma Mungú ina oó', «Mukwí bar nee slaqwaruuse taa doogiyé' i daba' tsatitiyá', ki/imaá Misri ngiri fitliná'.»

¹⁸ As adoorí Mungú inooín gina geerahaár ar loohír harweeramo ar baraá xaanxaay, tidá' aa amór tlawtá Shamúr xu'. Xoorór Israeli iri tleér yaamaá Misrír wa ale taa amohhe'eesiyé' slaqwaraaro.

¹⁹ Mose fadaá Yosefu giri huúw sleeme, adoodá' Yosefu ngira alqadín qoomár iwa slafi, asma ina oó', «Mungú kuungá' nu qo tu/tá áy, ala faduueé' ar ti'iitaak.»

²⁰ Xooroodá' iri Sukotír wa tleér, xafaay guri tléhh dirka ta bay Etamu, alhhe'eesoó xaanxaydá'.

²¹ AAKOÓ MUNGÚ gina geeraharahaár tlaatla/aango ar uhmoó huunki, as loohi ngiwa laqaaqan, nee xweeraawo gina geerahaár ar uhmoó asla iwa gwa/aati, as kahhó' aai iwa ya/ana' tlaatla/aangw nee xweeraawo.

²² Uhmooduú huunki aa quutliiká baloó alé tlaatla/aango, nee uhmooduú asla aa baloó surukiiká xweeraawo dír geeraá múk Israeliwo.