TI'INAANGW 12 - Biblía Axweesantá Hhohho' ar Mungú 2004

Pasaáka

¹ AAKOÓ MUNGÚ Mose nee Aroni giri i axweés qoomár tawa baraá yaamaá Misrirí kahhi, iri oó',

² «Slahhaangwí daqaní a slahhángw geera baraá slahheeraá kurko dirhunge.

³ Múk Israeli sleémeero i axweesaak ku beera', slahhaangwí bál bar mibaangw umuúqo heé doó kooma deelmoó bee/i ngu slay, umuúqo afkú do'.

⁴ Bar do'koowo muu ku niiná, deelmoó bee/i ku faakiiká /aymaro, ta haragwaai nee inslawmoó tseéw, daqaní deelmoó bee/i oo wák ku slay ar harqoomoó muu. Faarór muu ka tleehhi ar harqoomoó deelmoó bee/i.

⁵ Deelmoohúng kwisíng oo bee/i masók i xaslxaanslír konká, gwaanduú kurkú wák un sleerá' laqaá gurta.

⁶ Deelmoosíng un amohhe'eemamisá' ay bál slahhaangwí bar mibaá nee tsiyáhh. Baalaasinge xooro sleémeero ar Israeli deeláysíng gun tsú/ tsiindoowo.

⁷ Inooín tseereedá' ka bahh taataahhi, ka sliki ar nahhtá badu tsaraawo ar afkú do' nee maandár do'daádá' deelmodá' kuwa /ayi.

⁸ Fu'unaydá' ki /ayi xweeraadaá kilae, masók kaa daá/, ki /ayi dinkwa nee mikaátér ta sluuftisiiká nee naanuú manákw.

⁹ Fu'unaydá' mikiwa /aáy /eetlo ale, laqaá mikiwa humín, ala a da/a kilós, iimír ságwaá tleemu ay ya'aawós nee xooslár guruuwo.

¹⁰ Slám matawa fu'uni meetiís ay matlaatle, ala bira qo mét ay matlaatle ka kwahhi baraá asla, ngi fak.

¹¹ Bar /ayiindá' adoorí an tlehhá': An siinootiindá', ya/ataahúng in dahasá' baraá yaií ale, hhadoohúng ngin otá' baraá dabe. Fu'unaydá' kiri /agá' ar gaanslaay, gaa a Pasaákuú AAKOÓ MUNGÚ.

¹² «Asma aníng an waaraáhh ar baraá yaamaá Misri xweeraadae, aníng na/aá baris sleémeero ngiri tsuú/ baraá yaamaá Misriro, oo hee tam oo makiito'o, nee munguidaá Misri sleémeero ngiri sakwasleemuút. Aníng a AAKOÓ MUNGÚ.

¹³ Tseereedá' an layár maraá kuungá' ti diria' ngi laqaam, aníng bar tseere aga sa ár kuungá' nun waawaraáhh as tsu/uta nuwa sleeraaká, qoomár bar tsu/uút baraá yaamaá Misrír wa ale.

¹⁴ Baalaarí a baalár baloó gunqarutaaká dirhunge. Kuungá' deelór ur an tlehhitá' dír AAKOÓ MUNGÚ ay qari sleémeero. Gaarí an dákw baloó warqawaaká.»

Deelór ur ar mikaatér taa sluuftisiiká

¹⁵ «Mikaátér taa sluuftisiiká an /agá' deelo faanqw. Bál geeraawo muruudá' taa sluuftís sleémeero un duxá' baraá marayhunge, asma umuúqo heé gár taa sluuftís gaa /aay iimír bál geraá wá ale ay bál faanqw, heé adoosíng a tlatlahhasa baraá xoorór Israeliwo.

¹⁶ Bál geera nee bál faanqwe an burumburitá' asma a deelór hhoohhoo' dirhunge, gadiyér tleehharut i káhh baraá deeloosinge. Ala aqo as adoodá' /ayma meemu nguwa ya/aandaaká, tí kilós naa tleehhaak.

¹⁷ Baalaadár mikaátér taa sluuftisiiká an insleerá', asma baalaasír kilae aníng slawoohúng ina duúx baraá yaamaá Misrír wa ale, as adoorí baalaasíng inslaslawaak tam qari sleémeero ar hi'iita. Dakwí in kumamiit ay kureeraá kureér.

¹⁸ Slahhángw geera bál bar mibaá nee tsiyáhh, iimír tsiindoó wa tleemu, mukaatmoó taa sluuftisiiká un /agá', ay tsiindaá bál slahhaangw bar mibeeri tsár nee wak.

¹⁹ Baraá deeloosíng faanqwe gár sluuftimis miwa deerút baraá marayhunge, asma umuúqo heé gár taa sluuftís gaa /aay, heesíng aqo kun tlatlahhaas dír múk Israeliwo, a gaarooká inós bar hoomo laqaá bar heé Israeli.

²⁰ Umuúqo dír ti dir'a'a gár taa sluuftís lo' ma kwatiitara' /aymaro, ala aqo har mikaátér taa sluuftisiiká.»

Pasaákuú geera

²¹ Mose bariisér múk Israeli gari ateét, giri báy, «Tlawsé', umuúqo heewo dirhunge deelmoó gwaanda oo bu'uút múk do'ose ngu taataahhi, ngu gaasi deelór ur ar Pasaákuú wa alé.

²² Loo/ór xa'anoodá' ta bay hisoópo leehhaak, ka tikís ar tseerér baraá qwaree/amoówí dirii', ka slík gawaá maandár do' nee gawaá nahhtá do' badu tsaraawo. Hee tumu wák miwa tsee/ií ti'iít xweeraadae ay matlaatle.

²³ Asma AAKOÓ MUNGÚ in waaraahh as na/aá baris awa múk Misri ngiwa tsu/i. Ala AAKOÓ MUNGÚ barnaxes tseerér taa slikín gawaá maandár do' nee gawaá nahhtá do' badu tsaraawo gaa ár, daqaní AAKOÓ MUNGÚ maraydá' gin waawaaraahh, tsu/utusmoodá' gu geemayká baraá marayhúngí ale.

²⁴ Kuungá' nee na/iihunge gaarí ka otá', asma a dákw baloó warqawaaká ay kureér.

²⁵ Qoomár bar aga daté' baraá yaamuudá' AAKOÓ MUNGÚ naa dirhúng i al'axweés, ta kumitá' adoorí tlehhtuuwo.

²⁶ Barnaxés na/iihúng naa yaahasiyé' iwa kaahiya', ‹Gaarí ta tlehhita' gídaabárós a milá?›

²⁷ Daqaní ki beera', ‹Gaarí a deelmooduú bee/i oo taa ilahhooár wa gaás as Pasaákuú AAKOÓ MUNGÚ, asma inós maraá múk Israeli gina waawaaraáhh baraá Misriro, qoomár múk Misri nguwa tsuú/ ala atén taa tsu/iiká.› » Múk Israeli sage gay xupu'uús, Mungú nguri sluufisiyé'.

²⁸ Múk Israeli tari tláy, adoodá' AAKOÓ MUNGÚ Mose nee Aroni ngira hara'ayín ngiri tleehhiyé'.

Slahhtá mibaangw ar qatlór na/aá baris

²⁹ Xweeraá dakiingo AAKOÓ MUNGÚ na/aá baris sleémeero awa múk Misri gina tsuú/, iimír na/oó baris oo Farao wa tleemu, kuduú gawaá kitángw waawuti'iima, ay na/oó baris oo heé baraá tseegamórí dirií', nee na/aá baris sleémeero awa makaá ta de'en.

³⁰ Farao nee geeraharuuse nee múk Misri sleémeero niri /akumiitiyé' xweeraá ale, tsuunqusmoó yaariír iri deeruút baraá Misri sleémeero, asma doó tuua iwa kahh i kaahh.

³¹ Aluuwo Farao Mose nee Aroniwo giri ateét xweeraadae, giri báy, «Tlawsé', ti'iité' baraá tla/ángw muk'eene, kuungá' nee múk Israeliwo, AAKOÓ Munguúhúng sluufmisuú awaak, adoodá' kara oé'.

³² Bee/angwhúng nee hikwaahunge ar tlawaak, ala ti aleefiriinde', aluurén i hhooaye'.»

³³ Xoorór Israeli kari harakeemiís nee múk Misri as niwa ti'iitiya' ar gaanslaay, asma i kaahiya', «Atén sleémeero a qwaaraán kaangwihe.»

³⁴ Múk Israeli puuruú ta mikaátér taa sluuftisiikár tleehhi nguri baraá tlakwi'ii'ín i qaasiyé', ngiri gagaariyé' ar gawaá sum'i, nee búklaaydá' kwi tlehhiiti sleeme, nguri ar tlayé'.

³⁵ Adoodá' Mose nga báy ngiri tleehhiyé', múk Misri nguri firiné' xooslaá muqslír peésaaro nee ar sahaábuwo nee tlabaawo.

³⁶ AAKOÓ MUNGÚ múk Misri guri gur'e wananaeés as kahhó' múk Israeli kuwa gurií ba/i, nee umuúqo gár múk Israeli aa firini kari haniís, xooslaá yaariir awa múk Misri kiri ar tláy.

Xoorór Israeli iwa baraá Misrír wa ti'ít

³⁷ Xoorór Israeli aai giri iimu/uún dirká ta bay Ramesesír wa alé ay Sukoti. Faarór hhawaate kilooín a kume tsiire lahhoó'.

³⁸ Boo/oó yaariír oo múk hatlá' sleeme iri haragwaá' baraá loohuuseedár Israeli, tari alkoné' nee daqooroó yaariír oo muruú ququmát nee hikwaaine.

³⁹ Muruú /aymár taa amohhe'eés i kaahh qoomár tawa tlatlay asma kararaslaay, ala mikaáte ngina tleehhiyé' ar puuruúdá' taa sluuftisiiká.

⁴⁰ Xoorór Israeli baraá yaamaá Misriro kureeri ngaa hót a tsiire tsiyáhh nee mibeeri tám.

⁴¹ Baalaadár kilá' ar alhhe'eesáy ar kurkú tsiire tsiyáhh nee mibeeri tám xoorór AAKOÓ MUNGÚ ina ti'ít baraá yaamaá Misrír wa ale.

⁴² Xweeraá baalaadá' a xweeraá AAKOÓ MUNGÚ iwa dalaá' as múk Israeli nguwa baraá yaamaá Misrír wa duuxi. As adoorí i hariín múk Israeli xweeraá dal'ame awa baalaadá' ngiwa inslaslaya' as AAKOÓ MUNGÚ nguwa ilaiwawa/iya', inooín nee xwaylar'ín sleémeero.

Digir wakeetíngw deelór Pasaáka kawa hariím

⁴³ AAKOÓ MUNGÚ Mose nee Aroni giri báy, «Dabér Pasaáka a tí: Hoomo muruú /aymár Pasaáka munguwa /aáy lo'.

⁴⁴ Ala lawaalmoó taa tlaáxw bar kwa al/uútl gu /aay.

⁴⁵ Ala aausmo laqaá heé ta bu'un oo do'ók wa gadiyuús, munguwa /aáy.

⁴⁶ Deelmoodá' taa Pasaákuú wa gaás dír kuwa /ayi a baraá do'odá' kwi gaás, fu'unaywós mikiwa tsee/ií ar ti'iít, tam fartós ar wák lo' makawa geeqáy.

⁴⁷ Xoorór Israeli sleémeero baalaarí ngi inslasleer.

⁴⁸ Barnaxes hoomoó baraá tla/angwhúng hoót deelór Pasaáka gaa waatlakweés ngiwa inslaslay, hhawaataá do'ós sleémeero ki al/utli ala ale. Daqaní deelór ur ar Pasaáka ngi tleehhi, asma inós aqo adór yaamuloousmo. Ala heé taa al/utliiká munguwa kwatiít /aymaaro.

⁴⁹ Dabeerí i hariín dír yaamuloouusér Israeliro nee dír /eetuseedá' baraá tla/angwhúng hoota.»

⁵⁰ Múk Israeli tari tláy, adoodá' AAKOÓ MUNGÚ Mose nee Aroni ngira hara'ayín ngiri tleehhiyé'.

⁵¹ Baalaarí an tidá' AAKOÓ MUNGÚ múk Israeli nguwa duúx baraá yaamaá Misrír wa ale ar bohhu.