TI'INAANGW 11 - Biblía Axweesantá Hhohho' ar Mungú 2004

Mose i qatlór na/aá barsuú alki/iit

¹ AAKOÓ MUNGÚ Mose guri báy, «Slahhtá wák aa met ar ni huuw dír Farao, nee dír múk Misri, aluudae kuungá' nuri geemáy as tawa tleera' yaamuukae. Slám qoomár burna geemáy nun guus tawa tleera'.

² Kuúng múk Israeli i axweeseek, umuú hhawaatuuwo nee umuú /ameeniro inslawmoowós ngu firin xoslaá peésa nee awa sahaábuwo.»

³ AAKOÓ MUNGÚ múk Misri guri gur'e wananaeés as múk Israeli nguwa gurií ba/iya'. Slám Mose iri ló'wa iia tleerúy baraá yaamaá Misriro dír geeraharuuse nee dír muko.

⁴ Mose iri oó', «AAKOÓ MUNGÚ i kaahi, ‹Qoomár xweeraá dakiingo aníng a waaraáhh ar baraá tla/ángw yaamaá Misri.

⁵ Umuúqo na/oó baris baraá yaamaá Misriro in gwaa', iimír na/oó baris oo Farao wa tleemu kudá' aa iwiit gawaá kitángw waawuti'iima, ay na/oó baris oo lawaalo'oodá' alaá tlaa/ár xooslíngwí dirii', nee na/aá baris sleémeero awa makaydá' ta de'en.

⁶ Baalaadae tsuunqusmoó yaariír ni ti'iit baraá yaamaá Misri sleémeero, tsuunqumsmoó aa baloó deerutiiká, slám i baloó deerutiiká sleeme.

⁷ Ala baraá múk Israeliwo tam seeoó gi i hhuheliím i kaahh, laqaá makay'ín, as kahhó' kuungá' kawa tsahha' adór aníng múk Israeli ngura paraátl dír múk Misriro.› »

⁸ Mose iri male oó', «Slám geeraharuuseerók tí sleémeero in i xupú' iri beer, ‹Tláw, kuúng nee mukdá' sleémeero u eeharahara!› Aluudae aníng niri tláw.» Naagáy Mose iri tláy dír Farao wa ale, aa qaroó daa/atúy buhhtaawo.

⁹ AAKOÓ MUNGÚ Mose guri báy, «Farao kuúng u baloó iiárií qaasiiká, as tlehhmi'iieé' kudaá waa/oo/amo niwa tlahhiya' baraá yaamaá Misriro.»

¹⁰ Mose nee Aroni tlehhmi'iikaá waa/oo/amo ngiri tleehhiyé' dír geeraá Farao wa alé, ala AAKOÓ MUNGÚ muunuú Farao guri gawdeés, nee inós múk Israeli gwa geemayká iwa tlay.