TI'INAANGW 10 - Biblía Axweesantá Hhohho' ar Mungú 2004

Slahhtá dakaát ar ingigi

¹ AAKOÓ MUNGÚ Mose guri báy, «Tláw amór Farao, asma aníng inós nee geeraharuuseero iga mune gawdeés, as kahhó' án layuuká' ngiwa baraá tla/angw'ín wa laqaam.

² As kahhó' kuungá' na/iihúng kiwa kaangwí beera', nee na/aá nangwhúng, adór aníng múk Misri ngura niqís nee layuudá' naa baraá tla/angw'ín wa tleéhh, as kahhó' kawa xua' adór aníng tar AAKOÓ MUNGÚ.»

³ Naagáy Mose nee Aroni tari amór Farao káy, kuri báy, «AAKOÓ MUNGÚ, Munguú múk Ebrania, i kaahi, ‹Ay xaylá tawa siaiin tiwa niinawes dír geeraaeé'? Muk'eé' geemaweek iwa tlay, as aníng iwa sluufmisuú aya'.

⁴ Barnaxes kuúng aga sí' muk'eé' geemawto, matlo aníng ingigi ngi tleés baraá yaamuuwók.

⁵ Inós yaamu gin tuuntúk tam hee yaamu giri harslaaqaat arto, nee inós muruudá' tluwoó tlaa/e aa meetiís, nee xaaiidaá baraá qamu taa dahsé' as kuungá', giri xús.

⁶ Maraywók nee awa geeraharuuseero nee maraá múk Misri sleémeero ingigi gi hatsís. Slaqsaywós baabi'iiwók ngwa baloó ari'iiká iimír niwa deerutiyé' baraá daanduú yaamuwo.› » Aluuwo Mose iri warqáy, iri ti'iít dír Faraowo.

⁷ Geeraharuuse Farao guri beér, «Ay xaylá heewí i tsaaxweeli tleehhimaamiiti direne? Mukós kwisíng geemaweek i tlay, AAKOÓ MUNGÚ Munguúín ngu sluufmisuú aye'. Ay hamí aga tsahhkáhe adór yaamaá Misri nira qwaariyé'.»

⁸ Mose nee Aroni kiri ki/ís amór Farao, inós giri báy, «Tlawsé', AAKOÓ MUNGÚ, Munguúhúng, sluufmisuú awaak. Ala hám mukqaá ín heemá ta huba'?»

⁹ Mose guri mu/aywaáts, «Atén an tlawaán nee masoombarene, nee bariiseero, nee daaqayrene, nee dasuurene. Hikwa nee bee/ango in huwaán, as AAKOÓ MUNGÚ Munguúrén kuwa deelór úr i tleehhaan.»

¹⁰ Farao inooín giri báy, «AAKOÓ MUNGÚ ta dinkwa nee kuungá', barnaxes aníng kuungá' naa qo tsuwa geemáw nee tlaawayhunge nee na/iihunge. Ala kuungá' gár taa qoomesé' gawaá sagerhunge ka hhooeeká.

¹¹ Aasla'áy, kuungaásaá hhawaate kiloohúng AAKOÓ MUNGÚ na sluufmisuú awaak, asma an gár taa slaé'.» Inooín kiri guús dír geeraá Faraowo.

¹² Aluuwo AAKOÓ MUNGÚ Mose guri báy, «Dakók tleeseek gawaá yaamaá Misrírí alé, as kahhó' ingigi niwa hardat baraá Misri, nee xaai sleémeero awa baraá yaamuuín, kudá' taa meetiís nee tluwayduú tlaa/e ngiwa /ak.»

¹³ Naagáy Mose hhartós gari tleés gawaá yaamaá Misrírí ale, nee AAKOÓ MUNGÚ fur'a ngiri da/aáw wa kwaáhh, iri fukuukú' tlaatla/aangw nee xweeraawo. Looa niwa tleér fur'aadá' da/aáw daahh ingigi ngiri húp.

¹⁴ Iingigtadá' niri ti'ít baraá yaamaá Misri sleémeerowo, yaamaá Misri sleémeero giri al'iwít. Nee iingigtadá' ka ló'wa ur, ar adór tidá' aa baloó ti'itká, nee inqo baloó ti'itká sleeme.

¹⁵ Asma yaamu sleémeero gina tuuntúk, nee yaamu niri giwiyé'. Balaangw sleémeero guna /ák, nee mamaá xaaiwo, kudá' taa meetiís nee tluwayduú tlaa/e. Tam gitsiimír aa baraá yaamií met i káhh, laqaá gawaá xa'ano nee baraá qamuuwo baraá yaamaá Misri sleémeerowo.

¹⁶ Aluuwo Farao Mose nee Aroni giri gaanslár ateét giri báy, «AAKOÓ MUNGÚ Munguúhúng ugwa tlakweemáy tleéhh nee kuungae.

¹⁷ Aníng kuungá' nu harhheehhe'eés, gurtlawaaré' waiika' kilose, AAKOÓ MUNGÚ Munguúhúng gwa'ararí ngi hingeesi dir'eene.»

¹⁸ Mose iri tláy dír Faraowo, AAKOÓ MUNGÚ guri firín.

¹⁹ AAKOÓ MUNGÚ fur'aadá' gari warqeés tari fur'ár ur ar /uwaá daahh, iingigtadá' gari húp ay baraá tlawtá Shamu, tam ingigimoó wák gwaa meetiská baraá yaamaá Misri sleémeerowo.

²⁰ Ala AAKOÓ MUNGÚ muunuú Farao guri gawdeés, múk Israeli guri geemayká.

Slahhtá gwaleél ar ma/ami

²¹ Aluuwo AAKOÓ MUNGÚ Mose guri báy, «Dakók gawaá doorí tleeseek, as kahhó' ma/ami yaamaá Misri ngiwa ot, ma/amír aa qipit tidá' hee iwa tararahhamiiti.»

²² Mose dakós guri gawaá doorí tleés, ma/amír aa qipit yaamaá Misri giri ót har deelo tame.

²³ Heé kuqá' gwaa ar, laqaá heé suruuka gaa aleeslay baraá deeloorí tame i kaahh. Ala amór yaamuudaá múk Israeli i hooti gwa/aateema i dayá'.

²⁴ Aluuwo Farao Mose guri ateét, guri báy, «Tlawsé', AAKOÓ MUNGÚ Munguúhúng sluufmisuú awaak, nee na/iihunge ti alkoonde'. Ala bee/angwhúng nee hikwaahunge geexawaare'.»

²⁵ Ala Mose iri oó', «Makayrén awa de'eengw aqo in ar tlawaán as kiwa ilahhooár wa tsu/aan, nee ilahhooár da/a/aango dír AAKOÓ MUNGÚ, Munguúrén.

²⁶ Makayrén awa de'eengw aqo in ar tlawaán, tam fuquno u geexawanaaká. Asma bar AAKOÓ MUNGÚ Munguúrén sluufmisuú awaán, an tsawdimaán baraá tla/angw'ín wa ale. Atén hamí ar ta ilahhooár wa haniisaan dír AAKOÓ MUNGÚ a xuanaaká ay dír nay amoodií hardahaan.»

²⁷ Ala AAKOÓ MUNGÚ muunuú Farao guri gawdeés, inós iri sií' múk Israeli geemawto.

²⁸ Farao Mose guri báy, «Quútl dír geeraaeene! Mindi malé amor'eé' ki/aar! Bál binda amor'eé' kí/, kuúng a gwá'!»

²⁹ Mose iri oó', «Gár ló' aga ó', aníng ni baloó amoorók i ki/aaká.»