TI'INAANGW 1 - Biblía Axweesantá Hhohho' ar Mungú 2004

Múk Israeli ku baraá Misrír wa slahh'eemiis

¹ Gaarí an umér xoorór Israeli tidá' nee Yakobo taa yaamaá Misrír i koné', umuú heewo nee múk do'ós.

² Reubeni nee Simeon, nee Laáwi, nee Yuda,

³ nee Isakari, nee Sebuluni, nee Benyamini,

⁴ nee Dani, nee Naftali, nee Gadi nee Asheri.

⁵ Sleémeero awa taa doó Yakobo wa laqwaál dinkwaaro a mibeeri faanqw. Yosefu i qaroó baraá yaamaá Misrír i dirii'.

⁶ Aluuwo Yosefu iri gwaá', nee hhaeewós sleémeero niri qatliyé', nee qartidá' sleémeero iri qátl.

⁷ Ala xoorór Israeli iri ló'wa laqwál, iri doogiín, tari tlaáhh, inooín tari xoorór /uuruú koom, yaamuudá' ngiri hatsisiyé'.

⁸ Aluuwo waawutmoó /abén kuri qaás yaamaá Misriro oo Yosefu gu xuaaká.

⁹ Mukós guri báy, «Qaytsité' xoorór Israeli ka ló'wa ur, slám i /uuruú koón ta atene.

¹⁰ Gimsé' i fuqurángw i tleehhaán mindiwa dooginé', slám bar slaqwara naa ti'ít inooín tan bartá wakuuseerén áy, atén tiri i slaaqw niri /akumiitiyá' baraá yaamuurene.»

¹¹ Gawaá adoorihe inooín múk Israeli kuri sagesihhtuuseérí qaás as kiwa slahh'eemisi nee kiwa /uurutimiisi baraá gadiyér tawa bihhií noongo'ootiiká. Inooín Farao nguri gixsadaá Pitomu nee Ramesesírí tleehhiyé' awa ta murií babaatsi.

¹² Ala adoodá' inooín múk Israeli ngura slehh'eemisiyé' an adoodá' nira ak tlahhiyé', nee niri tsiyayaaxatiyé'. Múk Misri iri ló'wa da'ayumiiít as xoorór Israeli.

¹³ Naagáy múk Misri xoorór Israeli gari ló'wa slahh'eemiís ar gadiyér gawít ta adoodár geeraawo.

¹⁴ Slafingw'ín iri tlií/ as gadiyér gawit ar ki haniís, ar busla nee ar matofaáli tlehhit, nee gadiyeé sleémeero ar qamu. Baraá gadiyeduuká' sleémeerowo múk Israeli kuna /uurutís baraá gadiyeé ar gurtleemu wasle.

¹⁵ Aluuwo waawutmoó Misri /ameenadá' ta bay Shifra nee Pua, tidá' /ameenár múk Ebraniár asla a'aw, giri fuqnií qaás, gari báy,

¹⁶ «Qoomár bar /ameenár múk Ebraniár asla aeerá', barnaxes a na/oó garma kuna xwaylúy gaasaak, ala bar na/oó dasi mu gaasara'.»

¹⁷ Ala /ameenadá' /ameenár asla a'aw a /ameenár Munguú ilaiwawaa/, inooín adoodá' waawutmoó Misri ngaa báy ngaa tleehhi'iiká, asma na/aá daaqaay ngaa tsu/i'iiká.

¹⁸ Naagáy waawutmoó Misri /ameenadá' /ameenár asla a'aw gari ateét gari yaahamiís, «Ahaá waáy gár adoorí kasa tlehhé', na/aá daaqaay kiwa meeré' tsu/utaaro?»

¹⁹ /Ameenadá' /ameenár asla a'aw guri beér, «Asma /ameenár Ebrania a adoodár /ameenár Misrirooká. Asma inooín nin gaanslár laqwaliná' /ameenár aslaeemu gi ar slasleeraaká.»

²⁰ Naagáy Mungú /ameenadá' /ameenár asla a'aw gari hhooeemáy tleéhh, nee múk Ebrania iri ló'wa doogín, nee /uuru kuri ló'wa sláy.

²¹ Nee /ameenadá' /ameenár asla a'aw as tawa /ameenár Munguú ilaiwawa/, Mungú giri xwaylár i haniís.

²² Aluuwo Farao mukós sleémeero guri ádbáy iwa kaahi, «Umuúqo na/oó garma oo tindi laqwaali nee /ameenír múk Ebrania /aytisaak baraá yaaér Nili, ala bar a na/oó dasi mu /aytisaara'.»