SEKARIA 8 - Biblía Axweesantá Hhohho' ar Mungú 2004

Yerusalemu a malé gixsár wayda

¹ Axweesantá AAKOÓ MUNGÚ Aleesleemusmo ngiri axaás i kat,

² «Aníng Siyoni a ló'wa slaá', án da/i iga eér as inós, niri ló'wa xaraásl amór wakuuseerós. Anuú AAKOÓ MUNGÚ Aleesleemusmo tí ngina oó'.

³ Aníng a wayaá' Siyoni, án niri hotaá áw tla/ángw gixsár Yerusalemu, nee gixsár Yerusalemu kay bay, ‹Gixsár inkihhím.› nee tloomár AAKOÓ MUNGÚ Aleesleemusmo kari bay, ‹Tloomár hhoohhoo'.›

⁴ Anuú AAKOÓ MUNGÚ Aleesleemusmo a kah, ‹Bariisér aa diimadiin nee amama'aá naa diimaadin'i nin hootiyá' malé alé baraá loohír Yerusalemu wa ale, umuú heewo i qadiisaywós kón dakose, asma tawa ló'wa diimaadín.

⁵ Nee lohdaá gixsa ni hatsiyá' daaqaay nee dasuuwo, ta baraadá' wa neet.› »

⁶ AAKOÓ MUNGÚ Aleesleemusmo i kaahi, «Ala tí tam ka gawide dír ilaá mukwí aa meeti, dír ilaeene sleeme ka gáwde? AAKOÓ MUNGÚ Aleesleemusmo tí gan kah.

⁷ Anuú AAKOÓ MUNGÚ Aleesleemusmo tí ngina oó'. Ga/aawaak, án muk'eé' u ba/amís iimír da/aáwaá tleemu ay /uwa.

⁸ Aníng inooín ngiri huúw, tawa hotaá ay tla/ángw Yerusalemu, inooín tari muk'eé', aníng tari Munguúín, ngiri geerahaár ar inkihhimu nee hotaá ganaa'á'.»

⁹ AAKOÓ MUNGÚ Aleesleemusmo i kaahi, «Kuungá' mune hhe'eesé', kuungásingá' laarí axweesantí ngi axamiisá' tidá' aaruuse aa alki/ít qoomár iihhafirír Doó' AAKOÓ MUNGÚ Aleesleemusmo kawa qamin.

¹⁰ Dír qoomaadá' ira xeeriiká heé gadiyeérose taa buú' i kaahh nee tam gadiyér makiito'o ar taa buú' i káhh, sleeme amohhooa i káhh dír heé daraaha, laqaá oo ti'imiita, asma wakuuse. Asma aníng umuú heewo una hara'awís nee mulqumoowós.

¹¹ Ala hám daxta aníng mukwí aa meet u adór mukduú geera laqaaká. Anuú AAKOÓ MUNGÚ tí ngina oó'.

¹² Asma didae wayda i deeruut, sabiíbu /ar'i giri slaslaax, yaamu sleeme bu'uungw'ín ngu duuxiyá' nee tluwaay iri tluuw, aníng mukwí aa meet un muruuwí sleémeero i haniís as nguwa aaliya'.

¹³ Nee adoodá' kuungá' tara adór múk lo'ór koóm tleehhité' baraá xoorduuwo, aá múk doó Yuda nee doó Israeli, adoorí an adór nur ba/amis, kuungá' tay tsuuqa tleehhitá', ma da'ayumitaara' ala kuungá' na pihhé'.»

¹⁴ Asma AAKOÓ MUNGÚ Aleesleemusmo i kaahi, «Adoodá' geera kuungá' nura gár tlaákw i slaá' tleehhamooro qoomár baabi'iihúng iwa buhhtisiyé', nee muner'eé' ki/ima giri sí'.

¹⁵ «Hám daxta mada'ayumitaara' baraá de'emuukae asma aníng Yerusalemu aga gár hhoó i slaá' tleehhamooro, nee doó Yuda sleeme.

¹⁶ Adoorí na tleehhaak: Umuú heewo nee inslaawmoowós looeema ki axweesi, kwasleemadaá looeema na tleehhaak awa wayda ngu huwá' baraá marayhunge.

¹⁷ Laqaá heehúng gár tlaakw mingiwa aldakuút baraá muunaáwose daanduú inslaawmoowose laqaá lo'ór lama ma sla'aara', asma tí sleémeero an tidá' ni ahhiit. Anuú AAKOÓ MUNGÚ tí ngina oó'.»

¹⁸ Slám axweesantá AAKOÓ MUNGÚ Aleesleemusmo ngiri axaás, i kat,

¹⁹ «Gwaawitór slahhángw tsiyáhh, nee ar slahhángw kooán, nee ar slahhángw faanqw, nee slahhángw mibaangw, a deelór tawa naagisi qwala/ nee bar/uuwo, nee a deelór ur dír múk doó Yudawo, gawaá adoorihe looeema nee wayda sla'aak.»

²⁰ AAKOÓ MUNGÚ Aleesleemusmo ina oó', «Aluuwo múk xoordu nee yaamuloouusér gixsadaá yaariir ni hardihiyá' gixsár Yerusalemu.

²¹ Yaamulouusér gixsarí in daqeér amór gixsarqá' ta kaahi, ‹Gimsé', a tlawaán ar gaanslaay AAKOÓ MUNGÚ Aleesleemusmo u harhheehhe'eesaán as tiwa tsuuqi, nee AAKOÓ MUNGÚ Aleesleemusmo kuwa leelehhitaan. Aníng niri tláw.›

²² Múk yaariír nee xoordaá /uureemaá koomá' ni hardihiyá' ay Yerusalemu as anuú AAKOÓ MUNGÚ Aleesleemusmo iwa leelehhiya' nee iwa harhheehhe'eesiya' as ngiwa gurtlaw.

²³ Qoomaadae múk mibaangw, oo umuúqo tsifrír xoorduuwo pasltá inqwaarír heé Yahudi ngin oohiyá', tari ooi, ‹Góh nee kuúng ti alkoomaán, asma aga axasaán adór Mungú ir dinkwa nee kuungá'.› Anuú AAKOÓ MUNGÚ tí ngiwa oó'.»