SEKARIA 6 - Biblía Axweesantá Hhohho' ar Mungú 2004

Iigu'utuú daanduú gaardaá tsiyáhh

¹ Aníng niri malé gáwtí qaytsiít, naxés gaardaá tsiyáhh nina ti'iitiyé' baraá tla/ángw tlom'aá tsár wa ale, tlom'iidá' a tlom'aá muqslár sirda/aten.

² Gaárír geera kan uuruxún nee farsuú da/atén, nee gaárír tsár gár ga uruxuum farsuú bó/.

³ Gaárír tám farsuú /awák gan uuruxún, nee gaárír tsiyáhh a farsuú bahayén gan uuruxún.

⁴ Aluuwo malaykamoodá' nee án axweesá' una yaahaás, nguri báw, «Gaarduuká' faras i kon awa milá, aakooeé'?»

⁵ Malaykamoodá' aníng iri báy, «Gaarduuká' tsiyáhh a badu tsiyáhh awa yaamu nina ti'iitiyé', alaá niwa iwiwitiyé' dír geeraá AAKOÓ MUNGÚ yaamu sleémeero wa alé.»

⁶ Gaáridá' ta uuruxun nee farsuú bó/ ina yaamaá /iikú xú', nee tidá' farsuú /awák i uuruxun ina yaamaá /uwa xú', nee ar ta uuruxun nee farsuú bahayén ina yaamaá baskú xú'.

⁷ Qoomár farsuú hatlá' niwa ti'iít yaamu sleémeero ngina slaiyé' ngiwa tsee/aarina', malaykamo gina báy, «Tlawsé', yaamu sleémeero tsee/aarimaak.» Aluuwo niri tlayé' as yaamu sleémeero ngiwa tsee/aarina'.

⁸ Naxés aníng iri ateét, iri báy, «Ga/aaweek, farsuudá' aa yaamaá bihhaá /iikú xuu', buhhtaá Aakoó Mungú ngaa tsaeesiyé' amór yaamaá /iikó.»

Yoshua kuwa gadiyeédí haniís

⁹ Axweesantá AAKOÓ MUNGÚ ana axaás i kat,

¹⁰ «Qeemuusíng mukdá' taa loohatís naa ya/aáw ar Heldai nee Tobia nee Yedaya ilaooheek. Laarír kilá' tláw ay amór doó Yosia garmoó Sefania, do'odá' inooín naa kayé' niwa yaamaá Babuloni dahhiya'.

¹¹ Peésaasíng nee sahaábu ilaooheek, ki slamángw ar tléhh, ku dahás gawaá ságw kaahamusmoó úr oo Mungú oo ta bay Yoshua, garmoó Yehosadaki.

¹² Daqaní ku beer, AAKOÓ MUNGÚ Aleesleemusmo i kaahi, ‹Ga/aaweek heewí umuuwós an kudá' ta bay, Halmi, inós dirós tidá' i dirii'i iri slu/ubiibín nee Doó AAKOÓ MUNGÚ gu tleehh.

¹³ Inós an heedá' Doó AAKOÓ MUNGÚ gu tleéhh, ilaiwa/amér waawuti'iima ga sláy, iri iwiit gawaá kitángw waawuti'iima, iri waawuti'ín, nee bihhaawose kaahamusmoó Mungú i deér, nee tla/ángw inooínaaká' tsare xu'utír wayda i deer.

¹⁴ Nee slam'iidá' kiri baats baraá doó AAKOÓ MUNGÚ, as tawa inslaslángw Heldai nee Tobia nee Yedaya nee Yosia garmoó Sefania.›

¹⁵ «Múk sawén ni hardah as niwa alee/isoó tlehhmuú Doó Mungú ay.» Kuungá' kari tsahhá' adór AAKOÓ MUNGÚ Aleesleemusmo ira amorhúng i ya/aáw. Muruuwí i tleehharuut bar kuungá' aga ilakaaharesé' afór AAKOÓ MUNGÚ, Munguúhúng kawa iialooeemisa'.