SEKARIA 5 - Biblía Axweesantá Hhohho' ar Mungú 2004

Iigu'utuú daanduú kitaábuú gáwtá wa hi'imiít

¹ Aníng niri malé qaytsiít naxés kitaábuú gáwtá wa hi'imiít una ár.

² Malaykamoodá' aníng iri yaahaás, «Gár taa aán a milá?» Aníng nguri mu/aywaáts, nguri báw, «Kitaábuú gáwtá wa hi'imiít una ár, tlenaangós a miíta gwaleél nee uroó bihhe a miíta tsiyáhh nee tlaqi.»

³ Aluuwo iri báy, «Gár taa baraá kitaábuuwí gooín a lo'oodá' yaamu sleémeero gi /aay. Bihhaá wák awa kitaábuudae gár taa gooín a adór fisuuse kar qwaareesi iimír hamí ar harqoomoó lo'oodá', bihhaá tsare gár taa gooín a adór mukduú lo'ór lama ga /aa/aáy kur qwaareesi iimír hamí ar harqoomoó lo'oodá'.»

⁴ AAKOÓ MUNGÚ Aleesleemusmo i kaahi, «Aníng lo'oorí an ya/aáw iri dát baraá maraá fisuuse nee baraá maraá mukdá' lo'ór lama ngi /aa/ayá', lo'oorí maray'ín giri eér, giri /ák tam waqas nee tla/uuwo.»

Iigu'utuú daanduú /ameenír aa iwit baraá lakwaanti

⁵ Aluuwo malaykamoodá' nee aníng axweesá' iri báy, «Qaytsiít ilaawoge daxta gár naa ti'it a milá?»

⁶ Aníng nguri báw, «Gaa a milá?» Inós iri oó', «Gaarí a lakwaantidá' tlakweemaá yaamu sleémeero gi koom.»

⁷ Ga/aaweek, lakwaantidá' i tuntukumár koón ar taa tleéhh ar harsaási, lakwaantidá' kawa kiís naxés /ameeni aa baraá guruú lakwaantírí iwít.

⁸ Malaykamoodá' án iri báy, «/Ameenirí gár i laqaqaan a tlakweema.» Inós /ameenidá' gari tliwií/ baraá guruú lakwaanti, afkú lakwaanti guri tuuntuúk ar tuntukumaadár harsaási.

⁹ Naagáy niwa gáwtí qaytsiít, naxés /ameena tsár ana ár naa ti'ít i amor'eé' keér, inooín bambaao ginar tlatleér, hhampe'eeri'ín a adór kuqaá halee/amo, lakwaantidá' ngiri gáwtí ar tlayé' ay tla/ángw doori.

¹⁰ Malaykamoodá nee aníng axweesá' ngur baw, «Lakwaanti amór kar kay a amá?»

¹¹ Aníng iri báy, «Kan huuw ay yaamaá Shinari, kari dó'owí tleehh. Bál bar do' aa hhooáy, lakwaanti kari baraadií baats.»