SEKARIA 3 - Biblía Axweesantá Hhohho' ar Mungú 2004

Iigu'utuú daanduú Yoshua kaahamusmoó úr

¹ Aluuwo baraá iigu'utuueene Yoshua kaahamusmoó úr oo Mungú nguri ár, aa sihhiít geeraá malaykamoó AAKOÓ MUNGÚ, Neetlaangw sleeme aa sihhiít bartá dakós oo doó /iyáy as nguwa sakwasleemuuti.

² Malaykamooduú AAKOÓ MUNGÚ, Neetlaangw guri báy, «Aá Neétlaangw, AAKOÓ MUNGÚ kudá' gixsár Yerusalemu gaa tsawaar kuúng u iigahhaati. Asma heewí a adór hhartá tinda baraá asltá wa hhaákw.»

³ Naxés Yoshua aa sihhiít dír geeraá malaykamo, tlabaá slasla/aren ngaa dahaás.

⁴ Malaykamo mukdá' geeraawós wa sihhimiít guri báy, «Tlabaawós kwisingá' slasla/aren duuxaak.» Aluuwo Yoshua guri báy, «Ga/aaweek, án tlakweemaawók iga hingeés, án kuúng u tsiitiís ar tlabaá ló'wa hhohho'.»

⁵ Malaykamoodá' iri oó', «Slamángw hhoohhoó' ti dahase'.» Inooín kuri slamángw hhoohhoó' i dahaás, kuri malé tlabií dahaás, malaykamoó AAKOÓ MUNGÚ aa dír bihhaawós i sihhiít.

⁶ Aluuwo malaykamoó AAKOÓ MUNGÚ Yoshua guri gurbuú' guri báy,

⁷ «AAKOÓ MUNGÚ Aleesleemusmo i kaahi, ‹Kuúng barnaxés loohir'eé' aga eehát, nee hara'ayar'eé' bara ót, daqaní dooeé' u sawaawuti'iín nee un de'eén, aníng pa/aangw ngu haniís oo iwa i tseewuur tla/ángw kudá' geeraaeé' wa sihhimiita'a.

⁸ Yoshúa, kaahamusmoó úr oo Mungú, iia qaaseek, kuúng nee kaahamuuseedár hatlá' algadiyuusá', asma mukwí a layár ganaa', asma ga/aaweek, aníng sagadiyusmooeé' kudá' ta bay, Halmi ngu huúw.

⁹ Tlaa/anoowí naa qaás geeraá Yoshua ga/aawaak, inós gitsee/e ngi kon faanqw, aníng gooi an tleéhh gawaawósí ale, án tlakweemaá yaamuuká' in hingeés looár wák ale.

¹⁰ Umuú heewo dirhunge inslaawmoowós gun iigu'uus iwa hardihi dír gamuú xa'anoowós oo sabiíbu nee oo /aantsihe as wayda kuwa saqwalaala/i nee amohhooa.› Anuú AAKOÓ MUNGÚ tí ngina oó'.»