SEKARIA 2 - Biblía Axweesantá Hhohho' ar Mungú 2004

Iigu'utuú daanduú himuú qoomeemes

¹ Aluuwo baraá iigu'utuú hatlae hee ngway ár i himuú kón baraá dakose oo qoomeemes.

² Naagáy nguri yaahaás, «Amór ta keer?» Inós án iri báy, «An gixsár Yerusalemúr qomeesár áw as uroó bihheerós nguwa slaw nee tlenaangose.»

³ Ga/aaweek malaykamoodá' nee án aga axweesaan naxés i amór malaykamoó hatlá' káy, oo amoorós káw.

⁴ Inós guri báy, «Ta'aaím masoomoodá' ku beer, ‹Yerusalemu kan al'iwiit nee muu, adór gixsár koo/ír koomaaká as muu kuwa yaariír, nee makaá ta de'en awa baraawós i diriiá'.

⁵ Aníng an adór koo/ír asla tleehhiít badu sleémeero, niri baraá gixsaadá' wa hoót ar xirfuueé'.› Anuú AAKOÓ MUNGÚ tí ngina oó'.»

Mukdá' taa loohatís kwaa ateét tawa ki/i ayaaín

⁶ AAKOÓ MUNGÚ i kaahi, «Gimsé', guwaaré' amór yaamaá /iikú wa alé, amoodá' aníng kuungá' nuy tlatlahhaás badu sleémeero.

⁷ Gaanslutaré' kuungásingá' sleémeero yaamaá Babulonír hotaatimá', ta'aaimé' ay Siyoni.»

⁸ AAKOÓ MUNGÚ Aleesleemusmo, kudá' iga ya/aaw as xirfuuwós daanduú xoorduudá' kuungá' na loohatisi'i i kaahi, «Heé kuungá' naa kwatiit, a maamár iltaeé' gana kwatiít.

⁹ «Ga/aawaak, dakw'eé' un mamukuús gawaaín i alé, inooín tay lawaalér kudá' nga sagadiyuusiye'.» Kuungá' kay tsahhá' adór aníng AAKOÓ MUNGÚ Aleesleemusmo ira ya/aáw.

¹⁰ AAKOÓ MUNGÚ i kaahi, «Kiíng gixsár Siyoni, daá', qwalalaá/, asma ga/aawaak aníng ni hardáh nee kuungá' niri alhootaán.

¹¹ «Nee de'emadae xoordaá yaariir i haragwaaiyá' dír anuú AAKOÓ MUNGÚ, inooín tari muk'eé, aníng nee inooín tari alhootaán.» Kuungá' kay tsahhá' adór aníng tira ya/aáw amorhúng nee AAKOÓ MUNGÚ Aleesleemusmo.

¹² Nee AAKOÓ MUNGÚ xoorór Yuda gari aal, baraá yaamuudá' hhoohhoó' wa alé, inós Yerusalemu gay malé tsawaar.

¹³ Kuungaásingaá muu sleémeero, dír geeraá AAKOÓ MUNGÚ i xaslitaak, asma inós naa dirós tidá' hhoohhoó' wa tláy.