SEKARIA 14 - Biblía Axweesantá Hhohho' ar Mungú 2004

Yerusalemu nee xoordaá hatlá'

¹ Ga/aaweek, deelór AAKOÓ MUNGÚ naa tseewuúr ar muruuhúng kudá' taa hayóh kuwa qasmiisi dír ilaahúng wa alé.

² Asma xoordu sleémeero in burumbuúr as niwa slaqwarár aya' amór gixsár Yerusalemu, nee gixsa kari hayoh, nee maraywo, nee /ameena kari ohín ar /uuru, nee tlaqtá múk gixsa kanar tláy baraá lawaali'iima, ala mukdá' aa meet baraá gixsa ku ar tlayká.

³ Diirí an dír AAKOÓ MUNGÚ niwa ti'iiti, inós nee xoorduuká' tiri muxiyá' adór /iisí ir slaqwaaqun.

⁴ Nee baalaadár kilae AAKOÓ MUNGÚ in sihhiit gawaá tloomár seituúni tidár Yerusalemuro bihhaá da/ií dirii', nee tloomár seituúni iri tla/aa feehhít, tlapár yaariir niri baraá tla/angwdá' wa ti'ít, iimír da/aáw wa tleemu ay /uwa, tlaqtá tloomaadá' ar wák iri /íkwí tleér nee ar hatlá iri báskwí tleér.

⁵ Kuungá' a ta'aaindá' ar baraá xatstidár tla/eeraá tlom'aá tsár awa AAKOÓ MUNGÚ, a ta'aaindá' adór baabi'iihúng nira kunseelír wa ta'aainé' qoomár waawutmoó yaamaá Yuda tawa Usia, aluuwo AAKOÓ MUNGÚ, Munguúhúng niri hardah dinkwa nee mukós kudá' hhohhó'.

⁶ Baalaadae tsaaqwa i káhh, laqaá tam daqtamó.

⁷ Baalaadae tlaatla/aangw in kumamiit, AAKOÓ MUNGÚ kilós tí ga xuu'. Tlaatla/aangw i kaahh, tam qoomár tsiindoowo sleeme gwa/aateema in kumamitiyá'.

⁸ Baalaadae ma'aá slafiingw ni baraá gixsár Yerusalemúr wa ti'iitiyá', tlaqtaín in bihhaá tlawtá da/aáw xú', tlaqtaín ar hatlá' in wá/ amór tlawtá /uwa. Ma'ayká' aqo nin kumaamitiyá' wa/amiingo age nee buhaareewo.

⁹ AAKOÓ MUNGÚ tari waawutmo gawaá daanduú yaamu sleémeero, baalaadae AAKOÓ MUNGÚ a wak, nee umuuwós a wak.

¹⁰ Yaamu sleémeero kiri warqees tay adór xatsa iimír Gebár wa tleemu ay Rimoni bihhaá Yerusalemu awa basa. Ala gixsár Yerusalemu iri gáwtí mét dirós tidá' i diri', iimír Afkú Benyamini wa tleemu ay dír afkudá' taa geerií tleéhh, ay dír afkudá' koo/i niwa warqeér slám iimír /Aampár Hananelír wa tleemu ay didá' sabiíbuú doó waawutmo kuwa tsoo/aa/iti.

¹¹ Muu iri baraá gixsár Yerusalemúr wa hoot, asma lo'ór daadáw i káhh, muu iri hoot ar saxareema.

¹² Nee xoordu sleémeero kudá' naa slaqwarár aye' amór gixsár Yerusalemu AAKOÓ MUNGÚ gin muux ar tiqtír tlakw, slaqooín niri tsutsatsuiyá' sihhtanoórí ale, nee ilaaín niri tsutsatsuiyá' baraá xoxi'ii'ín i ale nee tsifreeri'ín niri tsutsatsuiyá' baraá afer'ín i ale.

¹³ Baalaadae AAKOÓ MUNGÚ mukdá' gu daér yaariír ar áy, umuúqo heewo kuqá' gu i haratláy.

¹⁴ Múk Yuda tari slaaqw as Yerusalemu kawa xun nee daqaari'iimár yaariir ar xoordu sleémeero kari burumbuur sahaábu nee peesaaro nee tlabaawo.

¹⁵ Nee tiqtír tlákw ar adór tidá' faras gun alhú' nee wayshamaawo nee angamíaro, nee daqwaayeero, nee makaay sleémeero awa baraá xafayduú wakuuse.

¹⁶ Aluuwo heé aa meet baraá xoordu sleémeero kudá' naa slaqwi'i nee múk Yerusalemu, niri hardah as waawutmo AAKOÓ MUNGÚ Aleesleemusmo nguwa sluufmisuú ay, nee deelór ur ar Isleeri ngiwa harmagagaahhi.

¹⁷ Slám malé alé umuúqo heewo baraá xoordu sleémeero baraaká yaamuwo, oo Yerusalemúr kawaaká as waawutmo AAKOÓ MUNGÚ Aleesleemusmo nguwa sluufmisuú ay, tluwaay ayaaine i tluwiiká.

¹⁸ Barnaxes múk Misri i daqaqayká baraá deelór ur ar Isleeriwo, AAKOÓ MUNGÚ Aleesleemusmo gin tiqtír tlákwár slaahh, tidá' xoorduudá' daqaqawa'aaká ngir slahhi.

¹⁹ Adoorí an adoodá' múk Misri kur muxi nee xoordu sleémeero, awa daqaqawa'aaká baraá deelór ur ar Isleeriwo.

²⁰ Baalaadae gawaá mitingaroó farsuuwo /aymi'iiká' kin gooín, i kaahiya', «Kaa hhoohhoeés as AAKOÓ MUNGÚ.» Hutli'idaá baraá doó AAKOÓ MUNGÚ tay adór slooqi'idaá gawaá kitangwduú ilahhooa.

²¹ Umuúqo hutlaywo baraá Yerusalemuro, nee baraá Yudawo kuri hhohhoees as AAKOÓ MUNGÚ Aleesleemusmo, gawaá adoorihe, heedaádá' ilahhooár muruú ta tsu/i ga hanmiís niri hardah, hutli'iidá' giri taataahh giri fu'uunaá ilahhooár muruú ta tsú/ír humín. Qoomaadae heé halaanu'uumár tleéhh baraá Doó AAKOÓ MUNGÚ Aleesleemusmo wa alé i kaahh.