SEKARIA 13 - Biblía Axweesantá Hhohho' ar Mungú 2004

¹ «Baalaadár kilae múk doó Daudi nee yaamuloouusér Yerusalemu kin kutltá ma'aáy gweer ar tlakweema nee ar slasla/aremaá umuu adooro gi hamaatl.»

² AAKOÓ MUNGÚ aleesleemusmo i kaahi, «Baalaadár kilae aníng slaqsi'iidaá munguaá hatlá' in amór saáwí kwaáhh baraá yaamuwo, baraá inslawoó muko niri gunqaruutiyá', slám aaruusér lama an guús baraá yaamuwo nee qeeruú tlaakwe.

³ Barnaxes heé wák ti adór aarusmo tlehhiit, baabuúwós nee aayoorós burngwa ariyé' ngun baya', ‹Kuúng a gaasa, asma lama ana axwés ar umuú AAKOÓ MUNGÚ.› Nee hamtidár kilá' iwa aaririn xwayliiteérós gun mút ar tsataay iri gwaa'.

⁴ Baalaadár kilae umuúqo aarusmoowo iigu'utuwós gun murér wa ar, tam hiyaydá' se'éngw koóm nguri mayá' dahamisuwo as muu mukuwa malé al/agín.

⁵ Ala umuú aarusmoowo in ooi, ‹Aníng a aarusmoowooká baloó ale, aníng a dooslusmo, yaamu ina aál iimír masoombi'iimar'eé' wa ale.›

⁶ Barnaxes kwaa báy, ‹Xáy inkahhi'iisingaá gawaá dabaawók awa milá?› Inós iri ooi, ‹A inkahha'aá naa dír doó mulqumooeé' wa sláw.› »

Hara'ayár de'eemuusér Mungú kawa tsu/i

⁷ AAKOÓ MUNGÚ Aleesleemusmo i kaahi, «Tláw kiíng paánga, gawaá daanduú de'eemusmooeé', kudá' aluueé' nga haar, de'eemusmo slahheek as kahhó' bee/aangw iwa diyaa/ati, aníng niri warqáw amór mukdá' liitlakwén.

⁸ Daqooroó tsár kuri amór saáw i kwaahh baraá yaamu sleémeero, inooín niri qatliyá', ala daqtá tám iri mét baraakí alé.

⁹ Aníng daqtadár tám ngiri waarahhaás ar baraá asla, aníng in kwahhuút ngiri hhohhoeés adór peésa kar kwahhuumaamiti, aníng i iiár adór sahaábu kur iiara'ari. Umuueé' nguri ateetiyá', án ngiri axaás, aníng niri oo', ‹Mukwí an kwe'eé'› Inooín niri ooiya' ‹AAKOÓ MUNGÚ an Munguúrén.› Anuú AAKOÓ MUNGÚ tí ngina oó'.»