SEKARIA 12 - Biblía Axweesantá Hhohho' ar Mungú 2004

Yerusalemu ka tuu/

¹ Kaangwí an geehhoeemaá axweesantá AAKOÓ MUNGÚ daanduú Israeli. Tí an tidá' AAKOÓ MUNGÚ kudá' doori ga hhaaf, nee iihhafirír yaamu ga qaas nee qeeruú hee gwaa baraawós i tleehh.

² I kaahi, «Ga/aaweek aníng Yerusalemu an adór xooslomoó difaáír oonitimis tleéhh dír muu sleémeero oo gaa harweeri. Nee gixsár Yerusalemu kan i haratláy tam gixsadaá Yuda sleeme.

³ Baalaadae aníng gixsár Yerusalemu aa tlaa/ár iiloo' tleéhh dír muu sleémeero, umuúqo heé ga iiara tin kilós mutaaúy, nee xoordaá daanduú yaamu sleémeero gixsár Yerusalemu gin i haratlayá'.»

⁴ AAKOÓ MUNGÚ i kaahi, «Baalaadae aníng umuúqo faraásiro an dae tsaát, nee heedá' gaa i tsa/an un slarhhamúw, farsuú múk xoordaá hatlá' un taampúw, ala múk Yuda un harmagaáhh xuumaro.

⁵ Mukdá' urén oo Yuda tari baraá muner'ínií ooi, ‹Yaamuloouusér Yerusalemu /uuru gwaa sleér dír AAKOÓ MUNGÚ Munguúín, kuduú Aleesleemusmo wa ale.›

⁶ «Baalaadae aníng geeraharuusér múk Yuda an adór hutloó asltá koóm oo baraá tla/ángw migír tleéhh, nee adór gufuú asla oo baraá tla/ángw qafo, inooín muu sleémeero oo gaa harweer ngun qwaareesiyá'. Qoomaadae múk Yerusalemu tan hoot baraá gixsar'ín wa alé ar saxareema.

⁷ «Anuú AAKOÓ MUNGÚ múk Yuda un geerií ba/amis, as kahhó' múk doó Daudi nee yaamuloouusér Yerusalemu mitiwa xirfayeemisiyé' ta múk hatlá' oo Yudawo.

⁸ Baalaadae anuú AAKOÓ MUNGÚ yaamuloouusér Yerusalemu an xuúm nee muk daqetlákw baraá tla/angw'ine tay adór Daudi, nee xwaylár Daudi tay geeraharuusér múk Yuda adór malaykamoó AAKOÓ MUNGÚ nee adór Mungú inósuú kilá'.

⁹ Baalaadár kilae aníng xoordu sleémeero kudá' haratlatlaawá' amór Yerusalemu in leeleéhh as ngiwa hhaamiis.

¹⁰ «Aníng múk doó Daudi nee yaamuloouusér Yerusalemu i qeeruú i haniís oo firo nee oo gurtleemu, gawaá adoorihe, qoomár kudá' naa mutiyé' burngwa i qaytsitiyé', inooín nguri satsuunqumisiyá', adór hee na/aywós oo kilós ngur santsuunqumisi, inooín nguri sa/a/amná' adór heé na/aywós oo baris ngur alee/aa/amaamin.

¹¹ Baalaadár kilae múk Yerusalemu iri ló'wa tsuunqumiis adór Hadad-rimoni ira baraá xatsaá Megidór wa tsuunqumiís.

¹² Yaamu ni tsuunqumisiyá' umuú guruú do'o kilooín, múk doó Daudi hhawaate barti'ín, /ameena barti'ín, múk guruú doó Natani hhawaate barti'ín, /ameena barti'ín.

¹³ Múk guruú doó Laáwi hhawaate barti'ín, /ameena barti'ín, múk guruú doó Shimei hhawaate barti'ín /ameena barti'ín.

¹⁴ Tlahh'iidá' naa meetiye' sleémeero ta tsuunqumisi, umuúqo tlahhaywo hhawaate barti'ín, nee /ameena barti'ín.»