SEKARIA 11 - Biblía Axweesantá Hhohho' ar Mungú 2004

Hu'uumaá múk /uureemaá koóm

¹ Aá Lebanoni, afér do'ók gweereek as asla sahhtaarók ngiwa /ak.

² Kuungaá xaa'aá sunobaári tsuunqumisé' asma sahhta aa hú' asma xaaiidá' xirfayen naa hhiturutiyé', kuungaá xaa'aá ta/eewér Bashani, tsuunqumisé', asma gartá /uuruú koom aa hhaán,

³ Tsuunqusmoó de'eemuuse iiárií qaasaak, asma xirfuuín kwa hhitín, afór /orootlór diraangw iiárií qaasaak, darmuú yaaér Yordani kwaa hhitín.

De'eemuuse tsár

⁴ AAKOÓ MUNGÚ, Munguúeé' i kaahi, «Ti de'eemusmo tlehh oo bee/ángw ta tsu/tár ay.

⁵ Mukdá' bee/angwdá' gwaa tlaaxw guna tsuú/ sleeme kwaa muxiiká, nee mukdá' gwaa weeriis i kaahi, ‹AAKOÓ MUNGÚ i xirfuuti, asma aga daqaari'iitaán.› Nee de'eemusmoodá' bee/aangós gwaa gurtlayká.

⁶ Aníng yaamuloouusér yaamuuká' a baloó gurtlawaaká, umuú heewo un máw baraá dabaá heewós nee baraá dabaá de'eemusmoowós, nee baraá dabaá waawutmoowós, inooín yaamu ngiri qwaareesiyá' slám aníng heé ni tuu/ i kaahh baraá dabaaine. Anuú AAKOÓ MUNGÚ tí ngina oó'.»

⁷ Aníng niri de'eemusmoó bee/angwdá' ta tsu/tár ay tleehhiít daanduú mukdá' gu tlaxuúm wa alé, hhadaá tsár ngiri taataáhh, ar wák a «gurtleemu» nee ar tsár a «wakleelu'uuma» aníng niri bee/ángw de'éngw áw.

⁸ Aníng de'eemuusér tám ana tsuú/ baraá slahhángw wákí ale, asma aga slaaqaát as inooín, nee inooín sleeme án iga aahhiyé'.

⁹ An qoomár niwa oó', «Aníng kuungá' nu malé de'emaaká, oo gwaá' i gwaai, oo hhaám i hhan, kudá' naa meetiye' ti kilooín saki/iye'.»

¹⁰ Hharte'eé' tidá' ta bay gurtleemu ngiri taataáhh, ngiri geeqáw, asma alqador'eé' tidá' naa alqadiím dír muu sleémeero aga geeqáw.

¹¹ Kari geeqáy baalaadár kilae, halaanuuseedár bee/aangw amor'eé' ga/aw ngiri tsaahhiyé' adór AAKOÓ MUNGÚ ira axweés ar tlehhmi'iieé'.

¹² Aníng ngiri báw, «Bar aga aandé' i qoón, bu'utuueé' hanisare'. Ala bar i qoondaaká ar iwiwitaak.» Naagáy parhheemaá mibeeraá tám awa peésa kingiri qoomeés tawa bu'utuueé'.

¹³ Aluuwo AAKOÓ MUNGÚ aníng iri báy, «Tláw peésaasíng kwahheek baraá tlakoó doó Mungú, gaasíng a bu'utuú hariím as gadiyér'eé'.» Naagáy aníng parhheemoodaá mibeeraá tám awa peésa ngiri kwaáhh baraá tlakoó doó Mungú.

¹⁴ Hhartaeé' tidár tsár ngiri tla/a geeqáw, tidá' ta bay wakleelu'uma as wakleelu'uumár Yuda nee Israeli ngiwa hhitiim.

¹⁵ AAKOÓ MUNGÚ aníng iri báy, «Ti malé de'eemusmo tlehh waiikae, a de'eemusmó daktani.

¹⁶ Asma ga/aaweek, aníng de'eemusmo ngu sláw baraá yaamuukae, oo bee/ángw aa hhiturumiit gu amohhe'eesaaká, slám kudá' aa qwaar gu leelehhitiiká, nee oo aa qeqtin gu tlaawinká, tam kudá' hhó' gu /aymisiiká, ala kudá' wahhaará' gin /aay, nee ta/aanta/amaaín gin feehhamiis.

¹⁷ A tsaxwaawók de'eemusmooeé' kudá' tlaákw, kudá' bee/aangós gwaa tawo may. Alók iltós ar doó /iyáy kan tuu/, nee dakós i solo'oti, iltós ar doó /iyáy i taamput.»