SEKARIA 10 - Biblía Axweesantá Hhohho' ar Mungú 2004

Mungú al'axweesantá ba/ama gana oó'

¹ AAKOÓ MUNGÚ firimaak tluwoó buhareewo, AAKOÓ MUNGÚ an kudá' tluwoó kwarara/a ngu haahuúw, inós an kudá' baafoó tluwaay gu múk i hanmaamiís nee balángw baraá qamu gu hamareés as muu sleémeero.

² Asma munguaá hatlá' gár i axweesiya' a muruú tawo, nee qwaslaarér isaá ar'aa'ar gár aa aán lama. Iigu'utuuser'ín tlataá lama ngin alki/itiyá', nee gurkwa/asár al/ayma. Gawaá adoorihe, muu in tawo tonganuus adór bee/aangw, inooín i slahhahhaiyá' asma iwa de'eemusmoó kon'aaká.

³ AAKOÓ MUNGÚ i kaahi, «Aníng aga daa/atúw buhhtaawo gawaá daanduú de'eemuuse aníng geeraharuuse a slaáhh, asma AAKOÓ MUNGÚ Aleesleemusmo daqtós ga amohhe'ees. Inós doó Yuda guri adór farásír ilakahaar tleehh baraá slaqwaraaro.

⁴ Baraá tlahhoó Yudawo tlaa/ár iihhafiiri ni ti'ít, baraaine kiki'ír heéma ni ti'ít, baraawose ga/alér slaqwara ni ti'ít, baraawose waawituú yaariír ni ti'iit.

⁵ Inooín dinkwaaro tay adór hhawaataá miguuse baraá slaqwaraaro, awa wakuuser'ín ngi kal/aamá' baraá baa/ír baraá loohi. Inooín in slaqwiyá' asma AAKOÓ MUNGÚ i dinkwa nee inooín. Inooín slaqwaruusér faras gwa i tsa/aan kan mureekees.

⁶ Aníng doó Yuda un /uurií qaás, án doó Yosefu u ba/amís, án inooín i ki/ís ayaaín asma iga gurtleemuú wa ár, inooín kwaáo' inaqo baloó kwahhiiká, asma aníng a AAKOÓ MUNGÚ, Munguúín. Aníng firor'ín a axaás.

⁷ Nee múk Efraimu tay adór miguusér /uureemaá koom, inooín tay haats qwal/uwo adór múk difaái gaa wah. Na/ii'ín adoorí ngi ariyá' niri qwalaa/iyá', muner'ín iri háts qwal/uwo as anuú AAKOÓ MUNGÚ.

⁸ Aníng muk'eé' un ateét nguri dinkwaárií burumbuúr, asma iga tuú/, inooín niri adoodár aángár tlahhiyá'.

⁹ Tam aníng inooín iga diyaa/i baraá tla/ángw xoordu, tam adoorihe inooín aníng in baraá ayeemaá sawén wa inslayá', inooín dinkwa nee na/ii'ine niri ki/iyá', tari baraá maray'ín wa hoot.

¹⁰ Slám ngi male ki/ís baraá yaamaá Misrír wa ale, ngiri burumbuúr iimír yaamaá Ashuru wa ale, ngiri huuw ay Gileadi nee Lebanoni, inooín yaamu sleémeero ngiri dalaa/iyá', tam dír hota iri qwát.

¹¹ Inooín nin waarahhiyá' ar baraá tla/ángw tláwtá slahh'amaaye, aníng gwaanduúwós kuduú ma'aay nguri slaáhh, nee iloodaá yaaér Nili niri /oná', daara/ángw Ashuru kuri hhitín, nee /uuruú múk Misri iri faak.

¹² Aníng muk'eé' nguri gawdeés baraá anuú AAKOÓ MUNGÚ, inooín nari hootiyá', inooín umuueé' nguri xirfayeemisiyá'. Anuú AAKOÓ MUNGÚ tí ngina oó'.»