SEKARIA 1 - Biblía Axweesantá Hhohho' ar Mungú 2004

Mungú i mukós ateetín tawa amoorósí ki/i

¹ Slahhángw dakaát oo kurkú tsár iimír Dario waawutmoó Persia iwa waawuti'ín, aarusmo Sekaria garmoó Berekia garmoó Ido, axweesantá AAKOÓ MUNGÚ gana axaás ar kah,

² «AAKOÓ MUNGÚ baabi'iihúng gaa i buúhh ló' wa alé.

³ Gimáy daxta ki beer, AAKOÓ MUNGÚ Aleesleemusmo i kaahi, ‹Amor'eé' ki/aare', aníng ni kií/ amorhúng.

⁴ Kuungá' ma adór baabi'iihúng tleehhitaara', kudá' aaruuseedár aáng aa beér, lohduuhúng kudá' tlakw mawaak nee tlehhmi'iihúng kudá' tlakwe.› Ala naa axasi'iiká, tam anuú AAKOÓ MUNGÚ iga ilaiwa/i'iiká.

⁵ Xáy baabi'iihúng i amaáriya'? Xáy aaruuse in hotatiínda ay alhhe'eesay wasle?

⁶ Ala axweesante'eé' nee kaahir'eé' tidá' naa hara'ayiím dír sagadiyuuser'eé' tidár aaruuse, ahaá aa bo/káhe dír baabi'iihúng i ale, inooín nay hhu'uu'uné', ta kaahi, ‹Adoodá' AAKOÓ MUNGÚ Aleesleemusmo ni atén i tleehhi ar qoomoó lohduurén nee ar qoomoó tlehhmi'iirén, an adór tii tleéhh.»›

Iigu'utuú daanduú faras

⁷ Slahhángw mibaangw tawa mibeeri tsár nee tsiyáhh, slahhangwdá' ta bay Shebati, iimír Dario iwa waawuti'ín, anuú aarusmo Sekaria garmoó Berekia garmoó Ido, axweesantá AAKOÓ MUNGÚ ana axaás.

⁸ Qoomár xweeraawo malaykamo una ár aa tsa/án gawaá faraásír daa/aat. Malaykamoodá' aa sihhiít baraá xatsa tla/ángw xaa'aá ta bay hadaási. Nee aluuwose farsú hatlá' i deer, oo da/atén nee oo kal'aá bahayen nee oo /awák.

⁹ Naagáy aníng niri oó', «Aá aáko, farsuuwí gár i laqaaqan a milá?» Ala malaykamoodá' nee án axweesá' iri báy, «Aníng gár farsuuwí ngi oó'.

¹⁰ Kuká' AAKOÓ MUNGÚ ngina ya/áaw as yaamu kiwa tsee/aarin.»

¹¹ Farsuwí malaykamooduú AAKOÓ MUNGÚ, kudá' aa sihhiit baraá tla/ángw xaa'aá ta bay hadaási, nguri bayé', «Ga/aaweek atén yaamu sleémeero ngaa tsee/arimaán, ki ló'wa saxamaár.»

¹² Aluuwo malaykamoodú AAKOÓ MUNGÚ iri ilawaáts, iri oó', «Aá AAKOÓ MUNGÚ Aleesleemusmo, ay xaylá Yerusalemu ka siaiin gurtleemuuwo, nee gixsadaá Yudawo, kudá' taa i buhhahhiín kureeriiká mibeeraá faanqwe.»

¹³ AAKOÓ MUNGÚ malaykamoodá nguri mu/aywaáts ar axweesanoó tsuú' nee oo gurkwa/amís.

¹⁴ Naagáy malaykamoodá' aníng iri báy, «Gimáy waahheek kaangwí AAKOÓ MUNGÚ Aleesleemusmo i kaahi, ‹Án gura' ina ló'wa óh as Yerusalemu ngiwa slaá' nee Siyoniro.

¹⁵ Ala aníng xoorduudaá baraá diihhooár hootá' ina buhhtisiyé'. Ar ló' aníng múk Israeli una i buúhh gár niinawe, ala xoordu slahh'maayedá' ngina doogiyé'.›

¹⁶ Gawaá adoorihe, anuú AAKOÓ MUNGÚ an kah, ‹Guruueé' aa tláy as Yerusalemu, dooeé' ku baraadií tleehh, nee tlehhmuú /abén oo gixsa i iimu/ún. Anuú AAKOÓ MUNGÚ Aleesleemusmo tí ngina oó'.› »

¹⁷ Malaykamoodá' iri báy, «Ya/abtorír hatlá' waahheek, AAKOÓ MUNGÚ Aleesleemusmo i kaahi, ‹Gixsaduueé' niri diihhe'eesiyá'. Anuú AAKOÓ MUNGÚ gixsár Siyoni ngiri gurkwa/ás.› »

Iigu'utuú daanduú xareemi

¹⁸ Baraá iigu'utuú hatlae gár xareemaá tsiyáhh koom ana ár.

¹⁹ Malaykamoodá' nee án aga axwesaan nguri yaahaás, «Xareemiiká' gár i laqaqana' a milá?» Inós án iri mu/aywaáts, «Xareemiiká' gár i laqaqana' a xoorduudaá múk Israeli nee oo Yuda nee oo Yerusalemu ngwa diyaa/iye'.»

²⁰ Naagáy AAKOÓ MUNGÚ kareeruú tsiyáhh oo muqslár kwahhuút nguri laqán.

²¹ Án nari yaahaás, «Mukwí gár ni tlehhmuú ay a milá?» Inós iri oó', «Mukwí an kudá' naa hardah as xoordu ngiwa de'e tsati nee ngiwa hhaamiisiya', xoorduudá' /uuruú koomá', kudá' yaamaá Yuda nga i haratlaye' nee muk'ín nguri tlatlahhasiyé'.»