SEFANIA 3 - Biblía Axweesantá Hhohho' ar Mungú 2004

Tlakweemaá Yerusalemu nee ba/amisarós

¹ Gixsár Yerusalemu, a tsaxwaawók. Asma a gixsár aa dee/aanut, mukós aa hhitirumiít tlakweemawo nee geeraharuuseerós muu gun /aytiín.

² Múk Yerusalemu AAKOÓ MUNGÚ gwa iiárií qaasiiká, tam gurbu'ungw'ín ngwa ya/ani'iiká. Tam Munguúín ngwa baloó haratlinti'i'iiká, slám ngu firirina'aaká.

³ Geeraharuuseerós baraawose a adór direeraá aahhamiimá', mukdá' kwasleemadaá tlaáq a adór taweruú tsiindo, gár i meetimisiyá' i káhh tam ar niiná.

⁴ Aaruuseerós a múk hasliitaaká nee a al/aymuuse. Kaahamuuseerós muruudá' hhohhó' oo Mungú ngwaa meetagaasiyé', dabér AAKOÓ MUNGÚ ngiri hhitiné'.

⁵ Ala AAKOÓ MUNGÚ baraadae in hota ganaa' gár tlaakw ga baloó tleehhiiká, Umuú matlaatlér xawa sakwasleemarós tidá' ganaa' gan geehhooatimis. Umuú looár tlawa aa baloó munesi'iiká, ala tam adoorihe múk tlákw mure ga xuiiká.

⁶ AAKOÓ MUNGÚ i kaahi, «Xoordu iga amór saáw i kwaáhh. Koo/ir'ín tidá' gawit tira baqiyé' aa hú'. Lohduuín kudá' uren iga hhitiím, tam heé gir ohiím i kaahh. Gixsaduuín nari tawó deewaaiyé', hee i kaahh baraadae, tam múk baraadá' hoót i kaahh sleeme.

⁷ Aníng niri oó', ‹Ar ló', gixsarí aníng i ilaiwá/, nee gan'aasa gari ya/aán. Nee i gunqarutká muxtadá' sleémeero ngira muxi.› Ala inooín nari ak buhhiyé' ilatleeriro. Nee tlehhma'aá tlakw sleémeero tlehhtuwo.»

⁸ AAKOÓ MUNGÚ i kaahi, «Gawaá adoorihe aníng daamaré' ay bál nay sihhiit as xoordu ngiwa sakwasleemuut, asma aga tsabiím xoordu ngiwa burumbuur nee waawuti'iima ngiwa burumbuur, nee ngiwa buhhtaeéní ku'uus, xarasleema sleémeero awa buhhtaeé'. Asma yaamu sleémeero ki daa/ ar buhhtaaeé' kudá' da/tá koomá' adór asla.

⁹ «Asma qoomaadae tsifrír xoordu an warqeés, tari axweesantá hhooár axwees as sleémeero anuú AAKOÓ MUNGÚ iwa firiirina', nee iwa sagadiyuusiya' ar muunuú wák.

¹⁰ Muk'eé' kudá' aa amór saáw í diya/aat gayuú yauudaá yaamaá Kushi, inooín aníng in firiiriná' nee ilahhooar'eé' ngin huwiyá'.

¹¹ Baalaadae tlakweemaawók kudá' tawa dee/aanút dir'eene, gár kiwa sa muruumit i káhh. Asma baalaadae mukdá' daara/aám nee ti xirfayeemiís un hingeés diroge. Slám kiíng a malé daara/utká gawaá tloomar'eé' tidá' hhoohhooe.

¹² Baraawoge mukdá' tsaén un meetiís nee kudá' ti niinaweemiís. Inooín dír guwaay ngari dír umuueéní leelehhtuú ayá'.

¹³ Mukduú Israeli aa meet gár tlaakw ngi baloó tleehhiaaká, tam lama ngi baloó ooiaaká. Nee heé al/aymusmo baraá tla/angw'ine u baloó sleeraaká, Slám heé gi dae tsaát i kaahh.»

Daa'ángw qwala/

¹⁴ Aá múk gixsár Siyoni, daaé' ar afór ur, kuungaá múk Israeli tsimaahhuusé', Kuungaá múk gixsár Yerusalemu, qwalaala/é' nee baraa/é' ar mune sleémeero.

¹⁵ AAKOÓ MUNGÚ sakwasleemarhúng gaa hingeés, wakuuserhúng gaa tsee/áy kwaáhh. AAKOÓ MUNGÚ waawutmoó Israeli, inós i baraá tla/angwhúng, gár tlaakw ar ta da'ayuta' in sangw káhh.

¹⁶ Baalaadae gixsár Yerusalemu kan bay «Aá gixsár Siyoni ma da'ayumitaar, dabaawók mindiwa tsatiitiyé'.»

¹⁷ Asma AAKOÓ MUNGÚ, Munguúhúng, i baraá tla/angwhúng i dirii'. Inós a migusmoohúng oo nu ba/amís. Inós kuungá' nu sa baraa/ ar qwal/uú úr. Baraá sla'aarirose inós kuungá' nun /abees. Afór daa'aangw gan tlees as nuwa sa qwalaala/i.

¹⁸ AAKOÓ MUNGÚ i kaahi, «Adoodár baalaadár deelór ure amotlakwér kuungá' naa sleer an hingeés, tidá' muu kuungá' nuwa /oosliislín.

¹⁹ «Ga/aawaak, qoomaadae kudá' sleémeero nu baramaanuusá' aníng in muúx. Ala kudá' soopimá' in ba/amís, nee awa taa kwaáhh in burumbuur. Murer'ín an warqeés tawa xirif nee in iia tleereés baraá yaamu sleémeero.

²⁰ Qoomár aníng kuungá' burna baraá yaamuuhúngií ki/ís, bál burna dinkwaárií burumbuúr, Baalaadae aníng kuungá' nun iia tleereés nuri xirfayeés. Baraá tla/ángw xoordu sleémeerowo, awa baraá yaamuwo. Bál diihhooarhúng birnga ki/ís, kuungá kilá' ilahunge kari aandá'. Anuú AAKOÓ MUNGÚ tí ngina oó'.»