SEFANIA 2 - Biblía Axweesantá Hhohho' ar Mungú 2004

Ateetamór hhu'u'uungw

¹ Kwasleema iigu'uusaak, ti buruumbude' kuungásíngá' xoorór mure wasl.

² Dír tundura adór muundáy wá haritleesiiká, dír deelór AAKOÓ MUNGÚ, tidár buhhtaá xaraaslá' nura i hardatká, dír xarasleemaá AAKOÓ MUNGÚ nura i hardihi'iiká.

³ AAKOÓ MUNGÚ leelehhaak, kuungásingá' tsatsa'aren sleémeero awa yaamu. Kuungaádá' hara'ayaarós aga eehade', gan'amu leelehhaak. Ti niinawese', doóqa tundu gurtláy bál deelór buhhtaá AAKOÓ MUNGUHE.

Hhaamisár xoordaá inslaawaay

⁴ Asma gixsár Gasa ka geexáy, nee Ashkeloni kan deewa'ameérií geexáy, múk Ashdodi kun tlaatla/ángw loohatis, nee Ekroni kan dee/aáruú al tuu/.

⁵ Kuungá' xoorór Krete múk bihhaá tlawtá hoót, a tsaxwaahúng. AAKOÓ MUNGÚ daanduhunge i axweesantá kón. Kiíng Kana'ani, yaamaá múk Filisti, aníng nu hhaamiís, tam hee miwa meét oo baraawók wa hoót.

⁶ Yaamusaá bihhaá tlawi tari qawtani, nee dír xafoó de'emuuse kway tleehhi, nee slumaá buhhaá bee/aangw.

⁷ Yaamusingaá bihhaá tlawi, múk Yuda kudá' aa meet giri sawaawuti'ín, bee/angw'ín ngun baraadá' wá de'ená', qoomár tsiindowo nay qaatiyá', baraá maraá Ashkeloni, asma AAKOÓ MUNGÚ, Munguúín gin gurtláy, giri malé diihhooárí ki/is.

⁸ AAKOÓ MUNGÚ Aleesleemusmo i kaahi, «Aníng /oosliislíngw múk Moabu ugwa axaás, nee niqmisuú múk Amoni. Asma muk'eé' nguna /oosliisliné' tay xirfayemisiyé' gawaá digeemi'ine.

⁹ Gawaá adoorihe adoodá' anuú AAKOÓ MUNGÚ aleesleemusmo hotaatima, Munguú Israeli yaamaá Moabu i adór Sodoma tleehhitiyá', yaamaá Amoni niri adór Gomora laqiyá' Yaamuuín te'és ngin alti'iit nee boh'ér diwto, kiri dewa'ameérií máy ay kureeraá kureér. Muk'eé' kudá' aa meet giri haasaáng wá hayoh, nee panayduú muk'eé' giri aal.»

¹⁰ Gaarí an bu'utuú daara/angw'ín Asma múk AAKOÓ MUNGÚ Aleesleemusmo nguna niqiné', tiri kilooín xirfayemisiyé'.

¹¹ AAKOÓ MUNGÚ inooín gin ló'wa dae tsaat. Inós munguaá hatlá' sleémeero baraaká' yaamuwo gin hhaasúy. Daqaní xoordu sleémeero inós nguri i tumbarara'amitiyá' umuú heewo dirós tidá' i dirii'i.

¹² Kuungá' múk Kushi sleeme tundu tsuu/ ar paángár AAKOÓ MUNGÚ.

¹³ Inós dakós gun gáwtí tlees bihhaá /iya, múk Ashuru guri hhaamiis. Gixsár Ninewi gan deewa'atis tay dír kaahaar adór xaanxaay.

¹⁴ Daqooroó hikwa nee muruú ninakwe in baraadií qaat, tam umuúqo makiito'ór sla/ato. Gwares nee umalaaro, niri gawaá sagér uheemaá maraydá' hootiyá', hárkonka iri huheeliín ar pa/eeraá maraydá'. Xwaa'aro in gawaá duuxutmadá' wa xwaheeliín. Asma xaaidaá sahhta kaa tu/ún, kari paapa/aás.

¹⁵ Gaarí aqo tsuuwá gixsadáe, tidá' aa hot ar daara/aangw nee diihhooa, tidá' aa baraá muunaáwós i o', «Aníng an aníng, oo hatlá' i kaahh, aqo har aníng.» Ga/aawaak adór ira deewá', diirí tari dír makaay ni watliya'. Umuúqo heé waaraahha gan niqmis gari qoongo'oomiis.