SEFANIA 1 - Biblía Axweesantá Hhohho' ar Mungú 2004

¹ Kaangwí a axweesantá AAKOÓ MUNGÚ tidá' Sefania aa axaás, garmoó Kushi, garmoó Gedalia, garmoó Amaria, garmoó Hesekia, de'emaá Yosia garmoó Amoni tawa waawutmoó yaamaá Yuda.

Deelór sakwasleemár AAKOÓ MUNGÚ

² AAKOÓ MUNGÚ i kaahi, «Aníng umuúqo gaaro ar baraá yaamu an qwaareés.

³ Hee nee makiito'ooro in qwaareés nee tsir/ór gáwtí tlatlaawa nee siyoó baraá tlawto, dukuutse nee kudá' tlakwe sleémeero in qwaareés. Hee un amór saáw i kwaáhh as miwa deeruút baraá yaamuwo. Anuú AAKOÓ MUNGÚ tí ngina oó'.

⁴ «Aníng dakw'eé' un tleés gawaá Yuda nee gawaá yaamuloouusér Yerusalemúr hoot sleémeero. Meetodár Ba'ali an hhaamiís as miwa geehhoouúr diirihe, nee munguúdá' ta bay Kemari dinkwa nee kaahamuuseerose.

⁵ Mukdá' looa nee slahhaangw nee tsatse/ ngi i tumbarara'amiitá' gawaá daandeemaá maray'ín wa alé un qwaareés, nee kudá' ngu i tumbarara'amiitá' iwa lo'ór /ayiya' ar umuú AAKOÓ MUNGÚ, bartaqae i lo'ór /ayiyá' ar munguú lama oo ta bay Milkomu.

⁶ Mukdá' AAKOÓ MUNGÚ eeharto aa alií kii/, nee kudá' AAKOÓ MUNGÚ ngu leeleehhita'aaká, sleeme ngu yaahamisia'aaká.»

⁷ Xasliít dír geeraá Aakoó MUNGÚ, asma deelór AAKOÓ MUNGÚ naa naká/, AAKOÓ MUNGÚ ilahhooár mruú ta tsu/i gaa amohhe'eés as dahaayeerós ngiwa hhoohhooeesi.

⁸ AAKOÓ MUNGÚ i kaahi, «Baalaadár ilahhooar'eé' ar muruú ta tsu/i aníng geeraharuuse nee na/aá waawitá in muúx, tam kudá' tlabaá xoordaá hatlá' ngi tsitaatitá' sleeme.

⁹ Baalaadae muu sleémeero kudá' munguaá lama ngi i tumbarara'amiitá' un muúx, kudá' doó aakooín ngu hatsmiisá' ar muruú tinda /awaa/awín nee oo fiiso.»

¹⁰ AAKOÓ MUNGÚ i kaahi, «Baalaadae afór /aa/e ka axaas iimír afkuduú gixsár Yerusalemu oo ta bay Afkú doó Siyó, nee tsunqusmoó úr kuri axaas amór bartá hatlá' ar gixsa, nee kududuhoó úr kuri axaas gawaá tlom'ií wa alé.

¹¹ Aá yaamuloouusér Makteshi tsuunqumisé', asma halanuuse sleémeero aa hhaán, nee mukdá' peésár qoomeemeés kwaa hhaamiís.

¹² Qoomaadae gixsár Yerusalemu an tsaa'astár tsee/aariím, nee mukdá' aa baraá horondoó buurárí wahhadiit un sakwasleemuút, Mukdá' baraaíní káh, ‹AAKOÓ MUNGÚ gár i tleehhi i káhh ta ka hhoó' laqaá ta ka tlaákw.›

¹³ Nee daqaari'iimar'ín tidá' ka hayoh, maray'ín niri sluhhuutiyá', Inooín tam maray'ín ki tleehhi ala ki hootiiká. Inooín tam sabiíbu ngu dahaasiia, ala difaáirós ngi wahiaaká'.»

¹⁴ Baalár ur ar AAKOÓ MUNGÚ naa tseewuúr, naa naká/ slam i ló'wa gaanslár hi'ít. Tseeór baalár AAKOÓ MUNGÚ i ló'wa slahh'eemís, tam migusmo in /aa/ ar afór úr.

¹⁵ Baalaadá' a baalár xarasleema Baalár slahh'amu nee waayaqamu, Baalár hhita nee hhaamisa, baalár giwti nee gurhaami, Baalár huunkáy nee ma/amír aa kiqit,

¹⁶ deelór tsimaahhír tarumbeétár slaqwara, daanduú gixsadaá koo/i gawdene, daanduú /ampuudá' ló'wa tlede.

¹⁷ Aníng muu ngun slahh'amaayér i huúw, bar ta hi'iimiit tay adór taampu, asma AAKOÓ MUNGÚ ngwa tlakweemaá i tleehhiyé', tseerduín kin adór teerír wá ku'uus, nee fu'unay'ín nay adór /o/odu tleehhitiyá'.

¹⁸ Peésar'ín laqaá nee sahaábuwo sleémeero gi ba/amisiiká bál deelór xarasleemaá AAKOÓ MUNGUHE, ala tam yaamu sleémeero kin daa/ ar asltá da/tós, asma muu sleémeero oo baraá yaamuuká' hoót gun qwaarees ar hartsatángw dae tlaáq.