RUTI 3 - Biblía Axweesantá Hhohho' ar Mungú 2004

Naomi Ruti ngiwa hara'ayiín

¹ Looarka wake Naomi Ruti gari beér, «I hariíndaáke aníng iwa hhawaatí slaw as kiíng tawa hot ar amohhooa.

² Kiíng a xú'úke adór Boasi tar heé tlahhayrén, slám kiíng nee dasuuwós ana algadiyuusé'. Ga/aaweek, laarí tsiindowo inós i angaánoó haritleemiis didár haritleemisuú wa alé.

³ Gimáy, tláw, hamtliím, di/i slikeek, tlabaawók awa hhohho' tsiiteek. Daqaní ta tleér ay didá' iwa haritleemisi. Ala inós kiíng miwa ár ay dír inós /ayma nee wahaango i hhe'eesi.

⁴ Nee dír i qatuú ay ka aán. Daqaní kiíng ta tleér amoorós i alé, inqwaarír baraá ya'aawós ka waatlés, kiíng ta qát dír ya'aawós. Nee inósuú kilá' adór kiíng wa hariim tleehhamooro ngi oo'.»

⁵ Ruti iri ó', «Ka hhoo', adoosíng kiíng naa ó' aníng a tleéhh.»

⁶ Naagáy Ruti iri tleér amoodá' angaáno kuwa haritleemisi, nee tidá' sleémeero aayír hhawaatuuwós ngaa beér gari tléhh.

⁷ Boasi /ayma nee wahaango iwa hhe'eés, muunaáwós iri qwalaá/, iri qatuú áy dír bihhaá ufuú angaánoó shayiíri kudá' taa haritleemiís. Ruti iri tseegís ay didá' Boasi i qaát, inqwaari gay waatlés, inós iri qát dír ya'aawós i alé.

⁸ Qoomár xweeraá dakiingo Boasi ina kwisliít iri daarkiít, tiqá' iwa warqay, naxés /ameeni gana ár aa dír ya'aawós i qát.

⁹ Boasi iri oó', «Kiíng a heemá?» Inós iri ó', «Aníng a Ruti, sagadiyuso'oorók. Aníng uuntsuusáng ar inqwaarirók, asma kuúng an mar'afmooeé' kudá' tseéw, kudá' aníng i aál.»

¹⁰ Boasi gari báy, «Kiíng AAKOÓ MUNGÚ i tsuuqi, dasir'eé'. Asma kiíng hhooeemaá ak ur iga tléhh ta kudá' taa tlehhi dír aayír hhawaatuuwógí alé. Asma tam masoomo ugwa eehatká oo narkutmo laqaá oo daqaarmo.

¹¹ Dasir'eé', kiíng ma da'ayuutaar! Asma aníng tisíng sleémeero kiíng ta sla', ngi tleéhh. Asma múk ayaawí sleémeero kiíng i xuu' adór tar /ameenír hhoo'.

¹² Ar ló', aníng a heé tlahhoó tseéw, kudá' hariím kiíng iwa aali. Ala heeko i deer. Inós an ak heé tseéw baraá tlahhaywo ta aninge.

¹³ Kiíng diisíng i qaateek xweeraakae ay matlaatle. Matlo a araán barnaxes inós aa ya/án kiíng iwa aali. Bira ya/án, daqaní ka hhoo'. Ala barnaxes aa ya/aniká, aníng a deer, aníng kiíng i aál. Tí ni kah a tsáp, tam AAKOÓ MUNGUÚDÁ' slaáf i axamiis. Kiíng guú' ay matlaatle.»

¹⁴ Naagáy Ruti iri dír ya'aawós i qát ay matlaatle. Matlaatlér boo/e inós iri tseewa ti'ít qoomár hee kuqá' nguwa tsaahhiiká. Asma Boasi gaa slaiiká muu ngiwa xui adór /ameeni ira amoodá' keér.

¹⁵ Boasi gari báy, «Pasltá inqwaarirók amohhe'eeseek.» Inós gari amohhe'és. Boasi angaánoó shayiíri guri qoomeés ar har afi qoomár kílo mibeeri tsár, Ruti gari tleés, inós gurir wátl amór gixsár i alé.

¹⁶ Iwa hardát do'o, aayír hhawaatuuwós gari yaahás, gari beér, «Adór taa /imís, dasir'eé'?» Ruti tidá' sleémeero Boasi aa dirósí tleéhh gari ó'.

¹⁷ Iri ó', «Nee slám kílo mibeeri tsár ar angaánoó shayiíri ngaa haniís. Asma inós aníng ina báy, ‹Ma dákw kaahaár ar watlaar amór aayír hhawaatuuwók.› »

¹⁸ Naomi iri ó', «Dasir'eé', kiíng diirí wa iwiiwiteek ay dír alhhe'eesoó gaasíng kay tsahh. Asma heesíng i xaslitiiká ay dír gaasíng ngay hhe'eesi laarír kilá'.»