RUTI 2 - Biblía Axweesantá Hhohho' ar Mungú 2004

Ruti iwa baraá qaymór Boasi wa gadiyús

¹ Heeko i deer, oo tlahhoó hhawaatuú Naomi. Umuuwós a Boasi. Inós a heé guruú doó Elimeleki, slám a daqaarmoó ta ilaiwawa/i.

² Looarka wake Ruti Naomi gari beér, «Xáda, xáy, án a tláw baraá qamu, a bururú sleemisuú áw. Aníng a haraxuú' heé ya/aám nguwa slaw niwa aluuwós wa sleemiis.» Naomi iri ó', «Kiíng tláw, dasir'eé'.»

³ Ruti iri tleér baraá qamu, iri alaá múk bu'uúm wá hi'iimít, balángw taa gixáy guna sleemís. Laatí qaymór aa harati'ít a qaymór Boasi, kuduú tlahhoó Elimeleki.

⁴ Naxés Boasi nina hardáh i Betilehemúr daahh. Múk bu'uúm guri laaw'eés iri oó', «AAKOÓ MUNGÚ masók ta dinkwa nee kuungá'.» Inooín tari oó', «AAKOÓ MUNGÚ u tsuuqi.»

⁵ Boasi heedá' múk sageesihhimiít guna yaahaás guri báy, «Deenaarí a dasír heemá?»

⁶ Sageesihhtusmoodá' iri oó', «Inós a dahaayo'o ar xoorór Moabu. A tidá' nee Naomi ti koomá' qoomár Naomi niwa kí/ baraá yaamaá Moabu wa alé.

⁷ Inós aníng ina firiín bururú nguwa sleemis alaá mukdá' bu'uúm wa alé. Inós ina sleemís iimír matlaatlér wa alé ay siwirí, aa hungu/uská, aqo har qoomár niinawe ina hungu/ús.»

⁸ Aluuwo Boasi Ruti gari báy, «Iia qaaseek, dasir'eé'. Ma amór hatlá' i sleemisuú awaar, aqo har baraá qaymoorí. Ma saweesaar dír dasuueé' kwí gadiyuusa.

⁹ Inooín na ga/aaweek as dír tawa bu'un kawa aan, nee inooín ti koomakoonde'. Masoombarí aga hara'ayiím kiíng miwa daawitisiyé'. Barnaxes aga waxít, tláw, ma'aydá' masoombarí aa hhék ki wát.»

¹⁰ Ruti iri xupú', gitsee/awós giri kwatít ar yaamu. Boasi guri beér, «Adór aníng kuúng ira xú', anír dahaayo'o, tam aníng iri i axwés ar gurhhooa?»

¹¹ Boasi gari báy, «Aníng kangók ugwa axaás hhooeemaá taa tlehhít dír aayír hhawaatuuwók i alé iimír inós iwa gwaá'. Aga xuú' adór kiíng baabá nee aayí nee yaamuuwók ngira geexeér, niri hotaá eér baraá yaamaá múk taa baloó geerií xu'uká.

¹² Gawaá tisíng taa tlehhiti AAKOÓ MUNGÚ bu'utuuwók ngu haniisi. AAKOÓ MUNGÚ, MUNGÚ Israeli bu'utuú yaariír ngu haniisi, kudá' kiíng taa i góp as kiíng iwa xun.»

¹³ Ruti iri ó', «Aáko, kuúng tu ló'wa hhoó' dir'eene. Asma hhooeemaá naa axwés daanduueene aníng iga ló'wa gurkwa/asiyé', tam handá' aníng adór sagadiyuso'oorók ar wák aga awiikahe.»

¹⁴ Qoomár /ayma iwa xeér, Boasi Ruti gari báy, «Qwaláng a /ayiimaán, nee /aarmo taatahheek, daqaní ku tikís baraá slooqomoó naanú.» Naagáy Ruti iri iwít dinkwa nee mukdá' bu'uúm. Boasi pu/oó angaánoó shayiíri guri amoorós i haniís. Inós iri /ayiín iri áx, guri meetís.

¹⁵ Ruti iri tleér, iwa kumit bururú sleemisuwo, Boasi masoombarós tidá' gari báy, «Mawaagáy bururú ngu sleemis tam baraá tla/ángw ufér balaango. Ma iigahhamiitara'.

¹⁶ Slám bahh'alé duxuumaak baraá ufeero, ku gixeerá' as inós nguwa sles, ma siaara'.»

¹⁷ Ruti iri kumít bururú sleemisuwo ay tsiindo. Guri sláhh. Gár aa sleér tari afi qoomár eéfár wák laqaá afi qoomár kílo mibaangw ar angaánoó shayiíri.

¹⁸ Guri gagát guri húp amór do', bururúdá' aa sleemís guri aayír hhawaatuuwós i laqaán. Muruú /aymaadá' aa meetís iwa áx, guri hanís sleeme.

¹⁹ Naomi gari yaahás, «Dír laarí bururúwí nguwa sleemís a baraá qaymór heemá? Heesíng kiíng iga xuu' ku tsuuqi.» Inós aayír hhawaatuuwós gari beér, «Laarí dír niwa gadiyuús a baraá qaymór heé ta babay Boasi.»

²⁰ Naomi iri waa/ó/, harér garmaawós gari beér, «Heesíng ku tsuuqi nee AAKOÓ MUNGÚ kudá' hhooeema gi tlehhiít dír múk slaáf nee dír mukdá' aa qaatl.» Naomi iri kumít axweesanto iwa kat, «Heesíng oo tlahhayrén, slám ku guruú doorén i tseéw. Inós a heé wák oo hariím kiíng iwa aali.»

²¹ Nee Ruti, dasír xoorór Moabu iri ó', «Eeít, inós aníng ina báy, diirí wa kumiiteek, dír bihhaá sagadiyuuser'eé' ay dír bu'ungw'eé' sleémeero ngway faakiya'.»

²² Naomi Ruti, harér garmaawós gari beér, «Dasir'eé', a gár hhoo' kiíng nee dasuuwós tiwa koonda', as kahhó' muu miwa baraá qamaá múk hatlá' wa daawitamís.»

²³ Naagáy Ruti nee sagadiyuusér Boasi tiri alkoomaakoné', inós ina kumít bururú sleemisuwo ay alhhe'eesoó bu'úngw shayiíri nee oo angaáno sleeme. Ala inós ina hót dír doó aayír hhawaatuuwós wá alé.