RUTI 1 - Biblía Axweesantá Hhohho' ar Mungú 2004

Loohoó Elimeleki

¹ Aáng qoomár yaamaá Israeli kiwa geeraharahaár nee har'ohuuse, giyér ur ina tleér baraá yaamaá Israeliwo. Heeko wák oo baraá gixsár Betilehemu ar baraá yaamaá Yuda ina tláy iwa ala hotaá ay baraá yaamaá Moabu. Inós nee hareerós nee daaqaywós tsár tina koné'.

² Heewí umuuwós a Elimeleki, nee umuú hareerós a Naomi, nee daaqaywós kudá' tsár umer'ín a Mahloni nee Kilioni. Tlahhay'ín a Efrata oo baraá gixsár Betilehemu ar baraá Yuda. Tari hardáh yaamaá Moabu, niri ayaadá' wa hootiyé'.

³ Ala Elimeleki, hhawaatuú Naomi, ina gwaá'. Naomi iri mét nee daaqaywós kudá' tsár.

⁴ Daaqaydá' dasuú xoorór Moabu guri duxuút, tooka umuuwós a Orpa, nee ar tsár a Ruti. Tari baraá yaamuudá' wa hoót afi qoomár kureeri mibaangw.

⁵ Mahloni nee Kilioni sleeme niri qatliyé' tsaraawo. Aluuwo /ameenidá' ina kilós mét, asma daaqaywós nee hhawaatuuwose naa qatliyé'.

Naomi nee Ruti tawa kií/ Betilehemu

⁶ Naomi iwa baraá Moabu, gana axás adór AAKOÓ MUNGÚ mukós oo baraá Yuda ngura qeemuú bu'úngw hhó' i haniís. Tiri amohhe'és iwa tleer yaamaá Moabú wa alé dinkwa nee tlaawoó daaqaywós.

⁷ Inós iri tleér baraá yaamaá Moabú wa alé iwa ki/ baraá yaamaá Yuda. Nee tlaawoó daaqaywós tiri koné'.

⁸ Ala Naomi loohiro tlaawoó daaqaywós tsaraawo giri beér, «Kuungá' ki/é' umuú heewo amór aayírós. Nee AAKOÓ MUNGÚ nu hhooeemií tleehhi adoodá' kuungá' taa tlehhé' dír hhawaateehúng qoomár iwa slafiya', nee dir'eene sleeme.

⁹ Nee AAKOÓ MUNGÚ kuungá' nu alee/iisi ar umuú heewo hhawaata nguwa malé slay nee hotaarír hho' kawa ar hota'.» Inós giri deeloórí ó' ar ma'amis. Inooín tari /aa/amín ar afór ur,

¹⁰ kari báy, «Aasla'áy, atén nee kiíng ti koomaán ay amór mukók.»

¹¹ Ala Naomi giri beér, «Dasuueé', kuungá' ki/é', gár nee aníng tis koomaan? Xáy, xwaylar'eé' i kumíta nuwa hhawaataá hatlá' i laqwaal.

¹² Dasuueé', kuungá' ki/é' amór marayhúng. Asma aníng aga diím nee hhawaata u malé slawaaká. Geera bar harahhifo an kooma adór hhawaata ngur sláw xweeraakae, nee na/aá daaqaay ngiri laqwalaán,

¹³ xáy geera kuungá' i daandá'a ay dír nay uraraya'? Ti ila/á'a hhawaate kiwa sleera'aaká? Aasla'áy, dasuueé', AAKOÓ MUNGÚ aníng iga muruú gawdén i haniís, tam aníng daanduuhunge iga gurhaamír i huúw ló'wa alé.»

¹⁴ Inooín /aa/e ngiri malé iimu/uné'. Orpa aayír hhawaatuuwós gari deeloórí ó' ar ma'aasa. Ala Ruti iri dirós i mét.

¹⁵ Ala Naomi Ruti gari beér, «Ga/aaweek, harér hhiyoó hhawaatuuwók aa kí/ amór mukós nee amór munguiiwós. Gimáy, kiíng sleeme kií/ nee inós ti koonde'.»

¹⁶ Ala Ruti iri ó', «Kiíng án mi harhheehhe'emisaar iwa geexaw, niri kií/ nee kiíng tiwa koomanaaká. Didá' kiíng ta keera, án nee kiíng ti koomaán. Didá' kiíng tawa hota, án nee kiíng an hootaán. Mukók a muk'eé' sleeme. Munguúwók a Munguúeé' sleeme.

¹⁷ Didá' kiíng ti gwa', aníng sleeme an didí gwaá'. Didá' kiíng ti fooli, aníng sleeme tin didí fool. AAKOÓ MUNGÚ aníng i slahh'amaayér úrí haniisi barnaxes gár hatlá' ar án nee kiíng ti paraatl aga ya/aám, bar har gwa'araarooká.»

¹⁸ Naomi ngiwa tsáhh adór Ruti ira tsabiín nee inós tiwa kona', gari sangw gaa beeriiká.

¹⁹ Tari kumiít tsaraawo, tari hardáh Betilehemu. Tawa hardáh Betilehemú i alé, múk baraá gixsadá' sleémeero iri waa/oó/ as inooín. /Ameena iri waa/ó/ iri ó', «Heewí aqo tsuwaá Naómíwo?»

²⁰ Naomi giri beér, «Aníng mi Naomír ateetimaara', ala ateetimaaré' ar Mara. Asma Munguú Aleesleemusmo aníng iga slahh'amaayér úr i haniís.

²¹ Qoomár aníng niwa tláw, umuú gaaro a koóm. Ala AAKOÓ MUNGÚ aníng iga ki/ís ar gaa wasl. Waáy, mihar Naomír ateetiindá'? Asma AAKOÓ MUNGÚ Aleesleemusmoó mura' sleémeero aníng iga amotlakweér i haniís nee iri slahh'eés.»

²² Adoorí an adór Naomi nira kí/ baraá ayaá Moabú wá alé dinkwa nee Ruti, harér garmaawós, dasír xoorór Moabu. Niwa hardihiyé' gixsár Betilehemu a qoomár bu'úngw angaánoó shayiíri iwa iimu/u/un.