Rumi 7 - Biblía Axweesantá Hhohho' ar Mungú 2004

Slaqsoó duuxo

¹ Hhaee'eé', kuungá' hara'aya a xuá', nee slám a xuá' adór hara'aya ir aleesleemuú koón daanduú heewo, qoomár hee bir slaaf.

² /Ameenír taa duúx, inós kaa tseék nee hara'aya dír hhawaatií alé, qoomár hhawaata bir slaaf. Ala hhawaata bira gwaá', inós daqaní kaa gweér baraá hara'ayaadá' inós gaa tsek dír hhawaatuuwo.

³ Ala barka dír hhawaatuú hatlá' wa óh, qoomár hhawaatuuwós bir slaaf, inós daqaní ka bay a /ameenír tsaatuso'o. Ala bar hhawaatuuwós aa gwaá', inós daqaní kaa gweér baraá hara'ayaro, nee inós tam ka duuxi nee hhawaatuú hatlá', daqaní inós a fuquso'orooká.

⁴ Kuungá' sleeme a adoosíng, hhaee'eé'. Asma adoodár Kristo ira gwaá', kuungá' sleeme ana qatlé', nee slám kuungá' a baraá waawuti'iimár hara'ayár i dir'a'aaká. Kuungá' a múk heé hatlá', kudá' naa waaslee/ baraá múk aa qaátl wa ale. Gawaá adoorihe tlehhma'aá hhohho' in tleehhaán awa Mungú ngu qwal/atisá'.

⁵ Qoomár atén tawa warqawaniiká, ilatleerír tlakweema tidá' taa tleemiís nee hara'aya, ina gadiyús baraá slaqoorén wa ale, tam atén tlehhma'aá gwa'arár huwahuwá' kiri tleehhaán.

⁶ Ala hám atén taa gweér baraá hara'ayaaro, asma atén aga qatlaán dír hara'ayaadá' atén taa tsegi. Hám daxta atén Mungú un sagadiyuusaán ar loohír /aben, ar Qeeruú hhoohhoó' oo Mungú, ala ar loohír aangeeká, ar hara'ayaadá' taa gooín kawa eeharaharaan.

Dabe nee tlakweema

⁷ Ala atén gár taa ooaan a milá? Hara'aya a tlakweemaáwo? Aasla'áy a tlakweemaawooká. Ala án geeraawo tlakweema tsaahharo i aleeslawaaká hara'aya bir káhh. Án geeraawo ilatleeri a tsaahhaaká bar hara'aya iga beeriká, «Ma ilatleeruusaar.»

⁸ Tlakweema hara'aya ngina ar gadiyuusiyé', ilatleerír dimbadimbé ngiri tleesiyé' baraaeé' wa ale. Asma hara'aya bir káhh, tlakweema naa gwaaiyé'.

⁹ Aníng aáng a slaáf, niwa hara'ayár koomaaká. Nee hara'aya niwa hardát tlakweema niri slafiyé',

¹⁰ ala aníng niri gwaá'. Gawaá adoorihe hara'ayaadá' slafiingw geera ngu huuw, gár naa húp dir'eene an gwa'ara.

¹¹ Asma hara'aya niwa hardát, tlakweema pa/aangw nguri slayé', aníng iri al/ayiyé', iri gaasiyé' ar hara'ayaadá'.

¹² Gawaá adoorihe dabe ka hhoohhoo', nee hara'aya sleeme ka hhoohhoo', slám i ganá' nee ka hhoo'.

¹³ Ala hara'ayaarí hhoo' gwa'ara ngina húbi dir'eene? Aasla'áy a hara'ayaarooká, a tlakweema gwa'ara ngina huwiyé'. Ala tlakweema hara'ayaadá' hhoo' ngina ar gadiyusiyé', as aníng iwa gaasiya'. Gawaá adoorihe hara'aya tlakweema ngina laqaán adór tar gár ló'wa tlaakw.

¹⁴ Atén a xuaán hara'aya loohirós a ar baraá qeeru. Ala aníng a heé slaqwa, tina weeriís adór lawaalmoó tlakweema.

¹⁵ Asma aníng gár ni tlehhiit a tsatsahhamaaká. Gár ni slaa' tleehhamooro a tleehhaaká, ala tidá' naa aáhh, an tidá' ni tlehhiit.

¹⁶ Ala barnaxes aníng tidá' ni sla'aaká an tlehhiít, aníng adór hara'aya kar hhoó' an ya/a/aám.

¹⁷ Gawaá adoorihe heé gaarí ga tlehhiít a aningeeká, ala a tlakweemaadá' baraaeé' wa hootá'.

¹⁸ Asma aníng aga xuú' gár hhoo' ar baraaeé' wa hoot i káhh, gídaabá baraá slaqwte'eé'. Tidá' hhoo' ngiwa tleehh a slaá', ala tleehhamooro a aleeslawaaká.

¹⁹ Asma tidá' hhoo' ni tleehhamór wa slaa' a tlehhiitaaká, ala tidá' tlaakw ni tleehhamór wa sla'aaká, an tidá' ni tlehhiit.

²⁰ Barnaxes tidá' ni tleehhamór wa sla'aaká, an tidá' ni tlehhiit, heé adoorí ga tlehhiít a aningeeká, ala a tlakweemaadá' baraaeé' wa hootá'.

²¹ Gawaá adoorihe aníng aga tsaáhh hara'ayaarí aníng in sa waawuti'iín asma tidá' hhoo' a slaá' tleehhamooro, ala gár aníng i iihardarah an tidá' tlaakw.

²² Asma aníng baraá muunaáeene hara'ayár Mungú an sa qwalalaá/.

²³ Ala baraá slaqwte'eene gár naa ár a hara'ayár hatlá'. Hara'ayaarí i sláqw nee hara'ayaadá' baraá muunaáeénií dirii'. Asma hara'ayár tlakweema i baraá slaqwte'eé' wa gadiyús, aníng iri tsék.

²⁴ Aníng a liitlakusmo ador'eé' tí ka ló'wa gawit. Heé aníng i ba/amís dír slaqwtír gwa'araaro a heemá?

²⁵ Mungú i xirfuuti. Ba/amusmo u koóm, Yesu Kristo Aakoorén. Ala barnaxes a adoorí, anuú kilá' hara'ayár Mungú an sagadiyuús ar muunaáeé', nee hara'ayár tlakweema an sagadiyuús baraá slaqwte'eene.