Rumi 3 - Biblía Axweesantá Hhohho' ar Mungú 2004

¹ Gawaá adoorihe heé Yahudi gár i ak kon a milá? Nee al/utlo gár i bu' a milá?

² Gár i bu' i ló'wa deer umuúqo barto. Gár har geera a Mungú axweesantós gana dír múk Yahudír i saayín.

³ Ala bar dir'ine bahh'alé i inkihhimuú kona'aaká, adoorí daqaní a adoomá? Xáy ador'ín tí inkihhimuú Mungú gun hingésa?

⁴ Aasla'áy, a adoosingeeká. Mungú inós a inkihhimusmo, umuúqo heewo tam lamusmoowo. Asma kaa gooín, «Kuúng bar axwés, axweesanaywók masók ku tsaahh, adór tar axweesanoó ganaá', nee kuúng tawa baaliin baraá kwasleemaro.»

⁵ Ala bar tlakweemaarén gan'amuú Mungú ngun geehhooeemisiyá', atén gár ta ooaan a milá? An ooána Mungú gár ganaa'aaká gaa tleéhh, as sakwasleemarós ngiwa daandeemooréní huúw? (Gaarí ana axweés ar adoodá' muu ir axweemaamisi.)

⁶ Aasla'áy. Asma Mungú geera adór muu ngur sakwasleemuuti a adoomá?

⁷ Ala barnaxes lamte'eé' gár i laqaqaan a looeemaá Mungú, inós kuri xirfayeés as lamte'eé', aníng daqaní gár tis sakwasleemuuti adór tlakusmoó wa ale?

⁸ Ala bar adoosíng, an ooána, «Tlakweema i tleehhaán as hhooeema iwa hardihiya'.» Múk atén ti kaantiím bahh'alé sleeme gaa káh adór atén gár ta intsaahhatimisaan tar tí. Inooín ki sakwasleemuut ar sakwasleemár hariim.

Heé ganaá' i kaahh

⁹ Ala ateéká' múk Yahudi gár tsiní ar ta koomaan i deéro ta múk xoordaá hatlae? Ala i káhh. Asma aga qaroó ooaán muu sleémeero, bar múk Yahudi laqaá múk xoordaá hatlá', sleémeero ta baraá waawuti'iimár tlakweemaá i dirii'.

¹⁰ Adór kara gooín tawa kaahi, «Heé ganaá' i kaahh tumu wák.

¹¹ Heé tsaahhár koóm i kaahh, slám heé Munguú leelehhiít i kaahh.

¹² Muu sleémeero aa paásl baraá loohír Munguhe, sleémeero naa qwaariyé'. Heé hhooeema gi tlehhiít i kaahh tumu wák.

¹³ Hhehhuuín a adór /aantaá kistí diriiá'. Al/ayma kan axwees ar tsifreeri'ín. Gawaá afer'ine gár ti'imiit a qarkwá dayshe.

¹⁴ Afer'ín gár iwa háts a lu'umis nee afa tli/a.

¹⁵ Ya'aaín i gaansliná' as tseerdaá muu kiwa ku'uusi.

¹⁶ Hhitiru'uuma nee slahh'amaaye i deer baraá lohuuine, didá' inooín nira waarahhii'i.

¹⁷ Slám loohír wayda inooín ka xuiiká.

¹⁸ Slám baraaine Mungú ku ilaiwawa/iiká.»

¹⁹ Ala a xuaán axweesanaydá' sleémeero hara'aya i kat, kwaa oó' dír mukdá' sleémeero baraá waawuti'iimár hara'ayár wa hoót. Gár axweesanaywí oo hara'aya kusa oó', a umuúqo heewo kuwa xasltisi, nee muu sleémeero kuwa sakwasleemuuti nee Mungú.

²⁰ Asma heé ta gan'amií harafaari dír geeraá Munguhe i kaahh, ar loohír tlehhma'aá hara'aya, asma hara'aya gár i bu' dír heewo, a tlakweemaawós gin laqaaqaán as ngiwa tsaahhi.

Mungú hee gun gan'amií sláy ar haratlintaao

²¹ Ala daxta loohír hatlá' kaa geehhooeés, ar Mungú hee ngur gan'amií harafaari. Gan'amuuwí ku slayká ar hara'aya. Gan'amuuwí an kudá' Mose nee aaruuse aáng naa lamabu'uné'.

²² Mungú gan'amuuwí gun hanmiis dír umuúqo heewo oo Yesu Kristo gwa haratlintii'. Ku hanmiis dír umuúqo heewo as haratlintaao. Asma barqaanti i káhh.

²³ Asma muu sleémeero tlakweema gaa tleéhh, nee xirfuú ta kon i kaahh dír geeraá Munguhe.

²⁴ Mungú gina tawó gan'amuú i harafaár ar gurtleemuuwós. Gár adoorí ngisa tleéhh a gadiyeédá' Yesu Kristo aa tleéhh ar muu kuwa gweeri.

²⁵ Mungú Yésuuwí nguna haniís, as gurtleemuú tlakweema inós nguwa múk i slay ar gwa'araarós. Hee gurtleemuuwí gun sláy bar Yesu ngwa haratlintií'. Mungú adoorí gana tleéhh as loohirós ngiwa laqan ar hee ngur gan'amií harafaari. Asma aáng Mungú tlakweemaá muu gina sa qiqtlín, baraá qartadá' aa waarahhi.

²⁶ Ala gawaá qoomaarihe loohirós gan laqaamár wa slaa', ar hee ngur gan'amií harafaari. Inós gár i slai a kun tsaahh iwa gan'amuú kon, nee heé Yesu gwa haratlintii', ngur gan'amií harafaari.

²⁷ Gár tas daara/aamaan a milá ala? Gár tas daara/aamaan i káhh. Asma milá? Gár adoorí ga laqaaqaam a hara'aya gaalá? A hara'ayár tlehhmi'iíwo? Aasla'áy, gár adoorí ga laqaaqaam a hara'ayár haratlintaao.

²⁸ Asma aga araán adór hee kur gan'amií harafaari ar haratlintaao, ala ar tlehhma'aá hara'ayarooká.

²⁹ Laqaá Mungú an Munguú múk Yahudi kilóse? Ahaá, a Munguú múk xoordaá hatlaeekáhe sleeme? Eeít, inós a Munguú múk xoordaá hatlá' sleeme.

³⁰ Asma Mungú a wak. Inós múk Yahudi kudá' taa al/utlín, gun gan'amuú i harafadiit as haratlintaaor'ín. Nee múk xoordaá hatlá' sleeme, kudá' taa al/utlinká, gun gan'amuú i harafadiit ar loohír haratlintaaor'ín.

³¹ Gawaá adoorihe atén hara'aya an warqeemisaána ar haratlintaaoorí? Aasla'áy. A warqeemisaanaaká ala an gawdeemisaán.