Rumi 15 - Biblía Axweesantá Hhohho' ar Mungú 2004

Ti sla'aaslae'

¹ Ateéká' /uuruú koomá' baraá haratlintaaooro, gár tiwa hariím a mukdá' tununuú/ baraá haratlintaaooro un alee/iimisaán. Ala atén mitiwa kilootén sla'atimisaán.

² Umuúqo heewo baraá tla/angwrene masók inslaawmoowós gun sla'atimis as hhooeema ngiwa slay, nee as iwa kwa/i baraá haratlintaaoorose.

³ Asma Kristo sleeme taa kilós sla'atisiiká. Ala inós gooirí gana boo/eés, tí kah, «Niqimisuudá' kuúng tura niqimís nee muu, aníng una sláw.»

⁴ Asma Gooi sleémeero tidá' taa qaroó gooín, kana gooín as atén tiwa intsaahhatimis. Atén qitla nee gurkwa/amis u slaslawaán baraá Gooiro. Gawaá adoorihe a gawduwaán baraá haraxu'utirene.

⁵ Qitla nee gurkwa/amis amór i dahhiya' a amór Mungú. Gawaá adoorihe Mungú kuungá' nu alee/iisi as tawa hota' ar muunuú wák, ar Yesu Kristo kuwa eeharahada' ar adoodá' inós ira hoót.

⁶ Daqaní kuungá' a aleesleerá' Mungú, Baabuú Aakoorén Yesu Kristo, kuwa xirfayeemisa' ar muunuú wák nee ar afór wák.

Ya/abtór hho' as múk xoordaá hatlá'

⁷ Gawaá adoorihe kuungá' ti kiloohúng dah'iimise' adoodá' Kristo atén tira dahi'ís, as Mungú iwa xirfuuti.

⁸ Án kuungá' nun baw Kristo aa sagadiyusmoó múk Yahudi tleehhiít, as ngiwa laqan adór muruudá' Mungú aa oó' tar ló'. Inós al'axweesantadá' aa dír baabi'iirén i oó' ga boo/ees.

⁹ Nee slám Kristo niri hardáh as múk xoordaá hatlá' Mungú kuwa xirfayeesi as gurtleemuuwós. Asma kaa gooín, «Gawaá adoorihe aníng kuúng u tla/ángw múk xoorduú wa sluufmiís, aníng umuuwók u sa daá'.»

¹⁰ Nee slám kaa malé gooín, «Kuungá' múk xoordaá hatlá', qwalaala/é' dinkwa nee múk Mungú.»

¹¹ Nee malé alé, «Kuungá' múk xoordu sleémeero, Aako xirfayeemisaak, kuungá' múk tlahhi'i sleémeero inós diidi'iimisaak.»

¹² Nee slám aarusmo Isaya i kaahi, «Harma/i ni baraá tlahhoó Yesé dáhh. As xoordu sleémeero ngiwa sawaawuti'ii'in. Inós an kudá' xoordu i haraxuiya'.»

¹³ Mungú, kudá' haraxu'uti sleémeero i diri', inós kuungá' nu hatsiisi qwala/ sleémeero nee waydawo ar loohír haratlintaao, as haraxu'utirhúng iwa ló'wa doogiin ar baraá /uuruú Qeeruú hhoohhoó' oo Mungú.

Gaidyér Paulo as xoordaá hatlá'

¹⁴ Hhaee'eé', aníng a xuú' adór kuungá' tar hatsá' hhooeemaawo. Nee slám kuungá' xu'uti sleémeero a koondá', nee a aleesleerá' kuungá' kiloohúng tiwa gurbu'uunda'.

¹⁵ Ala baraá barwaárí naa kuungá' i gooini bartakaaro aníng kuungá' nuna i xaraásl, as nuwa inslawtis daanduú kangwdá' taa qaroó axasi'i. Adoorí aníng ana tleéhh as aleesleemuudá' án naa sláw dír Mungú wa ale.

¹⁶ Asma ina sagadiyusmoó Yesu Kristo wa qaás oo amór xoordaá hatlá'. Gadiyér kaahamusi'iimár Mungú an tleéhh ar loohír Ya/abtór hho' ar Mungú ngiwa alki/iit dír xoordaá hatlá', as inooín tawa ilahhooa tleehhiti, tidá' Mungú aa ya/án, tidá' taa hhoohhooeés nee Qeeruú hhoohhoó' oo Mungú.

¹⁷ Ala baraá Yesu Kristowo aníng gár tis xirfayeemiis a gadiyeédár Mungú ni tlehhahhiit.

¹⁸ Ala aníng gár ooaro ni qiitl i káhh daanduú gár hatlae, ala aqo har tidá' Kristo aa tleéhh kilós, ar loohír aníng, as múk xoordaá hatlá' nguwa amór Mungú i huwi, as inooín Mungú kuwa iialooeemisi. Gadiyeérí aníng ana tleéhh ar axweesani nee ar tlehhmi'i,

¹⁹ ar layaá /uuruú koomá' nee ar tlehhma'aá waa/oo/amo, nee ar /uuruú Qeeruú Mungú. Gawaá adoorihe aníng alki/ituú Ya/abtór hho' ar Kristo ugwa hhe'eés iimír Yerusalemúr wa tleemu, niri harweeriím ay dír yaamaá Iluriko.

²⁰ Umuúqo daqto aníng gár ni leelehhiit a Ya/abtór hho' ngiwa alki/iit dír umuú Kristo kuwa axaasiiká, as iihhafiirír heé hatlá' aa qaás aníng mawa i tleehhiít.

²¹ Asma Gooi i kat, «Mukdá' taa baloó kangós bayká, gu ar, nee mukdá' kangós gwa axaasiiká, gu tsaahh.»

Paulo i Romár keemuú wa slaa'

²² Gaarí an gár aníng tisa ilaá/ daqtá yaariire niwa amorhúngí hardah.

²³ Ala daxta gadiyér'eé' aa fák baraá yaamuukae. Nee slám aníng aga ló'wa slaá' kureeraá yaariire niwa amorhúng i hardah.

²⁴ Gawaá adoorihe hamí aníng ni dirhúng ar waaraáhh, qoomár án bar yaamaá Spaniár káw. Asma aníng gár ni slaa' a kuungá' nun ár baraá aaiieene, as aníng niwa qwalalaa/ dinkwa nee kuungá' har qoomár niinawe. Nee slám a haraxuú' kuungá' aníng i alee/isá' niwa kumiit baraá aaiieene.

²⁵ Ala hamírihe aníng a Yerusalémúr káw, as mukdá' hhohhó' oo Mungú nguwa sagadiyuus.

²⁶ Asma múk kríshaanáy, kudá' oo baraá yaamaá Makedoníár i dirií', nee baraá yaamaá Akaya, inooín kaa slaá' ohme kawa ya/aawi as múk hhohhó' oo Mungú, kudá' liitlakwén, oo baraá Yerusalemúr i dirií', kuwa alee/iisi.

²⁷ Inooín kilooín adoorí kana al'axweés, ala tam adoorihe inooín gár kiwa hariím aqo kin alee/iis. Asma mukduú Yahudi múk xoordaá hatlá' nguna alee/iisiyé' muruú baraá qeeruuwo. Gawaá adoorihe múk xoordu daxta inooín gár kiwa hariím a múk Yahudi ngun alee/iisiyá' sleeme muruú slaqoowo.

²⁸ Ala bar gadiyeérí aníng ngaa hhe'eés, nee bar ohmeerí sleémeero taa uhín as inooín aga haniís, daqaní aníng a tláw ay yaamaá Spania, niri amorhúng ar waaraáhh.

²⁹ Qoomár án binda hardáh, nin hardáh ar tsuuqaá yaariir awa Kristo.

³⁰ Hhaee'eé', án kuungá' nu firiím ar baraá Aakoorén Yesu Kristo, nee ar sla'aaridá' amór Qeeruú hhoohhoó' oo Mungú daahh, ilakaahara tleehhaak dinkwa nee aníng iwa aleefiriiriinda' dír geeraá Munguhe.

³¹ Firiirimé' as aníng tiwa ba/amisi dír dabaá mukdá' aa haratlinti'iikahe, kudá' baraá yaamaá Yudeár i dirií'. Nee slám firiirimé' as gadiyér'eé' tidá' nis Yerusalémúr kaw, kawa ya/an nee mukdá' hhohhó' oo Mungú.

³² Adoorí bira hhooeér, bar Mungú ngaa slaá' aníng niqo hardáh amorhúng ar qwala/, niri hungu/uús ayaahúng.

³³ Munguúduú wayduú hanmiís masók i dinkwa nee kuungá' sleémeero. Amin.