Rumi 11 - Biblía Axweesantá Hhohho' ar Mungú 2004

Gurtleemuú Mungú dír múk Israeliwo

¹ Gawaá adoorihe aníng an yaahaás, «Mungú mukós gwa sí'i?» Aasla'áy. Gwa si'iiká. Asma tam anuú kilá' a heé Israeli, oo xwaylár Abrahamu, oo tlahhoó Benyamini.

² Mungú mukós kudá' aa qaroó iimír aáng wa tsawaár, gwa si'iiká. Ahaá, kuungá' a xua'aakáhe adoodá' Gooi i kat daanduú Eliyawo, qoomár inós iwa sihhiít dír geeraá Mungú, as múk Israeli nguwa sakwasleemuuti.

³ Inós iri oó', «Aáko, inooín aaruuseerók kaa tsuú/, nee kiteeriiwók awa ilahhooa kaa feé/. Heé aa meet a aníng kilooeé', nee hamí inooín aníng i gaasár wa slaiyá'.»

⁴ Ala Mungú gár inós ngwa báy a milá? Guna báy, «Aníng múk kumér faanqw u koóm tam hamí oo Ba'ali gwa i tumbarara'atiiká.»

⁵ Adoorí an adór hám ta i diriiaan qoomaarihe. Tam hamí múk niiná i deer oo aa meet, kudá' Mungú aa tsawaár as gurtleemuuwós.

⁶ Mungú inooín gina tsawaár as gurtleemu, ala a as tlehhma'aá inooín naa tleehhiiti'iiká. Asma geera bar gina tsawaár as tlehhmi'i, geera gurtleemuuwós a tawo.

⁷ A adoomá daxta? Gadaádá' múk Israeli aa leelehhiít, gaa slayká. Ala mukdá' taa tsawaár gaa sláy. Awa hatlá' kiri mune gawdeés,

⁸ adoodá' kara gooín, «Mungú muner'ín gari iilooeés, ilaaín giri taampúy, nee inooín giri iiawasleés. Nee adoorí an adoodá' inooín tay dirii'i tam ay laarí.»

⁹ Nee Daudi sleeme i kaahi, «Muruú /aymar'ín masók i tsaaxweeli tleehhiit amor'ine, nee dukuutsmo, as inooín tawa dukuutsi nee slaasláwar'ín ngiri slayá'.

¹⁰ Ilaaín i giwiye' as matawa gaa ár. Nee daandeemooín i koongaagooiye' ay alhhe'eesoó slafingw'ín.»

Ba/amár múk xoordaá hatlá'

¹¹ Gawaá adoorihe aníng an yaahaás, xáy inooín tana dukuútsi as tawa huui? Aasla'áy, a adoosingeeká. Ala múk Israeli iwa huú', ba/ama niri hardát dír múk xoordaá hatlá'. Adoorí ina tleehharút as kahhó' múk Israeli gur'e nguwa ohiin.

¹² Huu'umaá múk Israeli tsuuqaá yaariir ngaa huwiyé' dír múk baraá yaamu sleémeerowo. Nee as adoodá' múk Israeli iwa /aarúy, múk xoordaá hatlá' tsuuqa gay sláy. Ala gawaá adoorihe, faarór múk Israeli bira bó/, tsuuqa daqaní ki ak ló'wa ur.

¹³ Kuungá' múk xoordaá hatlá', án daxta an axweés nee kuungá'. Aníng a Ya/abusmoó Mungú oo amór múk xoordaá hatlá'. Aníng ilakaaharu un tlehhiít baraá gadiyér'eé' tihe.

¹⁴ Asma aníng gár ni slaa' a masók múk xooror'eé' gur'e gun ót, as bahh'alé ngiwa ba/amis.

¹⁵ Asma inooín qoomár kiwa sií', muu sleémeero kuna haraki/ís dír Mungú i alé. Ala qoomár inooín birka ya/án nee Mungú, adoorí gár ni hup a milá? Gár ni hup a slafiíngoóke dír mukdá' aa qatli?

¹⁶ Mukatmoodá' taa geerií tleéhh barnaxes ku hhoohhoó', as adoodá' kuwa haniís amór Mungú, xwaanteedár mikaáte kara tleéhh sleémeero ka hhoohhoo'. Nee barnaxes dee/aruú xa'ano ku hhohhó', haleemi sleeme ki hhohho'.

¹⁷ Ala daxta a adoorí, múk Yahudi a adór xa'anoó seituúni kudá' taa dahaás, nee múk xoordaá hatlá' a adór xa'anoó seituúni oo baraá sla/a, oo hee aa dahaasiiká. Haleemo bahh'alé awa xa'anoodá' taa dahaás kina tlaáq. Haleemaá hatlá' awa xa'anooduú sla/a, kiri haátl baraá xa'anoodá' taa dahaás, nee di/tá xa'anoodá' taa dahaás ngiri /ayiyé'. Kuungá' a adór haleemiidá' taa haátl.

¹⁸ Ala kuúng birti xirfayeemís dír haleemiidá' hatlae, inslaweek kuúng dee/aruú xa'ano u gagariindaaká, ala a kuúng dee/aruú xa'ano un gagarín.

¹⁹ Kuúng a kat, «Haleemiidá' kina tsaát as án tiwa didaádií hatli.»

²⁰ Ar ló', inooín kina tlaáq, ala gár kisa tlaáq a haratlintaaoowasler'ín. Ala kuúng a gawaá xa'anoodá' taa dahaás i dirí' as haratlintaao. Gawaá adoorihe, kuúng ma daara/aamaar, ala masók an da'ayumít.

²¹ Barnaxes Mungú haleemaá xa'anooduú kilá' gaa mayká tsatto, kuúng ka xu', kuúng un máya tsatto?

²² Gawaá adoorihe ana araán adór Mungú ir xaraásl, nee slám ku hhoó'. Inós i xaraasl dír mukdá' aa huui baraá tlakweema. Ala diroge ku hhoó', kuúng bar baraá hhooeemaawós wa kumaamít. Ala bar kumaamitká, kuúng sleeme tu adór haleemiidá' wa tsaat.

²³ Ala múk Yahudi sleeme, inooín barnaxes loohir'ín tidár haratlintaao wasl bar kaa máy, inooín ki ki/is didá' kiwa tlaáq. Asma Mungú gi ló'wa aleesláy ngiwa malé hatli.

²⁴ Asma kuungá' múk xoordaá hatlá' tunduna gawaá xa'anoó sla/atá wa tsaát, tunduri haátl gawaá xa'anoó taa dahaás. Múk Yahudi a adór haleemiidá' kilá' awa xa'anoodá' taa dahaás. Ala a gár ak inslaahh haleemiidá' taa tsaát kiwa ki/isi gawaá xa'anoodá' i dahhiya', ta haleemiidá' xa'anoó sla/ato.

Múk Israeli ku gurtláy

²⁵ Hhaee'eé', án gár ni slaa' a lu/aaráywí un xuá', as kuungá' miti kiloohúng xirfayeemisaara' as sagalooarhúng. Ala lu/aaráy a kwí, múk Israeli bahh'alé muner'ín aa gawduuduúr, ala ar har qoomár niina, ay dír múk xoordu sleémeero i dahi, kudá' ba/ám.

²⁶ Daqaní múk Israeli sleémeero i ba/án. Asma kaa gooín, «Ba/amusmo naa hardáh, amór i dahhi a amór Siyoni. Inós dee/anu sleémeero gu hingees dír xwaylár Yakobowo.

²⁷ Alqadoorí an alqadoodá' aníng ni tleehh nee inooín, qoomár tlakweemaaín bira hingeés.»

²⁸ Múk Israeli a wakuusér Mungú asma Ya/abtór hho' kawa sií'. Adoorí ina tleehharút as kuungaásingá' múk xoordu. Ala múk Yahudi a múk taa tsawaár nee Mungú. Gawaá adoorihe inooín Mungú gi slaa' as baabi'ii'ín.

²⁹ Asma Mungú gurtleemuú aa haniís gu alki/iiká, nee slám hee bar ngwa tsawaár, gu si'iiká aluuwo.

³⁰ Kuungá' múk xoordu, kuungá' aáng ana dee/aanuté' dír Munguhe, ala hám daxta gurtleemuú Mungú ugwa sleeré', as adoodá' múk Yahudi iwa dee/aanuút.

³¹ Múk Yahudi sleeme a adoodá'. Inooín hám naa dee/aanuutiyé' as adoodá' kuungá' gurtleemu kuwa sleeré'. Nee adoorí ina tleehharút as inooín sleeme gurtleemu kuwa slay aluuwo.

³² Asma Mungú muu sleémeero gwa máy kuwa tseegiti baraá dee/aanu, as kahhó' inós sleémeero ngiwa gurtlay.

Mungú i xirfuuti

³³ Ga/aaweek, xáy, daqaari'iimár Mungú adór kar úr, nee sagalooarós nee xu'utiro. Heé sakwasleemarós tsaahharo ga aleesláw a heemá? Heé lohuduuwós leelehhtuuwo gi aleesláw a heemá?

³⁴ Asma Gooi i kat, «Heé inslawoó Aako gu xuú' a heemá? Heé inós gu hara'ayiiyiím a heemá?

³⁵ Heé inós gwa gaárí haniis a heemá as inós kuwa bui aluuwo?»

³⁶ Asma mura' sleémeero inós guna tleéhh, slám i kumiit as aleesleemuuwós, nee in deer as inós. Inós i xirfuuti ay alhhe'eesaay wasle. Amin.