OBADIA 1 - Biblía Axweesantá Hhohho' ar Mungú 2004

¹ Kaangwí an iigu'utuú Obadia, adoodá' Mungú ngira oó' daanduú Edomuwo. Kángw amór AAKOÓ MUNGÚ daáhh ugwa axaasaán. Ya/abusmo kwaa ya/aáw amór xoordu, iwa kaahi, «Gimsé', tlawaaré', qwalaas, sihhiitaré', ti muxaán nee Edomu.»

AAKOÓ MUNGÚ xoorór Edomu ga muux

² Qaytsiít, iga niinaweés baraá tla/ángw xoorduwo, tiri waaqaá' ló'wa alé.

³ Daara/ángw muunaáwók ina al/agín. Kiíngadá' hotaatiim baraá mar'ór tlaa/é wa alé, kiíngadá' do'ók ugwa tlehh gawaá tlooma, hanoosáy a baraá muunaáwók i kat, «Heé aníng aweeriisaro i asláw a heemá?»

⁴ Tam aga gáwtí tsa/aandi adór gwareesi, tam do'ók ugwa tlehhi baraá tla/ángw tsatse/, AAKOÓ MUNGÚ i kaahi, «I /arara'aás gáwtá wá ale ay yaamu.»

⁵ Fisuuse bar naa fiisór eér, laqaá malguuse bar xweeraawo iga haraadát, xáy, harqoomoó tar tlay aqo kudá' ni aleeslay'aakáhe ar tleemuuwo. Múk sabiíbuú bu'uúm bira bu'úngw áy, ahaá, sabiíbu lo'o qwaareesa ku geexaykáhe. Ala wakuuseerók do'ók gun paapa/ás.

⁶ Kuungaá múk Esáu, muruuhúng kwaa hayóh, nee daqaari'iimarhúng kaa haraadáh.

⁷ Mulqerhúng ar kilá' nuna dáhh nuri tlatlahhás baraá yaamuuhunge. Mukdá' nee kuúng waydúr hotaatimá' nuna al/aáy nuri ar baá/. Kudá' nee kuungá' naanuú em'aaemá, tsaaxweeli ngaa qaasiyé' dír ya'aawók, tawa kaahi, «Laatí, gár i aleeslay iqo káhh.»

⁸ Anuú AAKOÓ MUNGÚ kuungá' nu yaahamiís, xáy, baalaasinge múk sagalooár koóm u qwaareesaakáhe baraá Edomuwo, dinkwa nee mukdá' xu'tír kooma gawaá tloomár Esauwo?

⁹ Tam kiíng gixsár Temani sleeme, miguuseerók iri amooqwaqwdiín, ay dír umuúqo heewo kway gaasi gawaá tloomár Esauwo.

Gár xoorór Edomu kas muxi

¹⁰ Asma tlakweemaadá' taa tléhh dír hhiyaawók Yakobo, alsi'imu in oh, kiíng tari suqút ay alhhe'eesay wasle.

¹¹ Bál gixsár Yerusalemu kawa haraadarahi, kuungá' ana bihhií sihhité', dahaaye daqaari'iimarós gari ar tleér, nee mukdaáduú tsifir hatlo kaangardaá gixsa kiwa waaraáhh, tsawdo kari tleéhh as Yerusalemu, qoomaadae kiíng an adór heé wák baraá tla/ángw mukdae.

¹² Ala geeraawo deelór hhaeehúng niwa isaa qeqtiné' ana i qaytsiti'iiká, nee ana qwalaala/i'iiká, nee slám qwanoó múk Yuda una waaqasesendi'iiká tam deelór slahh'amuuín ana ar laahhandi'iiká.

¹³ Geeraawo ana dati'iiká baraá gixsár muk'eé' bál deelór slahh'amaayer'ine. Geeraawo masók qatlor'ín ana sa qwalaala/i'iiká i qaytaaro bál deelór slahh'amuine. Tam daqaari'iimar'ín geeraawo masók ana haasaáng wa hubi'iiká bál deelór slahh'amuine.

¹⁴ Geeraawo masók ana sihhiti'iiká dír loohír waatsara, as mukdaádá' naa /akumiit kuwa ohiinda'. Geeraawo masók muk'ín kudá' aa meet una duxká amór wakuuser'ín bál deelór slahh'amuuwo.

MUNGÚ xoordu gi sakwasleemuut

¹⁵ Asma deelór AAKOÓ MUNGÚ xoordu sleémeero ngiwa sakwasleemuuti naa tseewuúr. Adoodá' taa tlehhé' an adór tindi kuungá' i tleehhi. Tundun buu' ar harqoomoó tlehhmi'iihúng.

¹⁶ Asma adoodá' buhhtaaeé' kira xuúf gawaá tloomar'eé' tidá' hhoohhooe, an adoodá' xoordu ngir xufiitiis buhhtaaeene daqisleém, nin xufiitiyá' tari ba/uumiit oonitameero, nari hhaná' adór múk kaáhh baloó alé baraá yaamuwo.

Xoorór Israeli i baaliín

¹⁷ Ala gawaá tloomár Siyoniro múk ba/ám i deer, tloomarí tari tloomar'eé' ar hhoohhoo'. Nee múk doó Yakobo aalir'ín kari male inkii/.

¹⁸ Múk doó Yakobo iri adór asla tleehhiit, nee múk doó Yosefu iri adór tsángw asla tleehhiit, múk doó Esau iri hhaanslaá kaaharen tleehhiit, inooín asla giri hhaamís, slám hee tumu wák iri meetiiká baraá doó Esauwo. Adoorí an adór AAKOÓ MUNGÚ i kaahi.

¹⁹ Nee múk Negebu tloomár Esau kari aal, múk Shefela yaamaá múk Filisti giri aal, inooín yaamaá Efraimu kiri aal, nee yaamaá Samariaro, nee yaamaá múk Benyamini múk Gileadi giri aal.

²⁰ Xoorór Israeli tidá' taa loohatís baraá yaamaá Hala, yaamaá Foinike kin aal ay yaamaá Sarefati. Nee múk Yerusalemu kudaádá' taa loohatís baraá yaamaá Sefaradi, gixsár Negebu kan aal.

²¹ Slám mukdá' AAKOÓ MUNGÚ aa ba/amís ta hoot gawaá tloomár Siyonír wa ale, nee tloomár Esau kari sawaawuti'ín, AAKOÓ MUNGÚ tari waawutmooín.