NEHEMIA 9 - Biblía Axweesantá Hhohho' ar Mungú 2004

Hhu'uu'úngw tlakweemaaín

¹ Bál slahhangwduú kilá' tawa mibeeri tsár nee tsiyáhh, múk Israeli tari burumburiít as tawa gwaawin gunaydu ngaa tsiitiyé' nee sage kari hhapeérár slikín.

² Kudaá xwaylár Israeli tiri paraatliyé' dír xoordaá hatlae, nina sihhiitiyé' tlakweemaaín ngiwa hhu'uu'una' nee dakumisuú baabi'ii'ine.

³ Inooín tari sihhiít umuú heewo dirós nee dabér AAKOÓ MUNGÚ, Munguúín ar har afiqoomár hhaawakahe kari dir'ín i soomuús. Ar afiqoomár hhaawaakár aluudae nina hhu'u'uné' nee AAKOÓ MUNGÚ, Munguúín kuri sluufmiís.

⁴ Dirka gáwtí dirii' taa tleéhh as múk tlahhoó Laáwi, diirihe múk aa sihhiit a Yeshua, nee Bani, nee Kadmieli, nee Shebania, nee Buni, nee Sherebia, nee Bani nee Kenani. Inooín AAKOÓ MUNGÚ, Munguúín nguri i /aa/iyé' ar afór ur.

⁵ Aluuwo múk tlahhoó Laáwi ín Yeshua, nee Kadmieli, nee Bani, nee Hashabuea, nee Sherebia, nee Hodia, nee Shebania nee Petahia, muu nguri bayé', «Sihhiité', AAKOÓ MUNGÚ, Munguúhúng xirfayeemisaak, iimír iimu/uungw wasle ay alhhe'eesay wasle. Nee umuuwók kudá' xiríf ku diidi'iimisi, kudá' aa iia tleeruy ta tsuuqa nee xirif sleémeero.»

Firór hhu'u'uungw

⁶ Esra iri adoorír firín, «Kuúng kilók an AAKOÓ MUNGÚ an kudá' doori iga tlehh nee muruudá' sleémeero baraadá' hoota, yaamu nee umuúqo gár baraaká' hoota, tlawi nee muruú baraadae, kuúng an kudá' gi amohhe'eemiís as iwa kumiitiya' hotaango, nee daqtá gawaá doori sleémeero kuúng un sluufmís.

⁷ Kuúng an AAKOÓ MUNGÚ, Munguúdá' Abramu gwaa tsawaar, nguri baraá yaamaá Urír Kaldayór wa dúx, kuri umií tsát tay Abrahamu.

⁸ Kuri aán adór ir ganaá' dír geeraawoge, tari dirósí alqadiín xwaylarós kawa yaamaá múk Kana'ani i hanis, nee oo Hiti, nee oo Amori, múk Perisi, nee oo Yebusi, nee múk Girgashi. Al'axweesantók kari boo/és, asma kuúng tu inkihhím.

⁹ «Slahh'ámuú baabi'iirén una aán qoomár iwa baraá yaamaá Misrírí dirii'iya' nee alee/isaywók nguwa firiné' dír afaá tlawtá Shamuwo, kuúng ina iiárií qás.

¹⁰ Layu nee muruú waa/oo/amoro ina tlehhít dír Farao nee sagadiyuuseerós nee dír múk yaamuudá' sleémeero, asma kuúng ana xú' adór bariiseerén ngira baramaanuusiyé'. Kuúng umuuwók kuri iia tleerés ay laarí.

¹¹ Tlawi ana tla/aa qasís dír ilaaín wa aleeró, inooín tay waraáhh ar baraá tla/ángw tlawi ar yaamaá kaahaar. Ala múk Misri kudá' gaa eehar kiri kwáhh adór tlaa/anoó iiloó' i baraá ma'aá yaariir.

¹² tlaatla/aango ina geerahát ar uhmoó huunki nee xweeraawo ina geerahát ar uhmoó asla, as loohír tar oohi kawa gwa/aatis.

¹³ Nina gawaá doorí wa awét ay gawaá tloomár Sinai, tari axwés nee inooín. Kiri kángw hhó' beér, dabér ló' kari hanís, nee kaahír hhoe nee hara'ayaro.

¹⁴ Ar loohír Mose sagadiyusmoowoge kiri xu'utís deeloorók tidá' hhoohhoo' ar Sabaátoro, nee kiri ádbeér hara'ayarók kawa eehari nee dabeero nee kaahiroge.

¹⁵ «Qoomár tawa qwariiti, ina muruú /aymár gawaá dooraá daáhh i hanís. Qoomár tawa waxiít, ma'aá wahaangw ina baraá tlaa/ár wa dúx. Sleeme kiri ádbeér yaamuudá' taa al'axwés kiwa aali.

¹⁶ Ala inooín nee baabi'iirén tay daara/uút, da/ewer'ín ngay gawdeesiyé', hara'ayarók eeharto ngari si'iyé'.

¹⁷ Niri iialooeesi'iiká, muruú waa/oo/amo oo taa tla/angw'ín wa tléhh ngwa inslay'iiká. Da/ewer'ín ngay gawdesiyé', geeraharusmo ngway qaasiyé' oo gi ki/ís baraá lawaali'iimár yaamaá Misri. Ala Mungú, kuúng tu inslaáhh gurtleemuwo, a gurtleemuú koón nee tsuuqaawo, kuúng tu inslahheeká buhhtaawo. Kuúng sla'aarirók i warqeeraaká, as adoorí inooín iga kwahhká.

¹⁸ Tam qoomár slaqsayduú dama nguwa tleehhiyé', tawa kaahi, ‹Kwí an munguúrén oo taa duux baraá yaamaá Misriro,› /oosliislíngw urén nguna kaahiyé'.

¹⁹ Kuúng ar gurtleemuuwók kudá' yaariire iga kwahhká baraá xaanxáy ale. Uhmoduú huunki inooín gaa geeraharahaar tlaatla/ango i ququtlatlinká dír geeraaine, tam uhmoduú asla xweeraawo loohir'ín gaa tsa'aas sleeme i ququtlaatlinká.

²⁰ Ina qeeruuwók kudá' hhoóí hanís as ngiwa hara'ayin, maána ana hanís tawa muruú /aymar'ín nee ma'aá wahaangw as waxer'ín ngiwa tse'eesiya'.

²¹ Ina amohhe'eemís baraá xaanxaywo kureeri mibeerí tsiyáhh tam gár naa dakuusiyé' i káhh, tlabaaín naa qatli'iiká, tam ya'aaín na xir'imiti'iiká.

²² «Ina pa/aángwí hanís oo waawuti'iima nee xoorduwo kiwa arba/i, umuúqo bihhiiwo ina muruú yaariír i tléhh. Yaamaá Heshboni ngina arba/iyé' kudaá waawutmo Sihoni aa sawaawuti'ín. Sleeme yaamaá Bashani ngina arba/iyé' kudaá waawutmo Ogu aa sawaawuti'ín.

²³ Xwaylar'ín kari tlahhás adór tsatse/uú doori, kiri húp ay baraá yaamuudá' taa baabi'ii'ín i al'axwés as ngiwa aaliya'.

²⁴ Naagáy xwaylarí nay hardát yaamu ngiwa aaliya', múk yaamuudá' kuri arbaá/. Múk Kana'ani kway gawaá dabaaín i qás dinkwa nee waawitaáine nee múk yaamudae, as adoodá' i slaiya' ngiwa dir'ín i tleehhiya'.

²⁵ Gixsadudaá koo/i gawden ngina ar tlayé', yaamaá daqaari'iimár koomá' ngina hayoohiyé', maraydá' muruú yaariír koomá' oo hhohhó', nee hhaleeridá' taa foliiti, nee qamaá sabiíbu, nee seituúniro dinkwa nee xaa'aá yaariir awa mamaá koomá'. Gawaá adoorihe ngiri /ayiyé', nay aaxiyé' niri wahhditiyé', hhooeemawók ngay saqwala/iyé'.

²⁶ «Ala i inkihhimuú kon'aaká diroge, uri si'iyé', dabeerók ngay mayé' nee aaruseedá' gaa gurbu'uun as kuúng uwa iki/iya' ngina tsu/iyé', /ooslislíngw urén ngway ló'wa kaahiyé'.

²⁷ Aluuwo kiri qás gawaá dabaá wakuuser'ín, wakuuser'ín giri slahh'eemís. Ala qoomár tawa baraá slahh'eemisií dirii'i, kuúng una i /aa/iyé', kiri iiárií qás iimír gawaá doorí wa alé. Nee ar gurtleemuuwók kudá' yaariire geeraharuusér inooín gi tuu/ gawaá dabaá wakuuser'ine kari hanís, kingiri tuú/ gawaá dabaá wakuuser'ine.

²⁸ Alaá amohhooa ngiwa slayé', tlakweema ngiri male tleehhiyé', kuúng kiri meér gawaá dabaá wakuuser'ín ngiwa sawaawuti'ina'. Tam adoorihe kuúng uwa i /aa/iyé' kiri iiárií qás iimír gawaá doorí wa alé, daqtá yaariire ina ba/miimís ar har qoomoó gurtleemuuwók.

²⁹ Ina gurbu'uún as daberók ngiwa i ki/iya'. Ala ar sagagawduuine hara'ayarók ngaa iialooeesi'iiká, kaahirók ngina si'iyé' tidá' handá' geeraawo bar hee ngaa iialooeés in hoot, inooín sager'ín ngiri gawdeesiyé' nee da/ewer'ine, kuúng uri si'iyé' iialooeesaro.

³⁰ Ina saqiqtlaatliín har afiqoomár kureeraá yaariire, kiri gurbu'uún ar qeeruuwók ar loohír aaruseerók, tam nee tihe naa axasi'iiká. Gawaá adoorihe kiri qás gawaá dabaá xoordaá yaamuudá'.

³¹ Ala as gurtleemuwók kudá' yaariire iga meeriiká tawa ak hhan laqaá kiwa kwahh, kuúng a Mungú tsuuqaá koóm nee gurtleemuuwo.

³² «Gawaá adoorihe, aá Munguúrén, Munguú úr oo /uuruú koóm nee oo dae tlaáq, kuúng alqadorók an ohiín nee sla'aarirók i warqeeraaká, slahh'amaayedá' atén taa sleer nee waawitaárén, nee múk urén nee kaahamuuseero nee aaruseerene, baabi'iirén nee mukók sleémeero iimír qoomár waawituú Ashuru ay laarí, kuúng ma gár niiná wa araar.

³³ Tam adoorihe kuúng gan'amu u koón baraá muruuwí sleémeero atén taa slayi, asma kuúng tu inkihhím, atén a tlakuuse.

³⁴ Waawitaárén nee geeraharuuseerén, nee kaahamuusero, nee baabi'iirene, dabeerók nga ohi'iiká nee hara'ayarók ngaa iiárií qaasi'iiká, nee gurbu'uungók sleeme kudá' taa dir'ín i ó'.

³⁵ Inooín kuúng ugwa sagadiyusi'iiká baraá waawuti'iimar'ine nee baraá hhooeemawók kudá' yaariir taa dir'ín i hanís, tam baraá yaamuudá' yaariir awa hhapér hhó' koomá', inooín tleehhmi'ii'ín kudá' tlakw ngaa may'iiká.

³⁶ Ga/aaweek, atén a lawaale laarí, atén a lawaale baraá yaamuudá' taa baabi'iirén i hanís as mamuuwós kiwa saqwalaala/i nee qeemuuín kudá' hhoe.

³⁷ Daqaari'iimár yaamuuká' kaa ar tláy nee waawitaádá' kuúng naa qás atén tiwa sawaawuti'ii'ina'. Inooín slaqoorén ngin baliitiyá' nee hikwaarene, atén a baraá slahh'amaayér ur.»

Múk al'axweesani ga dugeenií qamiím

³⁸ As tí aa tleehharuuti atén alqadór gawit an qaasaán ar gooi, nee mukrén oo urén, nee múk tlahhoó Laáwiwo, nee kaahamuuseero. Inooín dugeeni'ín ngi qaasiyá'.