NEHEMIA 8 - Biblía Axweesantá Hhohho' ar Mungú 2004

¹ Aluuwo muu sleémeero baraá Yerusalemuro tana burumburiít adór heé wák baraá afeenír geeraá Afkuduú Ma'aay, Esra kuduú goousmo nguna ádbayé' kitaábuú dabér Mose nguwa huwi, tidá' AAKOÓ MUNGÚ aa dír múk Israelírí haniís.

² Esra kaahamusmoó Mungú kitaábuú dabér Mose nguri huúw dír geeraá boo/oó muu oo hhawaate nee /ameenaaro nee kudá' gaa axaasaro ngi aleeslawá' nee tsaahharo. Slahhángw faanqw baldae a wak.

³ Inós kitaábuuduú dabe guri soomuús dír afeenír Afkuduú Ma'áy wa ale iimír matlaatlér boo/ ay /ametleemu, dír geeraá hhawaateedá' nee /ameenaaro, kudá' tsaahha ngi koomá'. Muu sleémeero kángw baraá kitaábuú dabe kway iiárií qaás.

⁴ Esra kuduú goousmo iri sihhiít dirka taa tleéhh ar peehháy as sihhtano, muko iri bihhiiwós awa doó /iyáy i sihhiít. Mukwí an ín Matitia, nee Shema, nee Anaya, nee Uria, nee Hilkia, nee Ma'aseya. Bihhaá dakós oo doó basayhe a ín, Pedaya, nee Mishaeli, nee Malkiya nee Hashumu, nee Hashbadana, nee Sekaria nee Meshulamu.

⁵ Esra kitaábu guna gweér dír ilaá muu sleémeero wa alé, asma i gáwtí dirii' dír muko, qoomár nguwa gweér muu sleémeero tari sihhiít.

⁶ Esra AAKOÓ MUNGÚ guri xirfayeés, Munguúdá' Úr. Muu sleémeero iri ilaaóh tawa kaahi, «Amin, Amin.» Dabaaín ngaa gáwtí tleesiyé', naagáy sager'ín ngay xupu'uusiyé', AAKOÓ MUNGÚ ngway sluufisiyé', giti ngiri yaamúr oohiyé'.

⁷ Yeshua nee Bani, nee Sherebia, nee Yamini, nee Akubu, nee Shabetai, nee Hodia, nee Ma'aseya, nee Kelita, nee Asariya, nee Yosabadi, nee Hanani, nee Pelaya, inooín a múk Laáwi, dabeedá' taa soomuús kari múkwí waagwediít, qoomaarihe umuú heewo aa dirós i sihhiít.

⁸ Inooín ngina soomusiyé' baraá kitaábuú dabér Mungú wa ale, ar afór ta axamiisi, tam gár i kat kari alki/iít, naagáy muu gari tsaáhh tidá' taa soomuús.

⁹ Nehemia kuduú ga/aawusmo nee Esra kaahamusmoó Mungú nee goousmo, nee múk tlahhoó Laáwi kudá' muu gwaa intsaahhatis, muu sleémeero kuri báy, «Baalaarír laarí ka hhoohhoo' dír AAKOÓ MUNGÚ, Munguúhunge, ma tsuunqumisaara' laqaá sleeme ma /aa/amimaara'.» Asma muu sleémeero ina /aá/ /ayma'aá baraá kitaábuuduú dabe kiwa axaás.

¹⁰ Naagáy inooín giri báy, «Tlawsé', muruú wahhaár /ayaak, nee muruú nuqnuúq wahaak, slám kudá' taa gár i amohhe'esiiká tós huwaak, asma baalaarír laarí ka hhoohhoo' ar Aakoorén, ma gurhamutaara', asma qwal/uú AAKOÓ MUNGÚ ni haniisi a /uuruuhúng.»

¹¹ Gawaá adoorihe, múk tlahhoó Laáwi muu sleémeero guri xasltís, tawa kaahi, «Xasliité', ma gurhamutaara', asma baalaarír laarí ka hhoohhoo'.»

¹² Muu sleémeero iri tláy tawa /ayin nee tawa wahan, muu kuri tooín huúw, qwal/uú úr kway tleéhh, asma /aymi'iidá' taa dir'ín i alki/iít ngaa tsaahhiyé'.

Deelór ur ar Israeli

¹³ Tam bál tsare mukdá' urén oo tlahh'aá baabi'i sleémeero nee kaahamuusér Mungú nee múk tlahhoó Laáwi, Esra kway haraburumburiít inósuduú goousmo as /ayma'aá dabe kiwa intsaatsahhi.

¹⁴ Nee adór kara gooín baraá dabeero kari sláy, adoodá' AAKO aa oó' ar loohír Mose, as kahhó' múk Israeli iwa baraá isleerí wa hooti, deelór ur ar slahhángw faanqw.

¹⁵ Inooín adoorí ngiwa alki/itiya' baraá gixsaduuine, baraá Yerusalemuro tawa kaahi, «Tsa/amé' gawaá tlom'i haleemaá seituúni ngi hubá' nee awa seituúnír sla/a, nee awa xa'anoó ta bay hadasi, nee haleemaá slaansla nee awa xa'anoó yangaariír as isleeri tleehha ar adór kara gooín.»

¹⁶ Naagáy muu sleémeero tari ti'iít haleemiidá' kingiri huúw, isleeri ngiri tleehhiyé' umuú heewo gawaá daárír do'ós, nee baraá afeenír maray'ine nee baraá afeenír Doó Munguhe, nee baraá afeenír Afkuduú Ma'aay, nee dír afeenír Afkú Efraimu.

¹⁷ Dinku'uumár mukdá' sleémeero naa waatl baraá looháy wa aleeró, isleeri ngiri tleehhiyé', nay baraadá' wa hootiyé', asma iimír de'emaá Yoshua garmoó Nuni tam ay baalaadá' múk Israeli adoodá' gaa tleehhiiká. Qwal/uú yaariír iri deeruút.

¹⁸ Slám umuúqo baalaaro iimír iimu/úngw wa tleemu ay bál alhhe'eesáy aqo gana soomamuús baraá kitaábuú dabér Mungú wa ale. Inooín deelór ur kay tlehhiít, deelo faanqw, bál dakaate burumburiita kay tleéhh ar adoodá' kara oó'.