NEHEMIA 6 - Biblía Axweesantá Hhohho' ar Mungú 2004

Nehemia kuwa geewaqaát

¹ Sanbalati nee Tobia nee Geshemu, heé Ma/arabu nee wakuuseerén tidár hatlá' kawa axaás adór koo/i ngira tleéhh nee dír foox i káhh baraawose (tam qoomaadae afér do' aga sihhtisiikahe).

² Sanbalati nee Geshemu muu nguna amor'eé' i ya/aawiyé', ta kaahi, «Qwaláng ti doogaán baraá yaamaá Ono.» Ala inooín nina tsabiné' aníng iwa gár tlaákwí tleehhiya'.

³ Aníng ya/abuuse ana amor'ín i ya/aáw ana oó', «Gadiyeérí ni tleehh ka ur tam daqeemuú amorhúng ngu aleeslawaaká, hám gár gadiyeé ngis maw nay /eét amorhúng a milá?»

⁴ Inooín nina kumiitiyé' ya/abibingo ay sagaáwa tsiyáhh as niwa amor'ín kaw. Ala aníng ina mu/aywaáts ar adoodár kilá'.

⁵ Aluuwo Sanbalati lawaalmoowós nguna malé ya/aáw sagaáwa kooane, nee barwár taa tseegiiká ngin dákwár kón.

⁶ Gár taa gooín a tí, «Kangwko ayeemo gaa aleetsaát, Geshemu kaangwí gu looeemá wá kón. Kuúng nee múk Yahudi aga tsabiindé' tawa dee/aanuta', an gár koo/isíng kas tlehhita', nee kuúng ana tsabiín kiwa sawaawuti'iin, an adór ta kaahi.

⁷ Kuúng aaruuse aga qás as kuúng uwa alki/itiya' baraasá Yerusalemuro tawa kaahi, ‹Waawutmo i deer baraá Yudawo.› Ala daxta waawutmo Artashasta ku kaangwí báy. Gawaá adoorihe kuúng qwaláng kaangwí u dinkwár wa axweesaán.»

⁸ Aníng muu una amoorós i ya/aáw as kuwa bay, «Gár adór tisíng ta kat aa tleehharutká, ala kangwsíng kuúng kilók una sagók ar sleér.»

⁹ Asma inooín adoorí kana tleéhh as tiwa dae tsatiya' tawa kaahi, «Inooín i daba' tsatiitiyá', nee gadiyeé ngiri harslaaqatiyá'.» Ala aníng Munguúeé' nguri firiím niwa kah, «Aá Mungú, kuúng dabaaeé' /uurií qaaseek.»

¹⁰ Ana dáh baraá doó Shemaya, garmoó Delaya, garmoó Mehetabeli kudá' taa tseék, inós iri báy, «Ti doogaán baraá Doó Mungú, nee afér Doó Mungú kari tseegaán, asma xweeraawo inooín nin hardihiyá' as kuúng uwa gaasiya'.»

¹¹ Aníng niri oó', «Xáy heé adór aníng in gówi? A gár milá heé adór aníng iwa dahi baraá Doó Mungú as slafiingw nguwa /iis, aníng a dahaaká.»

¹² Aníng ngiri tsaáhh adór heé ngwaa ya/aaw tar Munguheeká, ala inós aaru'uumarí ngiwa ooi daanduueene, asma Tobia nee Sanbalati nguna peésaárí haniisiyé'.

¹³ Inooín nguna peésaárí haniisiyé', as aníng niwa da'ayuut, nee tlakweema ngiwa tleehh. Gawaá adoorihe inooín pa/aangw nguri slayá' oo iwa uma hhitina' nee iwa niqina'.

¹⁴ Mungú nguri firiím, iri oó', «Aá Munguúeé', muruudá' Tobia nee Sanbalati naa tlehhahhitiyé' inslaweek, tam aaruso'oodá' ta bay Noadia, nee aaruuseedár hatlae, kudá' aníng iga dae tlaaqiye'.»

Gadiyeé kawa hhe'eés

¹⁵ Naagáy bál slahhángw Eluli tawa mibeeri tsár nee kooán koo/idá' iri hhooeér. Deelo kaa hhe'eesaán mibeeri kooán nee tsár.

¹⁶ Ala wakuuserén sleémeero kaangwí nguwa axás, nee sleémeero kudá' taa harweeriye' tari da'ayuút, niri kilooín mune si'iyé'. Asma ngina tsaahhiyé' adór gadiyeérí sleémeero kara tleehhaán ar alee/isoó Munguúrén.

¹⁷ Slám baraá deeloodae múk urén oo Yuda, Tobia kuna barwadaá yaariír i huwahuúw, nee awa Tobia ngiri slaslayé'.

¹⁸ Asma baraá Yudawo múk yaariír inós gwaa lo'ór /aymiís, asma taatoó hareerós a Shekania garmoó Ara, nee Yehohanani garmaawós dasír Meshulamu, garmoó Berekia gana duúx.

¹⁹ Slám hhooeemaawós ngina dir'eéní aainé' nee axweesante'eé' ngina amoorósí ki/imaamisiyé'. Tobia sleeme aníng ina barwadaá dae tlaqúwí gooaaín.