NEHEMIA 5 - Biblía Axweesantá Hhohho' ar Mungú 2004

Narkuute ka baramaanuus

¹ Aluuwo qununu/oó yaariír nina dáh baraá tla/ángw muko, hhawaate nee /ameenaaro nina qununu/iyé' as hhaeeín awa Yahudi.

² Asma bahh'alé tana káh, «Atén nee daaqayrén nee dasuurene ti úr, ala masok angaáno un slawaán oo ta /ayaan as kahhó' mawa qatlaán.»

³ Bahh'alé tana káh, «Atén qamuurén nee maraywo nee sabiíbuuwo ina arhaanír wa qaasaán as angaáno kuwa slawaan asma qwari.»

⁴ Slám kookaariya' tana káh, «Atén peésa ana kirikaán as ohmér waawutmo kawa buaan daanduú qamuurene nee sabiíbuurene.

⁵ Ala slaqoorén aqo adór slaqwaá hhaeerén, na/iirén aqo adór na/ii'ín. Laatí daaqayrén nee dasuurene ina dahasaán baraá lawaali'iima, dasuurén bahh'ale i baraá lawaali'iima. Ala adoorí ba/to a aleeslawanaaká, asma múk yaariír i qamuurén kón nee sabiíburene.»

⁶ Aníng qununu/ay'ín kwí nguwa axaás niri ló'wa buúhh.

⁷ Adór ni /iis ngay leeleéhh. Tiri awaán nee mukdá' urén nee geeraharuuseero, ngiri báw, «Hhaeehúng iga /aytiindé'.» Aníng muu nguri burumbuúr as kahhó' nee inooín tiwa axweesani tlaxuna'.

⁸ Ngiri báw, «Ar aleesleemuú ta koomana hhaeerén awa Yahudi in tlaxumaán kudá' taa weerimiís dír múk xoordaá hatlá'. Ala mis sla'á' kiwa malé weeramisa', bar atén in tlaxumaán?» Ala inooín tari qartlamiít, tam /aymuú taa oó' i kaahh.

⁹ Aluuwo ngiri báw, «Adoosíng ta tlehhita' i qoondaaká, xáy i harindaakáhe kuungá' Munguúrén kuwa ilaiwa/a' as xoordaá hatlá' kudaá wakuuseerén kiwa ilaa/i mitiwa niqimís.

¹⁰ Anuú kilá', nee hhaee'eé', nee sagadiyuuser'eene peésa an kirkitimisaán nee angaánoowo tam aldaafi a sla'aanaaká? Na'asé' muruusuú aldaafi mawaak.

¹¹ Laarír kilá' qamuuín ki/isaak, nee qaamaá sabiíbuuwo nee awa seituúni nee maray'ine, nee peésaadár aldaafiro, nee angaánowo nee difaáiro nee di/ito, tidá' kiwa ohme uhiindé'.»

¹² Inooín tay oó', «A ki/isán tam gár kiwa iinusaan i káhh. Adoosíng naa ó' a tleehhaán.» Naagáy kaahamuusér Mungú ngiri dír geerií ateét, nee geeraharuuse sleémeero lo'o ngiri /ayiyé' dír geeraá kaahamuusér Mungú wa alé, as adoodá' ngiwa tleehhiya' ar adór ngira al'axweesiyé'.

¹³ Tlabaaeé' ngiri kuukuú', niri oó', «Umuúqo heé adoosíng ga tleehhaaká ku kukuui nee Mungú, ngu duuxi baraá do'ose nee baraá gadiyeérose. Ku kukuui nee i gaa wasleesi.» Boo/aydá' sleémeero tari oó', «Amin», Mungú kuri xirfayeés. Muu adoodá' ngira al'axweesiyé' ngiri tleehhiyé'.

Gurhhooár Nehemia

¹⁴ Iimír aníng tiwa qaás tawa ga/aawusmoó yaamaá Yuda kureeraá mibaá nee tsár iimír kurkú mibeeraá tsár ay kurkú mibeeri tám nee tsár oo waawuti'iimár waawutmo Artashasta, aníng muruú /aymaadá' ga/aawusmoó wa hariím ugwa /ayiiká, tam hhaee'eé' sleeme ngwa slay'iiká.

¹⁵ Ga/aawuuseedá' aa giiriin a huwaá ilo' dír muko as iwa muruú /aymár iinuusiya', nee difaáiro dinkwa nee shekeéli mibeeraá tsiyáhh ar peésa, slamí sagadiyuuser'ín muu guna sawaawuti'iín. Ala aníng adoosíng aga tleehhiiká, asma aníng Mungú u ilaiwawaá/.

¹⁶ Aníng ana ló'wa ilakaahareés baraá gadiyér tlehhmuú koo/irí /abeesaro, tam qamu iga tlaxwiiká. Sagadiyuuser'eé' sleémeero sleeme gadiyeérí ngina tleehhiyé' ar ilakaahara.

¹⁷ Tam adoorihe múk tsiiru nee mibeeraá kooán un /aymamiís umuú deelooro, baraakae múk Yahudi i deer dinkwa nee geeraharuuse, dimbé nee mukduú xoordaá hatlá' awa iinslawaay, oo taa i goow.

¹⁸ Umuú baálaaro as mukwí nguwa /aymamiis tina awií gaás nee bee/ángw hhohhó' lahhoó' nee koonka. Umuúqo alaá deelo mibaangw bira waaráhh tlakwa'aá kaahari awa difaái awa yaariir in hanmamiís. Dinkwa nee tí sleémeero aníng hariímár ga/aawusmo aga iinuusiíká, asma muu umuú deelooloro iwa baraá lawali'iimár gawit.

¹⁹ Aá Munguúeé', hám daxta hhooeemaeé' kuká' naa mukwí tleéhh inslaweek.