NEHEMIA 4 - Biblía Axweesantá Hhohho' ar Mungú 2004

Nehemia tlampa'amis gura baá/

¹ Sanbalati ngiwa axaás adór atén tar koo/ír tlehhitaán, iri ló'wa buúhh, tiri iimu/ún niqmisuuwo

² dír geeraá mulqeerós nee daqtá slaqwaruuse ar Samaria, iwa kaahi, «Múk Yahudi kwí daqatlakwén, mi /imiis? Xáy, gár i slaiya' a gixsarí ngi /abeemár tleehhiía? Xáy, ilahhooár muruú ta tsu/i ngi haniisía? Xáy gadiyeérí ngi hhe'eesiía looár wake? Xáy, tlaa/aá taa buruumbuúr baraá xwaansláy ale, nee awa taa daá/ ngiqo aleesláy'a ngiwa ar tleehhitiya'?»

³ Tobia heé xoorór Amoni kudá' aa bihhaawós i sihhiit sleeme iri oó', «Kár gár i tlehhiitiyá' a milá? Baré tam intsaangw koo/ir'ín tí birngi i tsa/ana aqo gan daahh!»

⁴ Naagáy aníng Mungú nguri firiím niwa kah, «Aá Munguúrén, niqimisuuín kwí iiárií qaaseek, waaqaqauuín kuqá' gawaaín ti ki/is, inooín maweek ki haasaáng wa huwi ay baraá yaamaá dahi'iima.

⁵ Tlakweemaín mi baloó lu/aar tam tlakweemaaín mi fiitsaar, asma kuúng ugwa buhhtisiyé' dír geeraá múk doó tleéhh wa alé.»

⁶ Ala atén ana kumitaán gadiyeede, tay tla/auhuú koo/irí hardahaán, asma muu muunuú gadiyeé gu kón.

⁷ Alaá Sanbalati, nee Tobia nee múk yaamaá Ma/araábu nee oo Amoni nee oo Ashdodi kawa axaás adór gadiyér koo/ír Yerusalemu ir geerií kumít, nee adór wa/angwdá' aa porxomiit kur tipín ar adór qoom, inooín nina ak buhhiyé'.

⁸ Nay dinkwár wa axweesiyé', tawa haratlay ay Yerusalemu, as tawa slaqwi nee tlaahhi ngiwa huwiya' baraá gixsarí ale.

⁹ Ala atén Munguúrén una firiimaán, nee slamí xuumuuse ana qaasaán xweera nee tlaatla/aango as inooín kiwa baqi.

¹⁰ Múk Yuda tay qununuú/ tawa kaahi, «/Uuruú múk gadiyuús aa faák, nee xwaansloó loohisór slaá' ku yaariír. Daxta i ya/andaaká tawa kumitaan nee tlehhmuú koo/i.»

¹¹ Slamí wakuuserén ina ó', «Ngi xuiaaká sleeme ngi ariiaaká, ay dír nay hardahaan tla/angw'ín i ale, ngiri tsu/aán, gadiyeésíng ngay xasltisán.»

¹² Múk Yahudi kuduú baraá tla/ángw wakuuseerén wa hoót qoomár axweesanay'ín kwí kuwa axamiís ki/imaá yaariire nina hardarahiyé' tawa kaahi, «Nin hardihiyá' umuúqo dír i hootiia tiwa i haratlaya'.»

¹³ Naagáy, muu ngway qaás dír baraay didá' pa/ángw koom alaá koo/i. Muu una qoomeemeés ar gur'ér maray'ín ta paangadaá kón nee lawluwo nee ga/alduuwo.

¹⁴ Ngiwa ár adór muu ir daimiít, múk urén nee geeraharuuse nee muu sleémeero una báw, «Ma da'ayuumitaara' tam adór niiná, Aako na iinslawaak, adór kur úr, nee ir dae tlaáq, ala hhaeehúng na sageslaqwaak nee daaqayhunge nee dasuuhunge nee tlaawayhunge nee marayhunge.»

¹⁵ Ala wakuuseerén ngiwa axás adór axweesantaín ngira tsaahhaán, nee adór Mungú axweesantaín ngira xwaranxwaár, atén sleémeero niri ki/aán baraá tlehhmuú koo/i, umuúqo heewo iri kumiít nee gadiyeérós.

¹⁶ Iimír qoomaadá' wa tleemu ay geerií kumiita, tlaqtá sagadiyuuser'eé' tana kumiít nee gadiyér tlehhma, tlaqtá hatlá' in xuún, tawa lawlaá kon nee gaambu nee ga/aldu nee tlabaá ta da/eewór baqi. Geeraharuuseerén ta bihhaá múk Yuda,

¹⁷ kudá' koo/ír tlehhiitá', tam kudá' xooslaá tlehhma ngi loohisá', aqo nina kumiitiyé' nee gadiyeé, dákw wake i xooslaá loohiis, dawa kuqae i xooslarós ar slaqwarár kón.

¹⁸ Umuúqo heé doó tlehhiita i paángarós kón, gaa tseek gawaá kutl/amo amooqae i gadiyuus. Ala heé tarumbeéta ufaahha ku bihhaeéní tseéw.

¹⁹ Múk urén nee geeraharuuse nee muu sleémeero ina báw, «Gadiyeé ka ur, slám aa tsiyayaaxát wa/aamér yaariire, sleeme aga tsiyayaaxaataán ló'wa ale, gawaá koo/iro umuú heewo ku harasaáw dír hhiyaawose.

²⁰ Umuúqo dír ti diria ar tawa gadiyus bar tarumbeéta aga axás, ta'aimáng amoorén ar gaanslaay. Munguúrén atén ti sageslaaqw.»

²¹ Gawaá adoorihe tay kumitaán gadiyeede, tlaqtá muu xooslaá slaqwara gin ót iimír qoomár iimi bir pinsli'iimít ay dír tsatse/ i geehhoouy gawaá dooriwo.

²² Qoomaarihe muu una báw, «Umuúqo hhawaatuuwo nee sagadiyusmoowose nin deeliyá' baraá Yerusalemu xweeraawo, as tawa xuumaan xweeraawo, nee tlaatlaa/ango tari kumiit gadiyeede.»

²³ Ala aníng nee hhaee'eé' nee sagadiyuuser'eé' tam nee xuumuuseedá' nee aníng ti alkoomá', tlabaarén iga duuxaniiká, umuúqo heewo direne aqo xooslaá slaqwara gin kón dako qooma sleémeero.