NEHEMIA 3 - Biblía Axweesantá Hhohho' ar Mungú 2004

Koo/ír Yerusalemu ka /abeemiis tlehhmuuwo

¹ Aluuwo kaahamusmoó úr oo Mungú kudá' ta bay Eliashibu dinkwa nee hhaeewós kudaá kaahamuuse, Afkuduú Bee/aangw nguri tleehhiyé', ngway tsuuqiyé' iimír /Aampaadár Tsiiru wá tleemu ay /Aampaadár Hananeli.

² Nee bartaka múk Yeriko gana /abeés tlehhmuuwo, aluuine Sakuri garmoó Imri koo/i gari tleéhh.

³ Hhay Hasena Afkuduú Siyó guna /abés tlehhmuuwo, inooín nahhtós kari sihhtís afeerós kari qaás, nee muqsladá' afkú do' kway tseegi nee muqslaadá' kur tsegiiti sleeme.

⁴ Bihhikariya' Meremoti garmoó Uria, garmoó Hakosi gina /abeés tlehhmuuwo, nee bihhikariya' Meshulamu garmoó Berekia garmoó Meshesabeli gina /abeés. Dír hatlá' a Sadoki garmoó Ba'ana gana /abeés tlehhmuuwo.

⁵ Bihhikariya' kina tleéhh nee múk Tekoár daáhh ala geeraharuusér gixsa gadiyér daba' tlehhtuuwo ina sí', tidá' taa oó' nee sagesihhtuuser'ín.

⁶ Afkudá' Qarén kuna /abeés tlehhmuuwo nee Yoyada garmoó Pasea, nee Meshulamu garmoó Besodeya, nahhtós ngiri sihhiyé', afér do' ngiri qaasiyé' nee muqslaadá afkú do' kway tsegaagiti nee muqslaadá' afkú do' kur tsegaagiti.

⁷ Múk aluudá' gaa haar tlehhmuuwo a Melatia heé Gibeonír daáhh, nee Yadoni heé Meronotír daáhh dinkwa nee múk gixsár Gibeoni nee oo Misparo, mukwí kuna geerahaár nee ga/aawusmoó yaamaá yaaér Eufratero gayuú /uwa.

⁸ Dír aluudá' Usieli garmoó Harhaya, kuduú kareeramoó sahaábu, gana tleéhh. Dír aluudá' a Hanania kuduú mooyángw tlehhahhiít gana /abeés, inós Yerusalemu gari tleéhh ay amór Koo/idá' Iintlaaxw.

⁹ Dír aluudá' kana /abeés tlehhmuuwo nee Refaya garmoó Huri, kudá' úr oo tlaqtá yaamaá Yerusalemu ga ga/áw.

¹⁰ Yedaya garmoó Harumafu dír aluudá' gana tleéhh tidá' nee do'ós ti ga/aawá'. Dír aluudá' kana /abeés tlehhtuwo nee Hatushi garmoó Hashabneya.

¹¹ Malkiya garmoó Harimu nee Hashubu garmoó Pahat-moabu, dír hatlá' ngina /abeesiyé' tlehhmuuwo dinkwa nee /Aampaadár Asltá gufteeri.

¹² Shalumu garmoó Haloheshi, kudá' úr oo tlaqtá Yerusalemu ga ga/áw, nee dasuuwose, dír aluudá' ngina /abeesiyé' tlehhmuuwo.

¹³ Hanuni nee múk Sanoár daáhh Afkuduú Xatsa nguna /abeesiyé' tlehhmuuwo, afkós kuri qaás nee muqslaadá' kway tsegiiti nee tidá' kur tsegaagiti, didá' taa tleéhh tlenaangós a miíta tsiire tsiyáhh, tari hardáh ay Afkuduú Xwaansláy.

¹⁴ Afkuduú Xwaansláy Malkiya garmoó Rekabu, heé úr oo yaamaá Bet-hakeremu, guna /abeés tlehhmuuwo afeerós gari qaás, muqslaadá' kway tsegaagiti gari qaás nee tidá' kur tsegaagiti sleeme.

¹⁵ Nee Afkuduú Kutli kuna /abeés tlehhmuuwo nee Shalumu garmoó Kolhose, heé úr oo yaamaá Mispa, gari tuuntuúk afkudá' gway sihhtís nee muqslaadá' kway tsegaagiti nee tidá' kur tsegaagiti sleeme. Didár Tlahhsár Shelaro koo/i gari tleéhh ar bihhaá asalmoó waawutmo ay awnángw amór gixsár Daudi.

¹⁶ Dír aluudá' Nehemia garmoó Asbuke heé úr oo tlaqtá yaamaá Bet-suri gana /abeés tlehhmuuwo ay didár /aantár Daudi, ay dír tlahhsaadá' taa tleéhh, iri hardáh ay amór doó miguuse.

Múk Laáwi oo koo/i gaa tleehh

¹⁷ Dír aluudá' tlahhoó Laáwi gana /abeés tlehhmuuwo. Dír aluudá' Rehumu garmoó Bani gana /abeés tlehhmuuwo. Aluudae Hashabia heé úr oo tlaqtá yaamaá Keila didár ayaawós wa hariim gana /abeés tlehhmuuwo.

¹⁸ Dír aluudá' hhaeeín ngina /abeesiyé' tlehhtuwo, Bafai garmoó Henadadi, heé úr oo tlaqtá yaamaá Keila.

¹⁹ Eseri garmoó Yeshua, heé úr oo yaamaá Mispa, dír aluudá' gaa hat gana /abeés tlehhmuuwo, tidá' nee do'duú xooslár slaqwara ki baabatsi ti ga/aawá', ay didá' koo/i niwa warqeér.

²⁰ Baruku garmoó Sabai tlehhma guna iimu/ún didá' koo/i niwa warqeér ay afkú doó Eliashibu, kaahamusmoó úr.

²¹ Meremoti garmoó Uria, garmoó Hakosi, didár iimír afkú doó Eliashibu, kaahamusmoó úr, ay alhhe'eesoó do'dá' gana /abeés tlehhmuuwo.

Kaahamuusér koo/i gaa tlehh

²² Dír aluudá' kana /abeés tlehhmuuwo nee kaahamuuseedá' baraá xatstá hoot.

²³ Benyamini nee Hashubu dír aluudá' ngina /abeesiyé' tlehhmuuwo, tidá' nee dooín ti ga/aawá'. Asariya garmoó Ma'aseya, garmoó Anania dír hatlá' gana /abeés tlehhmuuwo tidár bihhaá do'ós.

²⁴ Iimír doó Asariya wa tleemu ay didá' koo/i niwa warqeér kana /abeés tlehhmuuwo nee Binui garmoó Henadadi.

²⁵ Palali garmoó Usai dír aa /abeés tlehhmuuwo a iimír didá' koo/i niwa warqeér ay dír /aampár doó waawutmo tidá' tseew bihhaá afeenár xuumuuse. Pedaya garmoó Paroshi

²⁶ dinkwa nee sagadiyuusér doó Mungú tidá' baraá Ofeli hoot, dír taa /abeés tlehhmuuwo a didá' nee Afkuduú Ma'aay ti ga/aawá' bihhaá da/aawe ay amór /ampár tleer.

Múk hatlá' oo tlehhma

²⁷ Dír aluudá' iimír /ampár tleér wa tleemu ay koo/idár Ofeli kana /abeés tlehhmuuwo nee múk yaamaá Tekoa.

²⁸ Didár Afkuduú Farasuuwo gawa, kaahamuuse gana /abés tlehhmuuwo, umuú heewo didá' nee do'ós ti ga/aawá' gana tleéhh.

²⁹ Sadoki garmoó Imeri dír aluudá' gana /abeés tlehhmuuwo, tidá' nee do'ós ti ga/aawá'. Aluuwo Shemaya garmoó Shekania kuduú xuumusmoó Afkuduú Da/aáw dír aluudá' gana /abeés tlehhmuuwo.

³⁰ Aluudae Hanania garmoó Shelemia nee Hanuni garmoó lahhoó' oo Salafu dír hatlá' kari /abeés tlehhmuuwo. Aluudae Meshulamu garmoó Berekia dír hatlá' gari /abeés tlehhmuuwo tidá' nee kutuwirós ti ga/aawá'.

³¹ Dír aluudá' iimír do'dá' sagadiyuusér Doó Mungú i hot nee halanuuseero, kudá' nee Afkuduú doó Tsegama ti ga/aawá', kuduú bihhaá do'duú gawaá kuqá', koo/idá' kana /abeés tlehhmuuwo nee Malkiya kuduú kareermoó sahaábu.

³² Nee tla/ángw kutuwidár gawa tidár bihhií dirii' nee Afkuduú Bee/aangw koo/idá' kana tleéhh nee kareeruú sahaábu nee halanuuse.