NEHEMIA 2 - Biblía Axweesantá Hhohho' ar Mungú 2004

Nehemia i Yerusalemúr káy

¹ Qoomár slahhángw ta bay Nisani oo kurkú mibeeri tsár oo waawuti'iimár waawutmo Artashasta, qoomár difaái iwa dír geeraawós i diri', aníng difaái ana óh ngay dír waawutmoó i haniís. Aníng aga baloó gurhamuutiiká dír geeraá waawutmoowo qoomár aa waarahhi.

² Naagáy waawutmo iri báy, «Ahaá bareemák gitse/aawók a adór kuqaá heé gurhamuút, bareemák kuúng uwa ga/aw a mak tiqká! Gaarí a har gurhaami kilós.» Aníng niri ló'wa da'ayuút.

³ Waawutmo nguri báw, «Waawutámo, sagók fur'a ngu laaleer, aníng mahár gurhamutaaká, bar gixsár /aantaá baabi'iieé' i dirii'iya' in iwiiwít ar deewa'ame, nee afeerós kaa hhaamiís ar asla?»

⁴ Aluuwo waawutmo Artashasta iri báy, «Gár kuúng ta aníng i firór wa sla' a milá?» Aníng Munguú doori nguri firiím.

⁵ Waawutmo nguri báw, «Waawutámo, bara aán i qoón nee anuú sagadiyusmoowók bira gurií bá/, na'ás huwáng ay yaamaá Yuda ay dír gixsadá' /aantaá baabi'iieé' i dirii'iya', as kahhó' ngiwa malé tleehh.»

⁶ Waawutmo aníng ina yaahaás, [Qoomaarihe waawuto'o sleeme a dír bihhiiwós i iwít] iri báy, «Amorqae deelo ka hhe'es magá', nee kuúng xaylá ni ki/?» Aluuwo waawutmo firor'eé' gari ya/án, aníng nguri afiqoomaárí oó'.

⁷ Aníng waawutmo nguri báw, «Waawutámo, bar aga aán i qoón, aníng barwár i haniisáng ar ni huuw amór ga/aawuusér yaamaá yaaér Eufratero gayuú /uwa, as aníng tiwa geemay niwa waaraahh ay yaamaá Yuda.

⁸ Sleeme barwito'ór Asafu kingi gooin, kudá' gartá waawutmo ga amohhe'eemiís, as xaai ngiwa haniisi awa nahhtá afér koo/ír gawit ar Doó Mungú, nee ar afér koo/ír gixsa, nee ar afér dooeé' kudá' ni hotaá aw.» Waawutmo muruudá' aníng ni fiririim nguri haniís, asma Munguúeé' kudá' hhoó' iwa dinkwa nee aníng.

⁹ Aluuwo nay hardáh dír ga/aawuuseedár yaamaá yaaér Eufratero gayuú /uwa, barwadár waawutmo ngiri dir'íní haniís. Sleeme waawutmo aníng ina geeraharuusér slaqwaruusér al ya/aáw nee múk faras ngwa i tsa/ani.

¹⁰ Ala Sanbalati heé xoorór Horoni, nee sagadiyusmoowós Tobia, heé xoorór Amoni, hardahmueé' nguwa axaasiyé', as xoorór Israeli ngiwa hhooeemáy tleehh, inooín niri ló'wa gurhamuutiyé'.

¹¹ Naagáy aníng niri Yerusalemúr i hardáh, ana baraadá' wa hoót deelo tame.

¹² Aluuwo nay xweeraá tláw aníng nee múk niiná, tam heé naa /aymuuwí báw i kaahh, kwí Mungú naa qaás baraá muunaáeé' alé, as Yerusalemu. Nee makiito'ór hatlá' ar na huúw i káhh aqo har daqwaydá' án naa daanda i tsa/ám kilós.

¹³ Xweeraawo ana tsee/áy ti'iít ar Afkuduú Xatsa ar loohír amór Hhalángw Dayshmoó kaw nee ar Afkuduú Ufuú Xwaansláy. Koo/ír Yerusalemu ana i qaytsiít, tidaádá' aa fee/it, nee afeerós kaa qororo'oós ar asla.

¹⁴ Aluuwo nay kumiít ay Afkuduú Kutli nee Tlahhsadár Waawutmo, ala daqway'eé' kudá' naa i tsa/ám dír ir waaraahhi gaa slayká.

¹⁵ Xweeraawo nay waaraáhh ar baraá xatsa, koo/ír gixsa ngiri tsee/aariím nari kií/ ar Afkuduú Xatsa.

¹⁶ Tam geeraharuuse amór án naa káw ga xu'uká tam gár aníng naa tleéhh sleeme, tam múk Yahudi ugwa ádbawiiká, nee kaahamuusér Munguhe, nee geeraharuuseero, nee múk urene, laqaá mukdá' geeraawo gadiyeérír gixsa ga tleéhh.

¹⁷ Naagáy ngiri báw, «Hamí slahh'amurén u ga/eerá'aáke adór Yerusalemu kara sluhhúy, nee afeerós kara qororo'oós ar asla. Gimsé', qwalaas koo/ír Yerusalemu a malé tleehhaán as mitiwa malé mureekeés.»

¹⁸ Aluuwo ngay dir'íní alki/iít adór aníng nee Mungú tar dinkwa nee adór ira hhooeemawós i tleéhh, kangwdá' waawutmo naa án báy nguri dir'íní alki/iít. Inooín tari oó', «Gimsé' gusé', tlehhma u iimu/uumaán.» Naagáy tari amohhe'eesiyé' as gadiyeérí hho'.

¹⁹ Aluuwo Sanbalati oo xoorór Horoni nee sagadiyusmoowós Tobia, heé xoorór Amoni, nee Geshemu, kuduú ma/araabumo, kaangwí nguwa axaasiyé' tina waaqasené', tiri waaqaqaaiyé', tari oó', «Gaarí ta tlehhita' a milá? Xáy kuungá' an sla'á'a waawutmo kuwa sia?»

²⁰ Naagáy ngiri mu/aywaáts ngiri báw, «Munguú doori atén ti alee/iis baraá gadiyeérihe, nee ateékaá sagadiyuuseerós an tlawaán tlehhma un iimu/uumaán. Ala kuungá' gár tundu loó' i káhh, laqaá harímarhúng laqaá gár ta inslasleera' i káhh baraá Yerusalemuro.»