NEHEMIA 13 - Biblía Axweesantá Hhohho' ar Mungú 2004

Múk Yahudi tiwa paraátl dír xoordaá hatlae

¹ Bál deeloodá' ure kitaábuú Mose kuna soomuús dír muu sleémeero, kari xuú' adór múk Amoni nee oo Moabu ir harinká dahmuú baraá dinku'uumár múk Munguhe.

² Asma múk Israeli qoomár niwa baraá yaamaá Misri wa ti'iít ngaa muruú /aymár i hanisi'iiká laqaá tam ma'aá wahaangw, kitaangose a Bala'amu nguna buiyé' as múk Israeli nguwa lu'usi, ala Munguúrén lo'oodá' gana warqeés tay tsuuqa.

³ Qoomár múk Israeli dabeerí ngiwa axaás múk xoordá' hatlá' ngway paraatliyé' dir'ine.

Warqeemuú Nehemia naa huúw

⁴ Qoomár bál deeloodá' ur niwa xeeriiká kaahamusmo Eliashibu kudá' taa tsawaár as kutuwoó doó Munguúrén nguwa xun, inós nee Tobia ti oohiyá'.

⁵ Kutuwír ur gana amohhe'eés as Tobia, kutuwidá' ta ilahhooár balaángwí qamaamín nee ar mooyaango nee xoosla, nee ilahhooár balaangw ar gár wák baraá mibaango nee difaái nee di/i, tidá' taa hara'ayín kawa hanmiisi dír múk tlahhoó Laáwi nee daauuse, nee xuumuusér afér doó Mungú, nee ilahhooa as kaahamuusér Mungú.

⁶ Qoomár muruuwí iwa tleehharuút aníng a Yerusalemúr i diriaaká, asma baraá kurkú mibeeri tám nee tsár oo waawuti'iimár Artashasta oo yaamaá Babuloniro, aníng ana amór waawutumoó káw, aluuwo iri ya/án niwa kii/ Yerusalemu.

⁷ Niwa kií/ Yerusalemu tlakweemaaká' Eliashibu Tobia nguwa kutuwír i amohhe'eés baraá doó Munguhe aníng ngiri tsaáhh.

⁸ Aníng ana ló'wa buúhh xooslaá Tobia sleémeero ngay tsee/áy kwaáhh baraá kutuwidae.

⁹ Muu una ádbáw kutuwaydá' kuwa hhohhoeesi, xooslaá doó Mungú nee ilahhooár balaango, nee mooyaango.

¹⁰ Slám ngay malé tsaáhh adór múk tlahhoó Laáwi hariímar'ín ngira slay'iiká, naxés múk tlahhoó Laáwi nee daauuse, kudá' geeraawo gadiyuusá', umuú heewo iri kií/ baraá qaymoorós.

¹¹ Geeraharuuse ana igahhaát ngiri báw, «Asma milá doó Mungú gár kusa máy.» Inooín sleémeero ngiri burumbuúr, ngiri ki/ís baraá gadiyeé.

¹² Aluuwo múk Israeli sleémeero ilahhooár balaangw ar wák baraá mibaango oo balaangw nee baraá difaáiro, nee baraá di/to kuri qaás baraá kuuntáy.

¹³ Muu nguri tsawaár oo kuuntáy gu amohhe'eemiís, kaahamusmo Shelemia nee goousmo Sadoki nee Pedaia heé tlahhoó Laáwi. Nee Hanani garmoó Sakuri, garmoó Matania tawa alee/isusmooín. Inooín i inkihhimuú koná' nee gadiyér'ín a mura' kun qasmiis dír hhaeeín.

¹⁴ Aá Munguúeé', án inslawáng baraá muruuwihe, tlehhmi'iieé' kudá' hho' naa tleehhahhiít as do'ók nee as gadiyeérók mi fitsaar.

¹⁵ Deeloodár kilae múk Yuda una ár i sabiíbuú tsoo/itiyá' deelór Sabaátoro, bahh'alé daqwaayer'ín ngaa huwaárí tsa/aasiyé' ar difaáiro, nee sabiíbuuwo, nee /aantsihe, nee umuúqo gaaro ki huuw gixsár Yerusalemu. Ngiri gurbuú' adór deelór Sabaátoro weermis ir qonká.

¹⁶ Múk Tiro kudá' baraá gixsár hoót siyó nguna huwiyé' nee muruú hatlae baraá gixsár Yerusalemu, nguri weerimisiyé' bál deelór Sabaátoro dír múk Yuda nee múk Yerusalemúr hoót.

¹⁷ Geeraharuusér múk Yuda ana iigahhaát, ana oó', «Tlakweemaaká' ta tlehhtá' a milá awa deelór Sabaáto kawa meetagaamisa'?

¹⁸ Xáy baabi'iihúng adoorí ngaa tleehhi'iikáhe, nee Munguúrén atén taa slahh'amuú úr i huwikáhe nee gixsarihe? Hám a malé buhhtaawós huwtá wa sla'á' gawaá múk Israeli ar Sabaáto kawa meetagamisa'.»

¹⁹ Aluuwo niri oó', afér gixsár Yerusalemu ka tsegiiti tsiindaá deelór Sabaáto bir iimu/u/uún qoomár iimi bir giwtír slá', slám makawa gweér ay dír Sabaáto i fak. Sagadiyuuser'eé' bahh'alé ana qaás dír afér gixsa, nee ngiri báw tam hee gár wák mingiwa huúw baraá gixsa bál Sabaátoro.

²⁰ Ay ki/ima tsár halanuuse i muruú haahúp, ala aqo nina tsee/aá gixsár i qaatiyé'.

²¹ Ina gurbu'uúm ngiwa babaw, «Gár tas tsee/aá gixsár i qaqatiinda' i káhh. Binda malé ki/é' daxta a aandá'.» Gawaá adoorihe, naa baloó ki/i'iiká daqemuuwo bál Sabaátoro.

²² Múk tlahhoó Laáwi una ádbáw tiwa kilooín hhohhoeesiya', niwa hardihiya' afér gixsa ngiwa xuna deelór Sabaátór hhoohhooe. Munguúeé', án inslawáng, tam tihe, gurtlawáng ar harqoomoó yaareemaá sla'aarirók tidá' warqawaaká.

²³ Slám deeloodae múk Yahudi sleeme una ár oo /ameenár Ashdodi gaa duxuut nee ar Amoni nee ar Moabu,

²⁴ tlaqtá na/ii'ín a tsifrír Ashdodi ngin ar axweesiyá', ala tsifrír Yuda ngi aleeslay'aaká ar axweesanto, ala a tsifrír múk hatlá'.

²⁵ Ina iigahhaát, ngiri lu'umís, bahh'ale ngiri muúx, kookariya' ina se'eengw uuruxuúm. Ina /uurutimís ngiwa lo'ór /aymiis ar umuú Mungú ngiwa babaw, «Dasuuhúng mukuwa duxuút nee daaqay'ín, tam daaqayhúng dasuuín munguwa duxuút, laqaá tam kuungaá kilá'.

²⁶ Xáy Solomon aa dakuusikáhe as /ameenár adór tí? Inós a waawutmoó úr ta waawituú xoorduuwo slám Munguúwós gwaa slaá', Mungú guri waawutmoó Israeli wa qaás, ala tam adoorihe /ameenadár xoordaá hatlá' guri tlakweemár eér.

²⁷ Xáy atén kuungá' nun iiárií qaasána baraá /aymuú tlaakwe, nee tlakweemaá yaariir awa adór kuká' kiri tleehhaán tam Munguúrén kway tlakweemáy tleehhaán as /ameenarí kawa duxuta'?»

²⁸ Garmoó wák baraá daaqoó Yoyada, garmoó Eliashibu kaahamusmoó úr a taatoó harér Sanbalati, heé Bet-horonír daáhh, gawaá adoorihe, aníng nguri guús dir'eene.

²⁹ Munguúeé', inslaweek adoodá' kahamuusi'iima ngira meetagaasiyé' nee alqadór kahamuusi'iimaro nee ar tlahhoó Laáwiwo.

³⁰ Gawaá adoorihe, aníng inooín ngiri hhoohhooeés baraá umuúqo gár xoordaá hatlae, ngiri baalaqaasírí qaás kaahamuuse nee múk tlahhoó Laáwi umuú heewo baraá gadiyeérós,

³¹ nee ilahhooár migír ngiri oó' kingiwa huwi qoomaadá' hariima nee bu'úngw geera. Aá Munguúeé', án inslawáng as iwa hhooeemáy tlehh.